މާލޭގައި ހުންނަ ފުރުގާން މިސްކިތުގެ ބިއްލޫރިގަނޑެއް ތަޅާލައިފި އެވެ.
މާލޭގެ މިސްކިތްތައް ބަލަހައްޓާ، މާލެ ސިޓީ ކައުންސިލުން ބުނީ ފުރުގާން މިސްކިތުގެ ބިއްލޫރިގަނޑެއް ތަޅާލާފައި ވަނީ ރޭގެ ވަގުތެއްގައި ކަމަށެވެ. އެ މައްސަލަ ފުުލުހުންނަށް ރިޕޯޓު ކޮށްފައިވާ ކަމަށް އެ ކައުންސިލުން ބުންޏެވެ.
މިސްކިތަށް ލިބިފައިވާ ގެއްލުން ފެންނަ ފޮޓޯތައް ސޯޝަލްމީޑިއާގައި މިހާރު ދަނީ ދައުރުވަމުންނެވެ. މާލެ ސިޓީގެ މޭޔަރު، އާދަމް އާޒިމް ވަނީ އެ އަމަލު ހަރުކަށި އިބާރާތުން ކުށްވެރިކުރައްވައިފަ އެވެ.
މީގެ ކުރިން 2024 ގައި ވެސް ފުރުގާން މިސްކިތަށް އެކިވަރުގެ ގެއްލުން ބަޔަކު ދީފައިވެ އެވެ. އެ މައްސަލައިގައި ފުލުހުން އޭރު މީހަކު ހައްޔަރު ވެސް ކުރި އެވެ.
އެ ފަހަރު، ފުރުގާން މިސްކިތުގެ އިމާމު ނަމާދު ކުރާ ސަރަހައްދުގައި ހުރި ބައެއް ކަރަންޓު ބޯޑުތަކާއި ވުލޫ ކުރާ ސަރަހައްދުގައި ހުރި އިސްކޫރުތަކަށް ގެއްލުންދީފައިވެ އެވެ.
