މާލެ ސިޓީގެ ތިން ސަރަހައްދެއްގައި ފިތުރު އީދު ނަމާދު ބޮޑު ޖަމާއަތުގައި ކުރަން އިސްލާމިކް މިނިސްޓްރީ ނިންމައިފި އެވެ.
އިސްލާމިކް މިނިސްޓްރީން ބުނީ އީދު ނަމާދު ބޮޑު ޖަމާއަތުގައި ކުރާނީ މާފަންނު ސްޓޭޑިއަމް، ހުޅުމާލެ ސްޓޭޑިއަމް(ސިންތެޓިކް ޓްރެކް)، އަދި ވިލިމާލޭ ބޯޅަދަނޑު ސަރަހައްދުގައި ކަމަށެވެ.
މާފަންނު ސްޓޭޑިއަމްގެ ބޮޑު ޖަމާއަތުގައި 20،000 އަށް ވުރެ ގިނަ މީހުންގެ ޖާގަ އޮންނާނެ ކަމަށް އިސްލާމިކް މިނިސްޓްރީން ބުނެ އެވެ. އަދި ހުޅުމާލޭގެ ސްޓޭޑިއަމްގައި ނަމާދު ކުރަން 9،000 މީހުންނަށް ވަދެވޭނެ ޖާގަ އޮންނާނެ ކަމަށް ހައުސިން ޑިވެލޮޕްމެންޓް ކޯޕަރޭޝަންއިން ބުނެ އެވެ.
ބޮޑު ޖަމާއަތުގައި އީދު ނަމާދު ކުރަން ނިންމާފައި ވާއިރު، އިސްލާމިކް މިިނިސްޓްރީން އިލްތިމާސްކޮށްފައި ވަނީ ގެއިން ވުޟޫކޮށްގެން ދިއުމަށާއި އަމިއްލަ މުސައްލައަކާއި، ފެންފުޅިއެއް ގެނައުމަށެވެ. އަދި ފައިވާން ލާނެ ޕްލާސްޓިކް ނޫން ކޮތަޅެއް ގެނައުމަށް ބުނެފައިވެ އެވެ.
ބޮޑު ޖަމާއަތުގައި އީދު ނަމާދު ކުރުމަށް ނިންމި ނަމަވެސް މޫސުން ތަން ނުދޭ ނަމަ ނަމާދު ކުރުން އޮންނާނީ މިސްކިތްތަކުގައި ކަމަށް ވެސް އިސްލާމިކް މިނިސްޓްރީން ބުނެ އެވެ.
ކަލަންޑަރުގައިވާ ގޮތުން ފިތުރު އީދު ދުވަހަކީ އަންނަ ހޮނިހިރު ދުވަހެވެ.
މާފަންނު ސްޓޭޑިއަމްގައި ބޮޑު ޖަމާއަތް ހަދައިގެން އީދު ނަމާދު ކުރަން ފެށީ 2012 ވަނަ އަހަރުން ފެށިގެންނެެވެ. އެއަށް ފަހު 2018 އާ ހަމައަށް ބޮޑު ޖަމާއަތުގައި ނަމާދު ކުރި އެވެ. ދެހާސް ނަވާރަ ވަނަ އަހަރުގެ ސްޓޭޑިއަމްގައި އީދު ނަމާދުގެ ބޮޑު ޖަމާއަތް ނުބޭއްވުނީ މޫސުން ގޯސްވެ، ވާރޭ ވެހުމުގެ ސަބަބުންނެވެ. ވޭތުވެ ދިޔަ ދެ އަހަރު ބޮޑު ޖަމާއަތުގައި އީދު ނަމާދު ނުކުރެވުނީ، ކޮވިޑް ފެތުރެމުން ދިއުމުންނެވެ.
