ކުރީގެ ރައީސް އަބްދުالله ޔާމީން ޖަލަށްލުމަށް ހުކުމްކޮށްފިނަމަ, އެކަމާ އެންމެ އުފާވާނީ ޕީޕީއެމްގެ އިސްބޭފުޅުން ކަމަށް ޖުމްހޫރީ ޕާޓީން މިއަދު ބުނެފި އެވެ.
ޔާމީން ޖަލަށްލުމަށް ހުކުމްކޮށްފިނަމަ, ޕީޕީއެމްގެ ތާއިދު ޖުމްހޫރީ ޕާޓީގެ ލީޑަރު ގާސިމް އިބްރާހިމަށް އޮންނާނެ ކަމަށް ބުނެ ނޫހެއްގައި ލިޔެފައިވާ ރިޕޯޓަކާ ގުޅިގެން ޕީޕީއެމުން ވަނީ ރައީސް ޔާމީން ޖަލަށްލުމަށް ޖޭޕީގެ ލީޑަރު ގާސިމް އިބްރާހިމް ކޯޓުތަކަށް ނުފޫޒު ފޯރުވަމުން ގެންދަވާ ކަމަށް ތުހުމަތު ކުރައްވާފަ އެވެ.
"ރައީސް ޔާމީން ޖަލަށް ލުމަށް ހުކުމެއް އައުމަކީ އެންމެ ބޮޑަށް ޕީޕީއެމްގެ އިސްވެރިން، އުފާކުރައްވާނެ ކަމެއް، ރިޔާސީ ރޭހުގައި ވާދަކުރެއްވުމަށް ޓަކައި ނުވަތަ އޭގެ އުންމީދުގައި ތިބީ ގާތްގަނޑަކަށް ހަތެއް ނުވަތަ އަށް ބޭފުޅުން [ޕީޕީއެމްގައި] އެބަތިއްބެވި،" ޖޭޕީން ބޭއްވި ނޫސްވެރިންގެ ބައްދަލުވުމުގައި ޖޭޕީގެ ލީޑަރުގެ އެޑްވައިޒާ އިލްހާމް އަހުމަދު ވިދާޅުވި އެވެ.
އިލްހާމް ވިދާޅުވި ގޮތުގައި އެ ބޭފުޅުން އަންނަނީ ޔާމީން ޖަލަށް ލުމަށް ޓަކައި އެ ބޭފުޅުންނަށް "ކުރެވުނުހާ މަސައްކަތެއް" ކުރަމުންނެވެ. އަދި މި ކަމުގެ ތަފްސީލް ރައީސް ޔާމީނަށް އެނގިވަޑައިގަންނަވާނެ ކަމަށް ވިދާޅުވި އެވެ.
"މިއަދު އެ ވާހަކަ ދެއްކެވި ބޭފުޅުންނަކީ ރައީސް ޔާމީނަށް ޖަލުގެ ހުކުމެއް ހޯއްދެއްވުމަށް ރެއާއި ދުވާލު މަސައްކަތް ކުރާ މީހުން، އަޅުގަނޑުމެންނަކަށް ނުލިބޭ ރިޔާސީ ކެންޑިޑޭޓު ކަމެއް ރައީސް ޔާމީން ޖަލަށް ލުމަކުން، ރައީސް ޔާމީން ޖަލަށް ލުމަކުން އަޅުގަނޑުމެންގެ ޕާޓީއަކަށް ވެރިކަމެއް ނުލިބޭ،" އިލްހާމް ވިދާޅުވި އެވެ.
"އެ މީހުންގެ ތެރެއިން ސަރުކާރުގައި ތިބި ބައެއް ބޭފުޅުންނާ ބައްދަލުކުރެއްވިޔަސް ބައްދަލުކުރައްވަނީ ވެސް، ޖަލަށް ގެންދަވަނީ ކޮން އިރަކުތޯ [ބައްލަވަނީ ވެސް]،"
އަދި، ޔާމީނަށް ނިކަމެތިކޮށް، ދެރަ ގޮތެއް ވުމަށް ޖޭޕީއާއި އެ ޕާޓީގެ ލީޑަރު ގާސިމް އިބްރާހިމް ނޭދޭ ކަމަށް ވެސް އިލްހާމް ވިދާޅުވި އެވެ.
އިލްހާމް ވިދާޅުވީ ޖޭޕީގެ އަސާސީ ގަވައިދުގައި އޮންނަ ގޮތުން ކައުންސިލުން އިތުރު ގޮތަކަށް ނުނިންމާހާ ހިނދަކު އެ ޕާޓީން ރިޔާސީ ކެންޑިޑޭޓެއް ނިކުންނާނެ ކަމަށާއި އެހެންނަމަވެސް އެއީ ކޮން ކެންޑިޑޭޓެއް ކަމެއް އަދި ކަނޑައަޅާފައި ނުވާ ކަމަށެވެ.
"އަޅުގަނޑަކަށް ނޭނގެ އެއީ ކޮން ބޭފުޅެއް ކަމެއް އެހެންނަމަވެސް އަޅުގަނޑަށް އެނގޭ އެއްޗަކީ ﷲގެ ވާގިފުޅާއެކު 2023 ވަނަ އަހަރުގެ ރިޔާސީ އިންތިހާބުގައި ޖޭޕީގެ ވަރުގަދަ ކެންޑިޑޭޓެއް ވާދަކުރައްވާނެ،" އިލްހާމް ވިދާޅުވި އެވެ.
ޖޭޕީގެ ރިޔާސީ ޓިކެޓަށް މިހާތަނަށް ޝައުގުވެރިކަން ފާޅުކުރެއްވީ ލީޑަރު ގާސިމް އިބްރާހިމް ކަން ފާހަގަކުރައްވައި އިލްހާމް އިތުރަށް ވިދާޅުވީ ގާސިމަކީ ރާއްޖޭގެ ސިޔާސީ މަސްރަހުގައި ހުންނެވި އެންމެ ވަރުގަދަ ލީޑަރު ކަމަށެވެ.
