ދައުރުވަމުންދާ ވީޑިއޯތަކެއްގައި ސިޔާސީ އިސް ބޭފުޅުންތަކެއް ކަމަށް ބެލެވޭ ބަޔަކާއެކު އެއް ޖިންސުން ގުޅުން ހިންގާ މަންޒަރުތަކުގައި ފެންނަ ކަމަށް ބުނާ ބަންގްލަދޭޝްގެ ރައްޔިތެއް ކަމަށްވާ އަލަމްގީރް ހައްޔަރުކޮށްފި އެވެ.
ފުލުހުން ބުނި ގޮތުގައި އަލަމްގީރް ހައްޔަރުކޮފައިވަނީ މިއަދު ހަވީރުގެ ވަގުތެއްގަ އެވެ.
އަލަމްގީރް މިއަދު ހަވީރު ހައްޔަރު ކުރުމުގެ ކުރިން އޭނާގެ ޕާސްޕޯޓް ވެސް އޮތީ ހިފަހައްޓައިފަ އެވެ. އަލަމްގީރް ފުރުން މަނާކޮށްފައިވާއިރު މީގެ ކުރިން އޭނާ ވަނީ ފުލުހަށް ހާޒިރުކޮށް ސުވާލު ވެސް ކޮށްފަ އެވެ.
ބަދުއަހުލާގީ އަމަލު ހިންގާ ވީޑިއޯތައް އާންމުވުމަށްފަހު ފުލުހުން ބުނެފައި ވަނީ އެ ވީޑިއޯތަކުގައި ހިމެނޭ މީހުންގެ މައްސަލަތައް ބަލަމުންދާ ކަމަށެވެ. އަދި، އެ ވީޑިއޯތައް ބޭނުންކޮށްގެން ބްލެކްމެއިލް ކުރި ކަމަށް ބުނެ ހުށަހަޅާފައިވާ މައްސަލަަތަކެއް ވެސް ފުލުހުން ގެންދަނީ ބަލަމުންނެވެ.
މިހާތަނަށް ދައުރުވެފައިވާ ވީޑިއޯތަކުގައި ރައްޔިތުންގެ މަޖިލީހުގެ ނޮޅިވަރަމް ދާއިރާގެ ކުރީގެ މެންބަރު މުހައްމަދު ނަޝީދު (ކާނަލް) ކަމަށް ބެލެވޭ މަޖިލީހުގެ ރައީސް މުހައްމަދު ނަޝީދުގެ ކޮއްކޯފުޅު އަދި ގާނޫނީ ވަކީލު ނާޒިމް ސައްތާރު ކަމަށް ބެލެވޭ މީހަކާއި ފުލުހަކު ވަނީ ފެނިފަ އެވެ.
ވީޑިއޯއިން ފެންނަނީ ނާޒިމް ކަމަށް އޭނާ އިންކާރު ކުރެ އެވެ. ނަމަވެސް ނާޒިމްގެ މައްސަލައެއް ބަލަމުންދާ ކަމަށް ފުލުހުން ބުނެ އެވެ. އަދި, ނާޒިމް ވެސް ވަނީ ފުލުހަށް ހާޒިރުކޮށް ބަޔާން ނަގައިފަ އެވެ.
ކާނަލްގެ ފޮޓޯއެއް ފުރަތަމަ ދައުރުވިއިރު އެއީ އޭނާ ކަމަށް އެއްބަސްވި އެވެ. އެކަމަކު އޭނާ އެ ތަނަށް ދިޔައީ ބިޒްނަސް މީޓިންއަކަ ބުންޏެވެ. ފަހުން ވީޑިއޯތަކެއް ދައުރުވިއިރު، އޭގައި އޭނާ ނެތް ކަމަށް ވިދާޅުވެފައިވެ އެވެ.
ފުލުހެއްގެ ވީޑިއޯ ދައުރުވިއިރު، އޭނާ ވަނީ ސަސްޕެންޑްކޮށްފަ އެވެ. ކާނަލް އާއި ނާޒިމްގެ ޕާސްޕޯޓް ވެސް ވަނީ ހިފަހައްޓައިފަ އެވެ.
