މާލެ ސިޓީ ކައުންސިލުން އިންތިޒާމުކޮށްގެން ނައިޓް މާކެޓެއް ބޭއްވުމަށް ނިންމައި، ބައިވެރިވާން ބޭނުންވާ ފަރާތްތަކަށް ފުރުސަތު ހުޅުވާލައިފި އެވެ.
މި އަހަރު ރޯދަ މަހަށްވެސް މާލެ ސިޓީ ކައުންސިލުން އިންތިޒާމުކޮށްގެން ނައިޓް މާކެޓެއް ބޭއްވުމަށް ހުޅުވާލި އެވެ. އުސްފަސްގަނޑުގައި އެ މާކެޓް ބާއްވަން ޕްލޭނިން މިނިސްޓްރީން ހުއްދަ ހޯދައި، ވިޔަފާރިވެރިންނަށް ސްލޮޓްތައް ވެސް ދޫކުރި އެވެ.
އަދި މާކެޓް އިންތިޒާމުކުރުމަށް ސިޓީ ކައުންސިލުން ކުންފުންޏަކާ ވެސް ހަވާލުކުރި އެވެ. ނަމަވެސް ރޯދަމަސް ފެށެން ވަގުތު ކުޑަތަން ވެފައިވާތީ، އިންތިޒާމުތައް ހަމަޖައްސަން ދަތި ކަމަށް ބުނެ ނައިޓް މާކެޓް ކެންސަލްކުރީ އެވެ.
މާލެ ސިޓީ ކައުންސިލުން މިއަދު ކުރި އިއުލާނެއްގައި ވަނީ ނައިޓް މާކެޓްގައި ބައިވެރިވާން ބޭނުން ފަރާތްތަކަށް އެ ފުރުސަތު ހުޅުވާލާފަ އެވެ.
އެހެންކަމުން ނައިޓް މާކެޓް ރާވައި، ހިންގުމަށް ޝައުގުވެރިވާ ފަރާތްތަކުން މި މަހުގެ 20 ވަނަ ދުވަހުގެ މެންދުރު 2:00ގެ ކުރިން އެ ކައުންސިލްގެ ޕްރޮކިއުމަންޓް ސެކްޝަން (ހ.ހުޅުގަލި 3 ވަނަ ފަންގިފިލާ) އަށް ޕްރޮޕޯސަލް ހުށަހެޅުމަށް ވަނީ އެދިފަ އެވެ.
މި މާކެޓް ބާއްވަނީ ކިހާ މުއްދަތަކަށް ކަމެއް އަދި ކޮން ދުވަހަކު ކަމެއް ކައުންސިލުން އަދި ހާމައެއް ނުކުރެ އެވެ.
އާ އަހަރާ ދިމާކޮށް، ސިޓީ ކައުންސިލުން ވަނީ މިދިޔަ އަހަރުގެ ޑިސެމްބަރުގައި ވެސް މާލޭގައި ނައިޓް މާކެޓެއް ބާއްވައިފަ އެވެ.
