ބާސެލޯނާ (ޖުލައި 3) - ބާސެލޯނާ އިން މި ފަހަރުގެ ޓްރާންސްފާ މާކެޓްގައި ދޫކޮށްލާނެ ކަމަށް ބެލެވުނު ނެދަލެންޑްސްގެ މިޑްފީލްޑަރު، ފްރެންކީ ޑި ޔޯން ވިއްކައިނުލާނެ ކަމަށް ބާސެލޯނާގެ ރައީސް ޖޮއާން ލަޕޯޓާ ވިދާޅުވެއްޖެ އެވެ.
މިދިޔަ މަހު ނޫސްވެރިންގެ ސުވާލުތަކަށް ޖަވާބު ދެއްވަމުން ލަޕޯޓާ ވިދާޅުވީ ބާސެލޯނާގެ ޒުވާން މިޑްފީލްޑަރު ގަވީ ޓީމުގައި މަޑުކުރާނެ ކަމަށާއި ޑި ޔޯންއާ ބެހޭގޮތުން ވަކި އެއްޗެއް ބުނަން އުނދަގޫ ކަމަށެވެ. އެހެންވެ، އޭރު ބެެލެވިފައި އޮތީ ބާސެލޯނާ އޮތް މާލީ އަޑިގަނޑުން ސަލާމަތްވާން ވިއްކާލާނެ ކުޅުންތެރިއަކީ ޑި ޔޯން ކަމަށެވެ. އެކަމަކު، މިހާރު ބާސެލޯނާ އިން ބުނަމުން އަންނަނީ ޑި ޔޯން ނުވިއްކާނެ ކަމަށެވެ.
ޑި ޔޯން، 25، ގަންނަން އެންމެ ބޮޑަށް މަސައްކަތް ކުރަމުން އަންނަނީ އިނގިރޭސި ގަދަބާރު މެންޗެސްޓާ ޔުނައިޓެޑް އެވެ.
ބާސެލޯނާ ދޫކޮށް އެހެން ކްލަބަކަށް ބަދަލުވާން ބޭނުންނުވާކަން ޑި ޔޯން ހާމަކޮށްފައި ވަނިކޮށް، އެންމެ ފަހު ވަގުތު ބާސެލޯނާގެ ރައީސް ލަޕޯޓާ ވެސް މި ވަނީ ޑި ޔޯން އެ ކްލަބްގައި ދެމިހުންނާނެ ކަމަށް ވިދާޅުވެފަ އެވެ.
"ފްރެންކީ (ޑި ޔޯން) އަކީ ބާސެލޯނާގެ ކުޅުންތެރިއެއް، ދުނިޔޭގެ އެންމެ މޮޅު ކުޅުންތެރިންގެ ތެރޭގައި ޑި ޔޯން ހިމެނޭ، އަހަރެމެންނަށް މެންޗެސްޓާ ޔުނައިޓެޑްގެ އިތުރުން ވެސް ކްލަބްތަކުގެ ހުށަހެޅުންތައް ލިބިފައި އެބައޮތް. އަހަރެމެންނެއް އޭނަ ވިއްކައެއް ނުލާނަން، އަހަރެމެންނަށް އެބައޮތް އޭނަގެ ފަރާތުން ވެސް ބާސެލޯނާގައި ހުންނަން ބޭނުންވާކަން އެނގިފައި،" ލަޕޯޓާ ވިދާޅުވި އެވެ.
ޔުނައިޓެޑްގެ ކޯޗުކަމާ ދާދި ފަހުން ހަވާލުވެ، މި މަހު އެއް ވަނަ ދުވަހު ރަސްމީކޮށް މަސައްކަތް ފަށާފައިވާ ނެދަލެންޑްސްގެ ކޯޗު އެރިކް ޓެން ހާގް ވަނީ ޑި ޔޯންއާ އެކު އަޔަކްސްގައި މަސައްކަތް ކޮށްފަ އެވެ. ޑި ޔޯން އަކީ ޓެން ހާގް، ޔުނައިޓެޑަށް ގެންނަން އެންމެ ބޭނުންވާ ކުޅުންތެރިޔާ އެވެ.
ބާސެލޯނާ އިން މިދިޔަ މަހުގެ ނިޔަލަށް ކްލަބްގެ މާލީ ހާލަތު ރަނގަޅުކުރަން ކުރި މަސައްކަތުގައި ވަނީ މާލީ ކަންކަމަށް ލުޔެއް ހޯދޭނެ ގޮތްތައް މަޝްވަރާކޮށްފަ އެވެ. އެ ގޮތުން ކުރު މުސްތަގުބަލެއްގައި ބޮޑު މާލީ މަންފާއެއް ލިބޭގޮތަށް ސްޕޮންސަޝިޕް ޑީލްތަކެއް ނިންމިއިރު، ބައެއް ކުޅުންތެރިންގެ މުސާރަ ކުޑަކުރަން ޖެހޭނެ ކަމަށް ވަނީ ނިންމައިފަ އެވެ.
ލަޕޯޓާ ވިދާޅުވީ ކްލަބުން ދޭ މުސާރަ ބައެއް ކުޅުންތެރިންގެ ކޮންޓްރެކްޓްގެ ތެރެއިން ރީސްޓްރަކްޗާ ކުރަން ޖެހޭ ކަމަށާއި އޭގެ ތެރޭގައި ޑި ޔޯން ވެސް ހިމެނޭ ކަމަށެވެ.
ނެދަލެންޑްސްގެ ޗެމްޕިއަން، އަޔަކްސް ދޫކޮށް 2019 ވަނަ އަހަރު ޑި ޔޯން ބާސެލޯނާ އަށް ބަދަލުވީ 85 މިލިއަން ޑޮލަރަށެވެ. އެ ފަހަރު ބާސެލޯނާ އަށް ސޮއިކުރަން ޑި ޔޯން ނިންމުމުގެ ކުރިން ވަނީ ޕީއެސްޖީ އާއި މެންޗެސްޓާ ސިޓީ އަދި ޔުނައިޓެޑާ ވާހަކަ ދަައްކައިފަ އެވެ.
