ބޮޑު އީދާ ގުޅިގެން މި މަހުގެ 10 ވަނަ ދުވަހުން 14 ވަނަ ދުވަހުގެ ނިޔަލަށް ބޭންކުތައް ބަންދުވާނެ ކަމަށް މަރުކަޒީ ބޭންކު އެމްއެމްއޭ ނިންމާފައިވާތީ، ބޭންކިންގެ މުހިންމު ހިދުމަތްތައް މި ހަފްތާގައި ނިންމުމަށް ބޭންކް އޮފް މޯލްޑިވްސް (ބީއެމްއެލް) އިން އެދިއްޖެ އެވެ.
އީދު ބަންދުގެ އެއް ހަފްތާއަށްފަހު، ބޭންކް އަލުން ހުޅުވުމަށް ނިންމާފައިވަނީ މި މަހުގެ 17 ވަނަ ދުވަހެވެ.
"އަޅުގަނޑުމެންގެ އިލްތިމާސަކީ ކަސްޓަމަރުން ހިދުމަތް ހޯއްދެވުމުގައި ދަތިތަކެއް ދިމާނުވާނެހެން ކުރިން ޕްލޭންކޮށް ހިދުމަތްތައްތަކަށް އެދި ހުށަހެޅުއްވުން، ޓީޓީ، ޗެކް ޕޮރެސެސްކުރުމާއި ލޯކަލް ޓްރާންސްފާ ފަދަ މުހިންމު ހިދުމަތްތަކަކަށް މި ވަނީ ސުންގަޑި ކަނޑައެޅިފައި، އެހެން ކަމުން އެ ސުންގަޑީގެ ކުރިން ހިދުމަތަށް އެދި ހުށަހެޅުއްވުމަކީ ވަރަށް މުހިންމު ކަމެއް،" ބީއެމްއެލްގެ ޕަބްލިކް ރިލޭޝަންސް މެނޭޖަރު މުހައްމަދު ސައީދު ވިދާޅުވި އެވެ.
ސައީދު ވިދާޅުވީ ސުންގަޑީގެ ފަހުން ހުށަހެޅޭ ރިކުއެސްޓުތަކާއި ޗެކުތައް ޕްރޮސެސް ކުރާނީ ބަންދަށް ފަހުން ބޭންކު ހުޅުވޭ ދުވަހު ކަމަށެވެ. އީދު ބަންދުގައި ބޭންކިން މުއާމަލާތްތައް ކުރުމަށް ކަސްޓަމަރުން އިންޓަނެޓު ބޭންކިން އާއި މޮބައިލް ބޭންކިންގެ ހިދުމަތް ބޭނުން ކުރެއްވުމަށް ވެސް ސައީދު އެދިވަޑައިގެންނެވި އެވެ.
"ނަގުދު ފައިސާގެ މުއާމަލާތްކުރެއްވުމަށް ރާއްޖޭގެ އެކި ކަންކޮޅުތަކުގައި ގާއިމްކޮށްފައިވާ ސެލްފް ސާވިސް ބޭންކިން ސެންޓަރުތައް މެދުވެރިކޮށް ފައިސާ ޖަމާކުރުމާއި، ފައިސާ ނެގުމާއި ފައިސާ ފޮނުވުމުގެ ހިދުމަތް 24 ގަޑިއިރު ލިބޭނެ،" ސައީދު ވިދާޅުވި އެވެ.
އޭގެ އިތުރުން، މީހުން ދިރިއުޅޭ ރަށްތަކުގައި ގާއިމްކޮށްފައިވާ ކޭޝް އެޖެންޓުން މެދުވެރިކޮށް އަސާސީ ބޭންކިން ހިދުމަތްތައް ވެސް އީދު ބަންދުގެ ދުވަސްތަކުގައި ކަސްޓަމަރުންނަށް ލިބޭނެ ކަމަށް ސައީދު ވިދާޅުވި އެވެ.
ބީއެމްއެލަށް ހުށަހެޅޭ ރިކުއެސްޓުތަކުގެ ތެރެއިން އިންޓަރނޭޝަނަލް ޓްރާންސްފާ ހިދުމަތަށް ލިބޭ ރިކުއެސްޓުތައް އެ ދުވަހެއްގެ މެންދުރުފަހު 1:30 އާ ހަމަޔަށް ލިބޭ ރިކުއެސްޓުތައް އެ ދުވަހަކު ޕްރޮސެސްކުރާނެ އެވެ.
ލޯކަލް ޕޭމަންޓު އަދި ޓްރާންސްފާއި ޕޭރޯލްގެ ހިދުމަތްތަކުގެ ތެރެއިން މެންދުރު 12:00 އާ ހަމައަށް ލިބޭ ހުށަހެޅުންތައް އެ ދުވަހު ނިންމާއިރު، މެންދުރު 02:00 އާ ހަމައަށް ލިބޭ ބީއެމްއެލްގެ ޗެކުތައް ވެސް އެ ދުވަހެއްގައި ޕްރޮސެސް ކުރާނެ އެވެ. އެހެން ބޭންކުތަކުން ލިބޭ ޗެކުތައް އެ ދުވަހަކު ޕްރޮސެސްކުރާނީ ހެނދުނު 11:00 ގެ ކުރިން ހުށަހެޅުމުންނެވެ.
