މާލެއިން ފުރައިގެން އަރި އަތޮޅަށް ދިޔަ ލޯންޗެއް ފަޅައިގެން ގޮސް މިއަދު ހިނގި ހާދިސާއެއްގައި، ލޯންޗު ހާލުގައި ޖެހުނު ވަގުތު ކައިރިން ދިޔަ އެހެން ދޯންޏަކުން އެހީނުވެ ދިޔަ ކަމަށް ލޯންޗުގައި ތިބި ބައެއް މީހުން ބުނެފި އެވެ.
މާލެއިން ފުރައިގެން އއ. ހިމަންދޫ އާއި އެ އަތޮޅު މާޅޮސް އަދި ފެރިދުއަށް ދަތުރުކުރަމުން ދަނިކޮށް ފަޅައިގެން ގޮސްފައިވަނީ "އެރްވީނާ އަލޯހާ" ނަމަކަށް ކިޔާ ލޯންޗެކެވެ. އެ ލޯންޗު މާލެއިން ފުރާފައިވަނީ 15:11 ގަ އެވެ. ލޯންޗު ހުއްޓުނުއިރު ލޯންޗުގައި 47 މީހަކު ތިބި އެވެ.
އެމްއެންްޑީއެފުން ބުނި ގޮތުގައި ހާދިސާ ހިނގަން މެދުވެރިވީ ލޯންޗު، އަލިހުރަސް ކަނޑުން ލަކުޑި ގަނޑެއްގައި ޖެހި ލޯންޗުގެ ހަލްގަނޑު ތިރިން ފަޅައިގެން ގޮސް ލޯންޗު ދިޔަވުމުގެ ސަބަބުންނެވެ.
ހާދިސާ ހިނގި ކަމުގެ ރިޕޯޓު އެމްއެންޑީއެފަށް ލިބިފައިވަނީ 15:59 ގައި ކަމަށާއި އެ ސަރަހައްދަށް ކޯސްޓު ގާޑުން ގޮސް، 16:37 ހާއިރު ލޯންޗު ގިރާވަރަށް ވައްދާފައި ކަމަށް އެމްއެންޑީއެފުން ބުނެފައިވެ އެވެ.
އެ ލޯންޗުން ދަތުރުކުރި 45 މީހުން މެރީން ޕޮލިހާއި "ހަލްޔާޑް" ނަމަކަށް ކިޔާ ލޯންޗެއްގެ އެހީތެރިކަމާއެކު ވަނީ މާލެ ގެންގޮސްދީފަ އެވެ. ހަލްޔާޑް ލޯންޗަކީ ހާލުގައި ޖެހުނު ލޯންޗު ހިންގާ ކުންފުނީގެ ލޯންޗެކެވެ.
ލޯންޗުގައި ދަތުރުކުރި އެންމެންގެ ހާލު ރަނގަޅުކަން ފުލުހުންނާއި އެމްއެންޑީއެފުން ވެސް ވަނީ ޔަގީންކޮށްދީފަ އެވެ.
ނަން ނުޖެހުމަށް ޝަރުތުކޮށް އެ ލޯންޗުގައި ދަތުރުކުރި މީހަކު މި ނޫހަށް ކިޔައިދިން ގޮތުގައި ހާދިސާ ރިޕޯޓު ކުރުމުން އެންމެ ފުރަތަމަ އެ ސަރަހައްދަށް ގޮސްފައިވަނީ މެރިން ޕޮލިހެވެ. އަދި ސިފައިން އެ ސަރަހައްދަށް އައީ އޭގެ ފަހުންނެވެ.
ފުލުހުން އައުމާ ހަމައަށް ވެސް ލޯންޗުގައި ތިބި މީހުން އައީ ފެން ހިއްކުމުގެ މަސައްކަތް ކުރަމުން ކަމަށް އޭނާ ބުންޏެވެ. އަދި ބުނީ ލޯންޗު ހާލުގައި ޖެހިފައިވަނިކޮށް، ވިއްސަކަށް ފޫޓު ދުރުން ދޯންޏެއް ދަތުރުކުރި ކަމަށެވެ. އެހެންނަމަވެސް އެ ދޯނިން އެހީތެރިކަމެއް ފޯރުކޮށްދީފައެއް ނުވެ އެވެ.
"ލޯންޗުގައި ތިބި މީހުން އަޑުގަދަކޮށް، އަދި ދިދަ ވެސް ހޫރުވިން އެ މީހުންނަށް ހާލުގައި ޖެހިފައި ތިބި ކަން އަންގައިދޭން، ފެންނަހާ ކައިރިން ދިޔައީ ވެސް. ދޯނި މަޑު ވެސް ކުރި، އެހެންނަމަވެސް އަޅާ ނުލާ ދިޔައީ،" އޭނާ ކިޔައިދިނެވެ.
ލޯންޗު ހާލުގައި ޖެހިފައި އޮތްއިރު، ގިނަ އަދަދެއްގެ ކުޑަކުދިންނާއި އަންހެނުންގެ އިތުރުން އުމުރުން ދުވަސްވީ މީހުން ވެސް ދަތުރުކުރަމުން އައި ކަން ވެސް އޭނާ ފާހަގަކުރި އެވެ. މިހާރު އެ ލޯންޗު ވަނީ މަރާމާތުކުރުމަށް ގިރާވަރުން ތިލަފުށްޓަށް އެމްއެންޑީއެފްގެ އެހީތެރިކަމާއެކު ގެންގޮސްދީފައެވެ.
މި މައްސަލައާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށް ފުލުހުންގެ މީޑިއާ އޮފިޝަލް ވިދާޅުވި އެވެ. އެރްވީނާ އަލޯހާ ލޯންޗު ފަޅައިގެން ދިއުމުގެ ސަބަބުން ހާދިސާއެއް ހިނގާފައިވާއިރު، މި މަހުގެ ހަ ވަނަ ދުވަހު އެ ލޯންޗު ދަތުރުކުރަމުން ދަނިކޮށް އިންޖީނު ހުއްޓިގެން ވެސް ސިފައިން އެހީތެރިކަން ފޯރުކޮށްދީފައިވެ އެވެ.
