ދުއްވާ އުޅަނދަކީ ތިމާ ދާން ބޭނުންވާ މަންޒިލަށް ދެވޭނެފަދަ ހަލަތެއްގައި ހުރި އުޅަނދެއްތޯ ޔަގީން ކުރުމަށް ފުލުހުން އިލްތިމާސްކޮށްފި އެވެ.
މަގުމަތީގައި ހިނގާ އެކްސިޑެންޓްތަކާ ބެހޭ ގޮތުން މިއަދު ފުލުހުން ބޭއްވި ނޫސްވެރިންގެ ބައްދަލުވުމުގައި ނުރައްކާތެރި އެކްސިޑެންޓުތައް ހިނގަން މެދުވެރިވާ ސަބަބުތައް ހާމަކުރައްވަމުން ސުޕްރިޓެންޑެންޓް އޮފް ޕޮލިސް ހުސައިން ސަމީރު ވިދާޅުވީ އުޅަނދު ދުއްވާއިރު، އުޅަނދުގެ ހާލަތަކީ ވެސް ވަރަށް މުހިންމު ކަމެއް ކަމަށެވެ.
ސަމީރު ވިދާޅުވީ ރާއްޖޭގައި އުޅަނދުތަކުގައި ހުންނަން ޖެހޭ މިންގަނޑުތައް ގާނޫނާއި ގަވައިދުތަކުން ކަނޑައަޅާފައިވާ ކަމަށާއި، އުޅަނދަކީ މަގަށް އެކަށީގެންވާ އެއްޗެއްތޯ ކަށަވަރުކުރުމަށް ރޯޑްވޯތިނެސް ހަދަން ޖެހޭ ކަމަށެވެ. ނަމަވެސް ބައެއް ފަހަރު ގަރާޖުތަކުން އުޅަނދުގައި ހުންނަންޖެހޭ މިންގަނޑުތައް ނެތީސް ރޯޑްވޯތިނެސް ޖަހައިދޭ ކަމަށާއި، ރޯޑްވޯތިނެސް ޖަހަންޖެހޭ މުއްދަތުގައި އެކަން ނުކޮށް ހުންނަ ކަން ސަމީރު ފާހަގަކުރެއްވި އެވެ.
ސަމީރު ވިދާޅުވީ ރޯޑްވޯތިނެސް ހެއްދި ކަމުގައިވީ ނަމަވެސް އެކިއެކި ސަބަބުތަކާހެދި އުޅަނދުތަކުގެ ޓަޔަރުތަކަށް އަންނަ ބަދަލުތައް ދެނެގަނެ އެކަންކަމަށް އެކަށީގެންވާ ހައްލުތައް ގެންނަން ޖެހޭ ކަމަށެވެ. އެކަން ނުކުރެވި ހުރެ، ބާރު ސްޕީޑުގައި ދުއްވުމުން ނުވަތަ މޫސުން ގޯސްވުމުގެ ސަބަބުން ނުރައްކާތެރި އެކްސިޑެންޓުތައް ހިނގަން މެދުވެރިވާ ކަމަށް ސަމީރު ވިދާޅުވި އެވެ.
ސަމީރު ވިދާޅުވީ އެކްސިޑެންޓުތައް މަދުކުރުމަށް ރައްޔިތުންގެ މުހިންމު ހިއްސާއެއް އޮންނަ ކަމަށެވެ.
އަޅުގަނޑުމެން އަރާ އުޅަނދަކީ ދުއްވަން ނުވަތަ ދާން ބޭނުންވާ މަންޒިލަށް ދެވޭފަދަ، އެކަށީގެންވާ އުޅަނދެއްތޯ އަޅުގަނޑުމެން ޔަގީންކުރަން އެބަޖެހޭ.
ސަމީރު ވިދާޅުވީ ރައްޓެއްސެއްގެ އުޅަނދަކަށް އަރާ ނަމަވެސް, އެއީ ރައްކާތެރި އުޅަނދެއްތޯ ޔަގީން ކުރުމަކީ މިއަދު ކޮންމެ މީހަކު ވެސް ކުރަން ޖެހޭ ކަމެއް ކަމަށެވެ.
އެކްސިޑެންޓުތައް ހިނގަން މެދުވެރިވާ ސަބަބުތަކާ ބެހޭގޮތުން ސަމީރު އިތުރަށް ވިދާޅުވީ ގިނަ އެކްސިޑެންޓުތައް ހިނގާފައި ވަނީ ފަރުވާ ކުޑަކަމުގެ ސަބަބުން ނުވަތަ މަގަށް ދޭންވާ ސަމާލުކަން ނުދިނުމުގެ ސަބަބުން ކަމަށެވެ. ހަމައެއާއެކު، ސްޕީޑް ކޮންޓްރޯލް ނުވެގެންނާއި، އޯވާޓޭކް ކުރަން އުޅުމުގެ ތެރޭގައި ބަލަންވާ މިންވަރަށް ނުބެލިގޮސް ވެސް ގިނަ އެކްސިޑެންޓުތައް ހިނގާފައިވާކަން އޭނާ ފާހަގަކުރެއްވި އެވެ.
