އުރީދޫ ދިވެހި ޕްރިމިއާ ލީގުގައި މިރޭ ފަހަތުން އަރައި ސުޕަ ޔުނައިޓެޑް ސްޕޯޓްސް (ސަސް) 2-1 އިން ބަލިކޮށް، ކްލަބް ވެލެންސިއާ ލީގުގެ ތިން ވަނަ އަށް ޖެހިލައިފި އެވެ.
ވެލެންސިއާ ތިން ވަނަ އަށް އެރީ 15 މެޗުން 22 ޕޮއިންޓް ހޯދައިގެންނެވެ. ހަތަރު ވަނައިގައި އޮތް ޓީސީ ސްޕޯޓްސް ކްލަބާއި ފަސް ވަނައިގައި އޮތް ޔުނައިޓެޑް ވިކްޓަރީ އަށް ވަނީ 15 މެޗުން 20 ޕޮއިންޓް ލިބިފަ އެވެ. ހަ ވަނައިގައި ކްލަބް ގްރީން ސްޓްރީޓްސް އޮތީ 15 މެޗުން 17 ޕޮއިންޓާ އެކު އެވެ. ހަތް ވަނައިގައި އޮތް ސަސް އަށް ވަނީ 15 މެޗުން 14 ޕޮއިންޓް ލިބިފަ އެވެ. ފުލުގައި އޮތް ދަ ގްރާންޑޭ އަށް ވަނީ 15 މެޗުން ޕޮއިންޓެއް ލިބިފަ އެވެ.
ލީގުގެ އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނަށް 15 މެޗުން 42 ޕޮއިންޓް ލިބިފައިވާއިރު، ދެ ވަނައިގައި އޮތް ކްލަބް އީގަލްސް އަށް ވަނީ 15 މެޗުން 37 ޕޮއިންޓް ލިބިފަ އެވެ.
ގަލޮޅު ދަނޑުގައި މިރޭ ކުޅުނު މެޗު ފަށައިގެން މާގިނައިރެއް ނުވެ، ސަސްގެ ފޯވާޑް، އަލީ ނަސޫހު ރަޝީދު (ޕިލާ) އަށް އޭރިއާތެެރެއިން ކުރި ފައުލަކަށް ސަސް އިން ޕެނަލްޓީ އަކަށް އެޕީލްކުރި ނަމަވެސް ރެފްރީ، ސިނާން ހުސެއިން ނިންމީ ޕެނަލްޓީއެއް ނޫން ކަމަށެވެ.
ސަސްގެ ޕިލާ ކައިރިން ވެލެންސިއާގެ ބިޗަޑް ބޯޅަ ހިފައިގެންދާން މަސައްކަތް ކުރަނީ.--- ފޮޓޯ: އިމޭޖަސް.އެމްވީ
ސަސް އިން ވަނީ މެޗުގެ ނުވަ ވަަނަ މިނިޓްގައި ލީޑުނަގައިފަ އެވެ. ކޯނަރަކުން މުހައްމަދު ސާމިރު ނެގި ބޯޅަ ވެލެންސިއާ ކުޅުންތެރިއަކު ގައިގައިި ޖެހިފައި ސާމިރަށް ދެ ވަނަ ފަހަރަށް ލިބުމުން މި ފަހަރު އޭނާ ނެގި ހުރަހުން ގޯލު ކުރިމައްޗަށް އައި ބޯޅަ އަހުމަދު އައިހަމް ވަނީ އެއް ފަހަރުން ގޯލުގެ ތެރެއަށް ބޯޅަ ފޮނުވާލައިފަ އެވެ.
ވެެލެންސިއާ އިން ބޯޅަ ހިފަހައްޓައިގެން ސަސްގެ ހާފުގެ ތެރޭގައި ކުޅެމުންދިޔައިރު، މެޗުގެ 26 ވަނަ މިނިޓްގައި ރަނގަޅު ދެ ހަމަލާ ފޮނުވާލި އެވެ. އޭރިއާތެރެއިން ވެެލެންސިއާގެ އަސްހަދު އަލީ (އަޑޭ) ޖެހި ބޯޅަ ސަސްގެ ކީޕަރު މުހައްމަދު ޝަފީއު (ޗެކް) އަތުގައި ޖެހިފައި ރީބައުންސް ބޯޅަ ވެލެންސިއާގެ ހަލީލް ޖަމާލަށް ލިބުމުން ޖެހި ޝޮޓް ވެސް އަމާޒުވީ ކީޕަރު ޗެކް އަތަށެވެ.
