ރާއްޖޭގެ ކަނޑުދަތުރުފަތުރު ކުރުމުގެ ސިނާއަތަށް ހާއްސަކޮށްގެން ބާއްވާ ހަމައެކަނި އިވެންޓު ކަމަށްވާ މޯލްޑިވްސް މެރިން އެކްސްޕޯގެ އަށް ވަނަ އެޑިޝަން އޮންނާނީ އަންނަ އޮގަސްޓު 4 އިން 6 އަށް، ހުޅުމާލޭ ސެންޓްރަލް ޕާކުގަ އެވެ. މިއީ މި ސިނާއަތަށް ހާއްސަކޮށްގެން ރާއްޖޭގައި އެންމެ ގިނަ ދުވަސް ވަންދެން ބާއްވަމުން އަންނަ އިވެންޓެވެ.
މޯލްޑިވްސް މެރިން އެކްސްޕޯއަކީ ސަފާރީ ސިނާއަތުގެ ވިޔަފާރިވެރިންގެ ޖަމިއްޔާ ނޭޝަނަލް ބޯޓިން އެސޯސިއޭޝަން އޮފް މޯލްޑިވްސް (އެންބީއޭއެމް)ގެ ރަސްމީ އިވެންޓެވެ. މިއަހަރުގެ އެކްސްޕޯ އަކީ ކުރީ އަހަރުތަކާ އަޅާބަލާއިރު މާ ބޮޑުކޮށް އަދި ތަފާތުކޮށް ބާއްވަން ނިންމާފައިވާ އެކްސްޕޯއެކެވެ.
މިފަހަރުގެ އެކްސްޕޯގައި ވެސް ވިޔަފާރިތައް އެގްޒިބިޓް ކުރާނެ ސްޓޯލްތަކާއި، ބޯޓުތައް ދައްކާލަން ހާއްސަ ސަރަހައްދެއްގެ އިތުރުން މައުލޫމާތު ދިނުމުގެ ސެމިނާތަކާއި ވޯކްޝަޕްތައް ކުރިއަށް ދާނެ އެވެ.
އަދި، ކަނޑު އުޅަނދުފަހަރާއި، އެ އުޅަނދުތަކަށް ބޭނުންވާ ތަފާތު އާލާތްތައް ވިއްކާ ވިޔަފާރިތަކުގެ އިތުރުން، މި އުޅަނދުތަކަށް ތަފާތު ހިދުމަތްދޭ އިންޝުއަރެންސާއި ލޮޖިސްޓިކްސް ވިޔަފާރިތަކުން ވެސް އެކްސްޕޯގައި ބައިވެރިވާނެ އެވެ.
ކުރިން ބޭއްވި އެކްސްޕޯތަކަށް ބަލާއިރު، ގިނަ ވިޔަފާރިތަކުން ޕްރޮޑަކްޓް ލޯންޗުކުރަން އެކްސްޕޯ ބޭނުންކޮށްފަ އެވެ. އަދި އެކްސްޕޯގެ ތެރެއިން ކުރިޔަށް ގެންދިޔަ ސެމިނާތަކުގެ ޒަރިއްޔާއިން ދާއިރާގައި ހުރި މައްސަލަތަކާއި ގޮންޖެހުންތައް ސަރުކާރުގެ ސަމާލުކަމަށް ގެންނަން ވެސް ބޭނުން ކުރި އެވެ.
ރާއްޖޭގެ މެރިން އިންޑަސްޓްރީއަށް ބޮޑެތި ކުރިއެރުންތަކެއް މިދިޔަ މަދު އަހަރުތަކުގެ ތެރޭގައި ވަނީ ލިބިފަ އެވެ. އެގޮތުން، ބައިނަލްއަގްވާމީ ބޮޑެތި ލަގްޒަރީ ބްރޭންޑުތައް ރާއްޖެ އަށް އައިސް ވިޔަފާރި އަންނަނީ ފުޅާކުރަމުންނެވެ. އެހެންކަމުން، މިއަހަރުގެ މެރިން އެކްސްޕޯގައި މަޝްހޫރު ގިނަ ބްރޭންޑުތަކެއް ފެނިގެންދާނެ އެވެ.
އެކްސްޕޯގެ ސްޕޮންސަރުންނަކީ ކޮބާ؟
- އެމްޓީސީސީ - މެއިން ސްޕޮންސާ
- ގަލްފް ކްރާފްޓް - ކޯ-ސްޕޮންސާ
- ޖަލްބޫތު މޯލްޑިވްސް
- ދަ ހޯކްސް - އޮފިޝަލް ފިއުލް ޕާޓްނާ އަދި ޕްރީމިއަމް ސްޕޮންސާ
- އަލް ޝާލީ މެރިން މޯލްޑިވްސް - އޮފިޝަލް ބޯޓް ބިލްޑާ
- މާކިއުރީ މެރިން އިންޖީންސް ބައި ހަސަން މެރިން އިންޖިނިއަރިން ސޮލިއުޝަންސް - އޮފިޝަލް ޕްރޮޑަކްޓް
- ހޮންޑާ މެރިން ބައި މެރިން ވައިބް - އޮފިޝަލް މެރިން އިންޖީން
- ވިލާ ހަކަތަ - އޮފިޝަލް ލުބްރިކަންޓް
- ސީގިއާ - އޮފިޝަލް ވޯޓާ ސްޕޯޓްސް ޕާޓްނަރު
- އެލައިޑް އިންޝޫރެންސް - އޮފިޝަލް އިންޝޫރެންސް ޕާޓްނަރު
- ގޯ ލޮޖިސްޓިކްސް - އޮފިޝަލް ލޮޖިސްޓިކްސް ޕާޓްނަރު
- އޯޝަންމާސްޓާ ބައި ދަމާސް - އޮފިޝަލް މެރިން ޕެއިންޓް
މި އިވެންޓުގެ އެކްސްކްލޫސިވް ލޯކަލް މީޑިއާ ޕާޓްނަރަކީ "އަދަދު" އެވެ. އަދި، މިއަހަރުގެ އެކްސްޕޯގެ ވެސް އޮފިޝަލް ހޯސްޓް ޕާޓްނަރަކީ ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) އެވެ.
އެކްސްޕޯގައި ރެޖިސްޓްރީ ވާނީ ކިހިނެއް؟
އެކްސްޕޯގައި އެގްޒިބިޓަރުންގެ ގޮތުގައި ބައިވެރިވާން ޝައުގުވެރިކަން ހުރި ފަރާތްތަކަށް މިހާރު އެފުރުސަތު ވަނީ ހުޅުވާލާފަ އެވެ. އެގޮތުން، އެކްސްޕޯގެ އީމެއިލަށް ތަފްސީލުތައް ފޮނުވައިގެން ނުވަތަ 7997974 ނަންބަރަށް ގުޅައިގެން މިހާރު ރެޖިސްޓްރޭޝަން ފުރިހަމަ ކުރެވޭނެ އެވެ.
މި އަހަރުގެ އެކްސްޕޯގެ އިވެންޓް މެނޭޖަރަކީ މީޑިއަމް ޕްރައިވެޓް ލިމިޓެޑެވެ.
