އިރާނުގެ ދެކުނު ހޮރްމޮޒްގާން ޕްރޮވިންސަށް އައި ބާރުގަދަ ބިންހެލުމެއްގައި ފަސް މީހުން މަރުވެ، 50 އަށް ވުރެ ގިނަ މީހުންނަށް އަނިޔާވެއްޖެ އެވެ.
ބިންހެލުން އައީ ހޮނިހިރު ދުވަހު މެންދުނު 02:00 ހާއިރު އައްސޭރިފަށާ ކައިރިން، ޕްރޮވިންސްގެ ވެރިރަށް ބަންދާރް އައްބާސްއާ 100 ކިލޯމީޓަރު ހުޅަނގު ދެކުނުންނެވެ.
ދައުލަތުގެ މީޑިއާއިން ބުނީ ފުރަތަމަ އައި 6.0 މެގްނިޓިއުޑް ބިންހެލުމުގައި ފަސް މީހުން މަރުވި ކަމަށާއި އޭގެ ފަހުން ބާރުގަދަ ދެ ލޮޅުން އެރި ކަމަށެވެ.
އެ ސަރަހައްދުގައި އޮންނަ ސަޔޭހް ހޯޝް އަވަށް ސުންނާފަތިވެފައިވާ ކަމަަށް އޮފިޝަލުން ބުނެ އެވެ. ފަހުން އައި ދެ ލޮޅުމުގައި މީހުން މަރު ނުވީ، ގެތަކުން ނުކުމެ ތިބުމުން ކަމަށް އޮފިޝަލުން ބުންޏެވެ.
ގެދޮރު ގެއްލުނު މީހުނަށް ވަގުތީ ހިޔާ އާއި ފެން އަދި ކާބޯތަކެއްޗާ އެހެނިހެން އެހީ ފޯރުކޮށްދިނުމުގެ މަސައްކަތް ދަނީ ކުރަމުންނެވެ.
އެ ބިންހެލުމުގެ އަސަރު ޔޫއޭއީ އާއި ގަލްފްގެ އެހެން ބައެއް ގައުމުތަކަށް ކުރި ކަމަށް ރިޕޯޓުތައް ބުނެ އެވެ.
މިދިޔަ މަހު އިރުމަތީ އަފްގާނިސްތާނުގެ ފަރުބަދަ މަތީ ސަރަހައްދެއް ކަމަށްވާ ޕަަކްތިކާއަށް އައި ބިންހެލުމުގައި 1،000 އަށް ވުރެ ގިނަ މީހުން މަރުވި އެވެ.
