ދޯހާ، ގަތަރު (ޖުލައި 15) - ޕީއެސްޖީގެ ރައީސް ނާސިރު އެލް ހެއްލާފީ އިސްވެ ހުންނަވައި، ސްޕެނިޝް ލަލީގާގައި ވާދަކުރަމުން އަންނަ ކްލަބް، އެސްޕަންޔޯލް ގަންނަން ބިޑްކޮށްފައިވާ ކަމަށް ރިޕޯޓްތައް ބުނެފި އެވެ.
ބާސެލޯނާ ވެސް ނިސްބަތްވާ ސަރަހައްދު، ކެޓަލޫނިއާގެ ކްލަބް އެސްޕަންޔޯލް މި ވަގުތު ހިންގަމުން އަންނަނީ ޗައިނާގެ ކުންފުންޏެއް ކަމަށްވާ ރަސްޓާ ގްރޫޕްގެ ދަށުންނެވެ. އެކަމަކު، ފާއިތުވި އަހަރުތަކުގައި އެ ކްލަބްގެ މާލީ ހާލަތު ގޯސްވުމުން މިހާރު އެސްޕަންޔޯލް ވިއްކާލަން އަންނަނީ ވާހަަކަ ދައްކަމުންނެވެ.
ރަސްޓާ ގްރޫޕުން 2015 ވަނަ އަަހަރު ގަތް އެސްޕަންޔޯލް މި ވަގުތު ވަނީ ބިޑަށް ލައިފަ އެވެ. ޗައިނާ މީޑިއާތަކަށް ރަސްޓާ ގްރޫޕްގެ ޗެއާމަން، ޗެން ޔަންޝެން ވަނީ އެސްޕަންޔޯލް ވިއްކާލަން ނިންމިކަން ކަށަވަރުކޮށްދީފަ އެވެ.
ސްޕެއިނާއި ގަތަރުގެ މީޑިއާތަކުން ރިޕޯޓްކުރާގޮތުގައި ދެ ފަރާތަކުން މި ވަގުތު ވެސް ވަނީ އެސްޕަންޔޯލް ގަންނަން ބިޑްކޮށްފަ އެވެ. އޭގެ ތެރޭގައި ހިމެނެނީ ހެއްލާފީގެ ހިއްސާ އޮންނަ ކުންފުނި ކީއުއެސްއައި އާއި އުތުރު އެމެރިކާގެ ކުންފުންޏެކެވެ.
ޔުއެފާގެ ގަވާއިދުގައިވާ ގޮތުން އެއް ބޯޑު މެމްބަރަކު ސީނިއާ މެނޭޖްމަންޓްގައި ހިމެނޭ ދެ ކްލަބެއް އެއް ފަހަރާ ޔޫރަޕްގެ މުބާރާތެއްގައި ވާދަނުކުރެވޭނެ އެވެ. މާނަ އަކީ ކިއުއެސްއައި އިން އެސްޕަންޔޯލް ގަތް ނަމަވެސް ޕީއެސްޖީ އޮއްވައި، އެސްޕަންޔޯލަށް ޔޫރަޕްގެ މުބާރާތެއްގައި ވާދަނުކުރެވޭނެ އެވެ. ޕީއެސްޖީ އާއި އެސްޕަންޔޯލަށް އެއް ސީޒަނެއްގައި ޔޫރަޕްގައި ވާދަކުރެވޭނީ ކޮންމެ ވެސް އެއް ކްލަބެއް ހިންގާ ކުންފުނީގެ މަގާމުން ހެއްލާފީ ވަކިވެގެންނެވެ.
ހެއްލާފީ، 2011 ވަނަ އަހަރު ޕީއެސްޖީ ގަނެގެން ބޮޑު ހަަރަދުތަކެއް ކޮށްގެން މަސައްކަތް ކުރަމުން އަންނައިރު، ފާއިތުވި އަހަރުތަކުގައި އޭނާ އަންނަނީ ވިޔަފާރިތައް ބޭނުންކޮށްގެން ޔޫރަޕްގެ އެހެން ގައުމުތަކުން ކްލަބްތައް ގަންނަން މަސައްކަތް ކުރަމުންނެވެ.
މީގެ ކުރިން ޖަރުމަނާއި އިޓަލީން ކްލަބް ގަންނަން ހެއްލާފީ ކުރި މަސައްކަތް ދިޔައީ ކޮޅެއްގައި ނުޖެހި އެވެ.
ލަލީގާގެ ރައީސް ހަވީއޭ ޓެބާސް އަންނަނީ ތަކުރާރުކޮށް ޕީއެސްޖީ އާއި ހެއްލާފީ އަށް ފާޑުކިޔަމުންނެވެ. އެއީ ފުޓްބޯޅައިގެ މާލީ ރައްކާތެރިކަމަށް ހަދާފައިވާ، ފައިނޭންޝިއަލް ފެއާޕްލޭ (އެފްއެފްޕީ)ގެ ނާޖާއިޒު ފައިދާނަގައި، ޕީއެސްޖީން ހަރަދުކުރަމުން އަންނަ ކަމަށް ވިދާޅުވެ އެވެ.
ސްޕެއިނުގެ ބައެއް މީޑިއާ ރިޕޯޓްތައް ބުނާގޮތުން ހެއްލާފީގެ ބައިވެރިވުން އޮތް ކުންފުންޏަކުން ލަލީގާގެ ކްލަބެއް ގަތް ނަމަވެސް ލަލީގާއިން އެ ކްލަބް ރަޖިސްޓްރީ ކޮށްދޭން ޓެބާސް ދެކޮޅު ހަދާނެ އެވެ.
