މޫސުން ގޯސްވެ، ރާއްޖޭގެ ގިނަ ރަށްތަކަކަށް އުދަ އަރަމުންދާ މި ދަނޑިވަޅުގައި އަވައްޓެރި ސްރީ ލަންކާގެ އެންމެ ދެކުނުގަައި އޮންނަ ގޯލް ސަރަހައްދަށް ވެސް އުދައިގެ އަސަރުކޮށްފި އެވެ.
ލަންކާގެ ނޫސްތަކުން ބުނީ ގޯލްގެ އައްސޭރިފަށުން އޮންނަ މައި މަގު، ގޯލް ރޯޑަށް ރާޅު އަރާފައިވާ ކަމަށެވެ. އެ މަންޒަރު ފެންނަ ވީޑިއޯ ވެސް ސޯޝަލް މީޑިއާގައި ވަނީ އާއްމުވެފަ އެވެ.
ރާޅުތަކުގެ އަސަރު މަގުތަކަށް ކުރަމުން ދާތީ ބައެއް ހިސާބުތައް ބަންދު ކުރަން ޖެހުނެވެ. ކުރިއަށް އޮތް 24 ގަޑިއިރު ވެސް ލަންކާގެ މޫސުން ގޯސް ވާނެ ކަަމަށް ބެލެވެ އެވެ.
އެގޮތުން ޕުއްޓަލަމް، ކޮލޮމްބޯ، ގޯލް އަދި ހަމްބަންޓޯޓާގައި ގަޑިއަކު 60-70 މޭލު ބާރުމިނުގައި ވައި ޖެހޭނެ ކަމަށް ލަފާކޮށްފައިވެ އެވެ. މަސްވެރިކަމާއި އެހެނިހެން ބޭނުންތަކަށް ކަނޑަށް ނުކުމެ އުޅޭ މީހުން ސަމާލުވާން ވަނީ އަަންގާފަ އެވެ.
ލަންކާގެ މޫސުމާ ބެހޭ އިދާރާއިން ވަނީ ހޮނިހިރު ދުވަހު ހަވީރުން ފެށިގެން އާދީއްތަ ދުވަހުގެ ހަވީރާ ހަމައަށް އެ ސަރަހައްދުތަަކަށް ރަތް އެލާޓް ނެރިފަ އެވެ.
