އެމެރިކާ އާއި ފަލަސްތީނަށް ނިސްބަތްވާ ނޫސްވެރިޔާ ޝީރީން އަބޫ އަކްލެހްގެ ގަޔަށް އެރި ވަޒަން އައީ އިޒްރޭލުގެ ބަޑިއަކުންކަން ޔަގީން ނުކުރެވޭ ކަމަށް އެމެރިކާއިން ބުނެފި އެވެ.
ޝީރީން މަރުވީ މޭ 11 ވަނަ ދުވަހު ހުޅަނގު އައްސޭރީގައި އިޒްރޭލުން ހިންގި އޮޕަރޭޝަނެއް އަލް ޖަޒީރާއަށް ރިޕޯޓު ކުރުމުގެ މަސައްކަތުގައި އުޅެނިކޮށް ކަންފަތާ ދިމާލުން މޫނަށް ބަޑި ޖެހުމުންނެވެ.
އެމެރިކާއިން ވަޒަން ތަހުލީލް ކުރުމަށް ފަހު ބުނީ ޔަގީންކަމާ އެކު ގޮތެއް ނިންމޭ ވަރަށް ވުރެ ބޮޑަށް އެ ވަޒަނަށް ގެއްލުންވެފައިވާ ކަމަށެވެ.
އެހެން ނަމަވެސް ވަޒަން އައީ އޮޅުމެއްގެ ތެރެއިން އިޒްރޭލުގެ ބަޑިއަކުން ކަމަަށް ބޮޑަށް ބުރަވެވޭ ކަމަށް އެމެރިކާގެ ތަހުގީގަށް ފަހު ނިންމި އެވެ.
ފަލަސްތީނުން ބުނާ ގޮތުގައި ޝީރީން މަރާލީ އިޒްރޭލް ސިފައިން ގަސްތުގައި ބަޑި ޖަހައިގެންނެވެ. އެކަމަކު އިޒްރޭލުން މަސައްކަތް ކުރަނީ ޝީރީން މަރުވީ ފަލަސްތީނުގެ "ޓެރަރިސްޓުންގެ" ހަމަލާއަކުން ކަމަށް ދެއްކުމަށެވެ.
ނަމަވެސް އިޒްރޭލުގެ ވާހަކައަށް ބާރު ލިބޭ ހެއްކެއް ނެތް ކަމަށް އދ. ގެ ތަހުގީގުން ވަނީ ނިންމާފަ އެވެ. އދ. ގެ ތަހުގީގުން ދެއްކީ ވަޒަން އައީ އިޒްރޭލް ސިފައިންގެ ބަޑިއަކުން ކަމަށެވެ.
އެހެންވެ، އދ. ގެ އިންސާނީ ހައްގުތަކާ ބެހޭ ވެރިޔާ މިޝޭލް ބެޝެލެޓް ވަނީ އެ މައްސަލައިގައި ޖިނާއީ ތަހުގީގެއް ފެށުމަށް އިޒްރޭލަށް ގޮވާލައްވާފަ އެވެ.
