އިގްތިސާދީ އަދި އިންސާނީ ބޮޑު ކާރިސާއަކާ ކުރިމަތިލާން ޖެހިފައިވާ އަވަށްޓެރި ސްރީލަންކާގެ ރައީސާއި ބޮޑުވަޒީރު އިސްތިއުފާ ދެއްވަން ނިންމެވީ އިއްޔެ އެވެ.

ލަންކާގެ މީޑިއާތަކުން އިއްޔެ ރިޕޯޓުކޮށްފައިވާ ގޮތުގައި މި މަހުގެ 13 ވަނަ ދުވަހު އިސްތިއުފާ ދެއްވާނެކަން ގޮތަބަޔަ ވަނީ އެގައުމުގެ މަޖިލީހުގެ ރައީސަށް އަންގަވާފަ އެވެ.

އިސްތިއުފާ ދެއްވަން ގޮތަބަޔާ ނިންމެވިއިރު އެމަނިކުފާނުގެ ރިޔާސީ ގެކޮޅަށް އިއްޔެ މުޒާހަރާކުރާ މީހުން ވަނީ ވަދެގެންފަ އެވެ. އަދި، އެމަނިކުފާނަށް ޖެހުނީ އެތަން ދޫކުރައްވައި ވަޑައިގަންނަވާށެވެ. އަދިވެސް އެމަނިކުފާނު ހުންނެވި ތަނެއް އެނގިފައެއް ނުވެ އެވެ.

ލަންކާގެ ބޮޑުވަޒީރު ރަނިލް ވިކްރަމްސިންހަ ވެސް ވަނީ އިސްތިއުފާ ދެއްވާނެކަން އިއްޔެ ހާމަކުރައްވާފަ އެވެ. އެމަނިކުފާނުގެ ގެކޮޅަށް ވެސް ވަދެގަނެއް އެތަނުގައި ވަނީ ރޯކޮށްފަ އެވެ.

ރައީސް ގޮތަބަޔާ ރާޖަޕަކްސާގެ ގެކޮޅަށް ބަޔަކު ވަނުމާ އެކު ރަނިލް ވަނީ ހުރިހާ ސިޔާސީ ޕާޓީއެއްގެ ލީޑަރުންނާ އިއްޔެ ބައްދަލުކުރައްވާފަ އެވެ. ހުރިހާ ޕާޓީއަކުގެ ޑިމާންޑަކަށްވީ ސަރުކާރުގެ އިސް ލީޑަރުން އިސްތިއުފާ ދިނުމެވެ.

މި ދެ ބޭފުޅުން ވެސް އިސްތިއުފާ ދެއްވުމަށް ފަހު ގައުމީ އެއްބައިވަންތަކަމުގެ ސަރުކާރެއް އެކުލަވާލުމަށް ފުރުސަތު ދެއްވާނެ ކަމަށް ލަންކާގެ މަޖިލީހުގެ ރައީސް މިއަދު ވިދާޅުވި އެވެ.

ލަންކާގެ ސަރުކާރާ ދެކޮޅަށް ކުރަމުންދާ މުޒާހަރާތަކުގައި ބައިވެރިވުމަށް އެތައް ހާސް ބަޔަކު އިއްޔެ ވަނީ ކޮލޮމްބޯއަށް ދަތުރުކޮށްފަ އެވެ. ކޮލޮމްބޯ ހިމެނޭހެން ހަތް ސަރަހައްދެއްގައި ވަނީ ކާފިއު ވެސް އިއުލާނުކޮށްފަ އެވެ. ލަންކާގެ ސިޔާސީ މަޝްރަހުގައި ފާހަގަކޮށްލެވޭ ބޭފުޅުން ވެސް އަންނަނީ މި މުޒާހަރާތަކުގައި ބައިވެރިވަމުންނެވެ.

މިދިޔަ މާޗް މަހުގެ މެދެއްހާ ހިސާބުން ފެށިގެން ގޮތަބަޔާގެ ގެކޮޅުގެ ބޭރުގައި އާންމުން ދިޔައީ ކޭމްޕު ޖަހައިގެން މުޒާހަރާ ކުރަމުންނެވެ.

ސްރީލަންކާ ސޮވެރިން ޑިފޯލްޓަކަށް ގޮސްފައިވާއިރު އިންފްލޭޝަން ރޭޓު ހުރީ 54.6 ޕަސެންޓަށް ވުރެ މަތީގަ އެވެ. އަދި، ބޭހާއި ތެލަށް ވަނީ ޖެހިފަ އެވެ. އޭގެ އިތުރުން ކޮރަޕްޝަނާއި ނުފޫޒުގެ ބޭނުން ކުރަމުންދާތީ ވެސް ލަންކާގެ ރައްޔިތުން ތިބީ މި ސަރުކާރާ މެދު ވަރަށް ބޮޑަށް ހިތްހަމަނުޖެހިފަ އެވެ.

އެގައުމަށް ދިމާވެފައިވާ އިގްތިސާދީ ކާރިސާއިން ސަލާމަތްވާނެ ދުވަހެއް ވެސް ނޭނގެ އެވެ.

ބައެއް މުހިންމު ހަބަރުތައް

• ވެލާނާ އިންޓަނޭޝަނަލް އެއާޕޯޓުގައި އަލަށް ގާއިމުކޮށްފައިވާ ސީޕްލޭން ޓާމިނަލް ހުޅުވަން ތައްޔާރުވެފައިވާކަން އަދަދު އިން ރިޕޯޓުކުރީ އިއްޔެ އެވެ.

• ވޭތިވެދިޔަ ފަސް އަހަރުތެރޭ ރާއްޖެއަށް 167 އެމްބިއުލާންސް ގެނެސްފައިވާ ކަމަށް ހެލްތު މިނިސްޓްރީން ހާމަކުރިކަން ރިޕޯޓުކުރީ އިއްޔެ އެވެ.

• ނ. ހެނބަދޫއިން ގެއްލިގެން ހޯދަމުންދާ އިބްރާހިމް ރާމިޒު ދަތުރުކުރި ކަމަށް ބެލެވޭ ކެނޯއެއް ފެނުނީ އިއްޔެ އެވެ.

ދުވަހުގެ ކޯޓޭޝަން

އެއާޕޯޓުގައި އަޅާފައިވާ އާ ރަންވޭ ބޭނުންކުރަން ފެށޭނެ ތާރިހަކާ ގުޅޭގޮތުން އެމްއޭސީއެލްގެ ޑީއެމްޑީ ވިދާޅުވީ:

އެމްއޭސީއެލްގެ އެންމެ ބޮޑު އަމާޒަކީ އާ ރަންވޭ މި އަހަރުގެ ނިމުމުގެ ކުރިން ބޭނުން ކުރަން ފެށުން

ދުވަހުގެ ފޮޓޯ

މާލޭގައި ބޮޑު ޖަމާއަތުގައި ކުރި އީދު ނަމާދުގެ ތެރެއިން. މާފަންނު ސްޓޭޑިއަމްގައި ކުރި ނަމާދަށް ގިނަ އަދަދެއްގެ މީހުން ހާޒިރުވި. އީދުގެ އުފަލުގައި އެތައް ހާސް ބަޔަކު ބައިވެރިވެ އެކުވެރިކަމުގެ ރީތި މިސާލުތައް ވަނީ ދައްކުވައިދީފައި --- ފޮޓޯ: މުހައްމަދު ޝާބިން/އަދަދު