މި މަހު ފަހުކޮޅު އިނގިރޭސިވިލާތުގައި ފަށާ ކޮމަންވެލްތު ގޭމްސްގައި ބައިވެރިވާ ރާއްޖޭގެ ކޮންޓިންޖެންޓާއި ރާއްޖޭގައި ހުންނަވާ އިނގިރޭސި ހައި ކޮމިޝަނަރު ކެރޮން ރޮސްލާ ބައްދަލުކުރައްވައިފި އެވެ.
އިއްޔެ މާގިރި ހޮޓެލްގައި ބޭއްވި ބައްދަލުވުމުގައި ރާއްޖޭގެ އޮލިމްޕިކް ކޮމިޓީގެ ރައީސް މުހައްމަދު އަބްދުއްސައްތާރާއި ކޮމަންވެލްތު ގޭމްސްގެ ރާއްޖޭގެ ޗެފް ޑި މިޝަން، އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ގެ އިތުރުން ކޮމަންވެލްތު ގޭމްސްގައި ރާއްޖޭން ބައިވެރިވާ އެތުލީޓުން އަދި އޮފިޝަލުން ބައިވެރިވި އެވެ.
މި މަހު 28 އިން އަންނަ މަހުގެ އަށް ވަނަ ދުވަހުގެ ނިޔަލަށް އިނގިރޭސިވިލާތުގެ ބާމިންހަމްގައި ކުރިއަށްދާ ކޮމަންވެލްތު ގޭމްސްގައި ރާއްޖޭގެ ޓޭބަލް ޓެނިސް، ބެޑްމިންޓަން، ބީޗްވޮލީބޯޅަ، އެތުލެޓިކްސް އަދި ސްވިމިން ގައުމީ ޓީމު ބައިވެރިވެ އެވެ. ބީޗްވޮލީބޯޅަ ނޫން ކޮންމެ ކުޅިވަރެއްގައި ދެ ޖިންސުގެ އެތުލީޓުން ވާދަކުރާނެ އެވެ.
އިއްޔެގެ ބައްދަލުވުމުގައި ވާހަކަ ދައްކަވަމުން، ހައި ކޮމިޝަނަރު، ކެރޮން ވިދާޅުވީ ރާއްޖެ ކޮމަންވެލްތަށް އެނބުރި އައުމަކީ ލިބިގެންދިޔަ ވަރަށް ބޮޑު ހިތްހަމަޖެހުމެއް ކަމަށެވެ. އަދި ބާމިންހަމްގައި މި ފަހަރު ކޮމަންވެލްތު ގޭމްސް ހޯސްޓްކުރާއިރު، ކެރޮން ވަނީ އެ ސަރަހައްދާ ގުޅޭ މުހިންމު މައުލޫމާތުތަކެއް ރާއްޖޭގެ ކޮންޓިންޖެންޓަށް ހިއްސާކޮށްފަ އެވެ.
އިއްޔެގެ ބައްދަލުވުމުގައި ހައި ކޮމިޝަނަރު ކެރޮން (މ) ރާއްޖޭގެ ކޮންޓިންޖެންޓާ ވާހަކަ ދައްކަވަނީ.--- ފޮޓޯ: މޯލްޑިވްސް އޮލިމްޕިކް ކޮމިޓީ
ގޭމްސްގައި ވާދަކުރާ ދިވެހި އެތުލީޓުންނަށް ކާމިޔާބަށް އެދޭ ކަމަށް ވިދާޅުވެ، ކެރޮން ވަނީ ބާމިންހަމް ފަދަ އިނގިރޭސި އެންމެ ތާރީހީ އެއް ސިޓީގައި ކުޅިވަރުގެ ބޮޑު ގޭމްސްއެއްގައި ވާދަކޮށްލަން ލިބިފައިވާ މި ފުރުސަތުގެ ބޭނުން އެންމެ ފުރިހަމަ އަށް ހިފުމަށް ހުރިހާ އެތުލީޓުންނަށް ހިތްވަރު ދެއްވައިފަ އެވެ.
މި އިވެންޓްގައި ރާއްޖޭގެ އެތުލީޓުން ވެސް ވަނީ އެ ކުޅުންތެރިއަކު ވާދަކުރާ ކުޅިވަރެއްގައި މިހާތަނަށް ކުރި ތަޖުރިބާތަކުގެ މުހިންމު އުސްއަލިތައް ހިއްސާކޮށްފަ އެވެ.
ކޮމަންވެލްތް ގޭމްސްގައި ރާއްޖޭން 1986 ވަނަ އަހަރުން ފެށިގެން ބައިވެރިވަމުން އައި ނަމަވެސް 2016 ގައި ކުރީގެ ރައީސް އަބްދުﷲ ޔާމީންގެ ސަރުކާރުން ކޮމަންވެލްތުން ވަކިވާން ނިންމުމާ އެކު، އެ ގޭމްސްގެ ފުރުސަތު ރާއްޖެ އަށް ގެއްލުނެވެ. އެހެންވެ، އެންމެ ފަހުން 2018 ވަނަ އަހަރު އޮސްޓްރޭލިއާގެ ގޯލްޑް ކޯސްޓްގައި ބޭއްވި ކޮމަންވެލްތު ގޭމްސްގެ ފުރުސަތު ރާއްޖެ އަށް ބައިވެރިނުވެވުނެވެ.
ކޮމަންވެލްތާ އަލުން ގުޅުމަކީ ރައީސް އިބްރާހިމް މުހައްމަދު ސޯލިހްގެ ރިޔާސީ އެއް ވައުދެވެ. އެ މަނިކުފާނުގެ ވެރިކަމުގެ ފުރަތަމަ 100 ދުވަހުގެ ތެރޭގައި ކޮމަންވެލްތާ ގުޅެން ރައްޔިތުންގެ މަޖިލީހަށް ހުށަހަޅައި އެކަން ފާސްކުރި އެވެ.
ރާއްޖެ އަށް ކޮމަންވެލްތު ގޭމްސް އިން އަލުން ފުރުސަތު ލިބުނުކަން އިއުލާނުކުރީ 2020 ވަނަ އަހަރުގެ އޮގަސްޓް މަހުގެ ތެރޭގަ އެވެ.
ކޮމަންވެލްތު ގޭމްސް އަށް ފަހު ރާއްޖޭގެ އެތުލީޓުންނަށް ދެން އޮތީ އަންނަ މަހު އަށް ވަނަ ދުވަހު ތުރުކީގެ ކޮންޏާގައި ބާއްވާ އިސްލާމިކް ސޮލިޑާރިޓީ ގޭމްސް އެވެ. ކޮމަންވެލްތު ގޭމްސް އާއި އިސްލާމިކް ސޮލިޑާރިޓީ ގޭމްސްގައި ވާދަކުރާ ރާއްޖޭގެ އެތުލީޓުންނާއި އޮފިޝަލުންނަށް މޯލްޑިވްސް އޮލިމްޕިކް ކޮމިޓީން ވަނީ ދާދި ފަހުން އެންޓި-ޑޯޕިން ސެމިނާ އެއް ނަގައިދީފަ އެވެ. މި ސެޝަން ނަގައިދެއްވީ ޑޯޕިން ކޮންޓްރޯލް އޮފިސަރު (ޑީސީއޯ)، ޑރ. މުހައްމަދު އިނާޝް އަބްދުލް ލަތީފް އެެވެ.
