އުރީދޫ މޯލްޑިވްސްއިން ހުޅުމާލެ ސެންޓްރަލް ޕާކު ކައިރީގައި އޮތް ބިމެއްގައި އިމާރާތްކުރާއެ ކުންފުނީގެ އާ އޮފީސް އިމާރާތުގެ ސްޓްރަކްޗާ މަސައްކަތް އެއްކޮށް ނިންމާލައިފި އެވެ.
ޒަމާނީ ފެންވަރަށް އިމާރާތްކުރާ އުރީދޫގެ މި އޮފީސް އިމާރާތުގައި ބޭސްމެންޓަކާ އެކު 11 ފަންގިފިލާ ހުރެ އެވެ. އިމާރާތްކުރުމުގެ މަސައްކަތް ކުރަމުން ދަނީ ޗައިނާ ސްޓޭޓް ކޮންސްޓްރަކްޝަން އިންޖިނިއަރިން ކޮމްޕެނީ ލިމިޓެޑް (ސީއެސްސީއީސީ) އާ އެވެ.
މި އިމާރާތުގެ މަސައްކަތް މިދިޔަ އަހަރުގެ ނޮވެމްބަރުގައި ރަސްމީކޮށް ފެށި ނަމަވެސް އެ އަހަރުގެ ސެޕްޓެމްބަރު މަހުން ފެށިގެން ފައުންްޑޭޝަނާއި ބޭސްމަންޓުގެ މަސައްކަތް ދިޔައީ ކުރަމުންނެވެ. މުޅި ސްޓްރަކްޗާގެ މަސައްކަތް ނިންމަން ނެގީ ނުވަ މަސް ދުވަހެވެ.
އެންމެ ފަހުން ބޭއްވި އުރީދޫގެ އަހަރީ އާންމު ޖަލްސާގައި އެ ކުންފުނީގެ ސީއީއޯ އަދި މެނޭޖިން ޑިރެކްޓަރު ހާލިދު ހަސަން އަލް ހަމަދީ ވިދާޅުވި ގޮތުގައި އަމާޒަކީ އަންނަ އަހަރު މަސައްކަތް އެއްކޮށް ނިންމާ، ދެވަނަ ކުއާޓަރުގައި އޮފީސް ބޭނުންކުރަން ފެށުމެވެ.
ތިމާވެއްޓާ ރައްޓެހިގޮތަކަށް ފަރުމާކޮށްފައިވާ މި އިމާރާތުގައި ވާރޭފެން ރައްކާކުރެވޭނެ ނިޒާމާއި އެނާޖީ ސޭވިން ފެސިލިޓީ ހުންނާނެ އެވެ. އަދި ކުންފުނީގެ މުވައްޒަފުންނަށް ހާއްސަ ފެސިލިޓީތަކާއި މުވައްޒަފުންގެ އާއިލާތަކަށް ހާއްސަ ޑޭ ކެއާ ފަދަ ފެސިލިޓީތައް ވެސް ގާއިމުކުރަން ވަނީ ރާވާފަ އެވެ.