މެޗުގެ 36 ވަނަ މިނިޓްގައި ވެލެންސިއާގެ އަބްދުﷲ މިދުހަތު ފަހުމީ (ބިޗަޑް) ނެގި ހުރަހަކުން އަޑޭ ވަނީ ބޮލުން ގޯލެއް ޖަހައިފަ އެވެ. އެކަމަކު، އެ ގޯލު ޖެހިއިރު، އަޑޭ ހުރީ އޮފްސައިޑްގައި ކަމަށްވާތީ އެ ލަނޑު ބަލައިނުގަނެ އެވެ.
ދެ ވަނަ ހާފްގެ ކުޅުން ފެށިގެން ފަސް މިނިޓް ތެރޭ ވެލެންސިއާ އިން އެއްވަރުކުރި އެެވެ. މެޗުގެ 50 ވަނަ މިނިޓްގައި ވެލެންސިއާގެ އިސްމާއިލް އީސާ (މެސީ) ނެގި ކޯނަރަކުން އަމްދާން އަލީ (އެންޑީ) ބޮލުން ޖައްސާލުމުން، ކުޑަ އޭރިއާތެރޭގައި ހުރެފައި ހަލީލް ވަނީ ބޯޅަ ގޯލަށް ފޮނުވާލައިފަ އެވެ.
ވެލެންސިއާ އަށް ލީޑުނަގައިދިނީ ބަދަލަކަށް ކުޅެން އެރި އަބްދުﷲ ޔާމީން (ޔާނު) އެވެ. މެޗުގެ 55 ވަނަ މިނިޓްގައި އީސަ ގޯލު ކުރިމައްޗަށް ހުރަސްކޮށްލި ބޯޅަ ޔާނު ވަނީ ވެއްޓިގެންފައި ގޯލަށް ބޯޅަ ފޮނުވާލައިފަ އެވެ.
ސަސް އިން ބަދަލުތަކެއް ގެނެސްގެން ނަތީޖާ ހަމަހަމަކުރަން ކުރި މަސައްކަތުގައި މެޗުގެ 89 ވަނަ މިނިޓްގައި އިބްރާހިމް އަތީގް ހަސަން (އިއްބެ) އަށް ވަނީ ރަނުގެ ފުރުސަތެއް ލިބިފަ އެވެ. ޕިލާ ގޯލު ކުރިމައްޗަށް ހުރަސްކޮށްލި ބޯޅަ އިއްބެ ފޮނުވާލި ނަަމަވެސް ވެލެންސިއާގެ ކީޕަރު މުހައްމަދު ފައިސަލް ވަނީ މަތަކޮށްފަ އެވެ.
ވެލެންސިއާ އިން ވަނީ ސީޒަނުގައި ސަސްއާ ދެކޮޅަށް ކުޅުނު ފުރަތަމަ ދެ މެޗުން މޮޅުވެފަ އެވެ. އެއީ ޕްރެޒިޑެންޓްސް ކަޕާއި ލީގުގެ ފުރަތަމަ ބުރުގަ އެވެ. އެކަމަކު، ލީގުގެ ދެ ވަނަ ބުރުގައި ސަސް އިން ވެލެންސިއާ ބަލިކުރި އެވެ. މިރޭ ސަސް އިން ފުރަތަމަ ލީޑުނެގި ނަމަވެސް ވެލެންސިއާ އިން ވަނީ ހިތްވަރު ދައްކައި ކާމިޔާބު ހޯދައިފަ އެވެ.
ލީގުގެ މެޗުތައް ދެން އޮންނާނީ އަންނަ ބުދަ ދުވަހު އެވެ.
