ސައޮ ޕައޮލޯ، ބްރެޒިލް (ޖުލައި 2) - ނޭމާ މި ފަހަރުގެ ޓްރާންސްފާ މާކެޓްގައި ޕީއެސްޖީ ދޫކޮށްލުމުގެ ވިސްނުމެއް ނުގެންގުޅޭ ކަމަށް ބްރެޒިލާއި ފްރާންސްގެ މީޑިއާތަކުން ރިޕޯޓްކޮށްފި އެވެ.
މީގެ ފަސް އަހަރު ކުރިން 2017 ވަނަ އަހަރު، ދުނިޔޭގެ ރެކޯޑް ފީއެއް ކަމަށްވާ 234 މިލިއަން ޑޮލަރަށް ބާސެލޯނާ ދޫކޮށް ޕީއެސްޖީ އަށް ސޮއިކުރި ނޭމާ މި ވަގުތު އެ ކްލަބާ އެކު ކޮންޓްރެކްޓްގައި ހުރީ 2025 ވަނަ އަހަރުގެ ޖޫން މަހުގެ ނިޔަލަށެވެ.
އެކަމަކު، ނޭމާއާ ބެހޭގޮތުން ދާދި ފަހުން ނޫސްވެރިންގެ ބައްދަލުވުމެއްގެ ތެރެއިން ޕީއެސްޖީގެ ރައީސް ނާސިރު އަލް-ހެއްލާފީ ދެއްކި ވާހަކަތަކެއްގެ ސަބަބުން ނޭމާ ހުރީ ހިތްހަމަނުޖެހިފަ އެވެ. އެހެންވެ، ނޭމާ, އިޓަލީގެ ޔުވެންޓަސް އަށް ބަދަލުވާން މަޝްވަރާކުރި ކަމަށް މީޑިއާތަކުން ރިޕޯޓްކުރި އެވެ.
ނޭމާ، ޕީއެސްޖީ ދޫކޮށްލައިފިނަމަ އޭނާ އިނގިރޭސި ޕްރިމިއާ ލީގުގެ ޗެލްސީ އަށް ގެންނަން މަސައްކަތް ކުރާނެ ކަމަށް އެ ޓީމަށް ކުޅޭ ބްރެޒިލްގެ ތަޖުރިބާކާރު ޑިފެންޑަރު ތިއާގޯ ސިލްވާ ވަނީ ބުނެފަ އެވެ. ތިއާގޯ ސިލްވާ ވަނީ ނޭމާއާ އެކު ޕީއެސްޖީ އަށް ކުޅެފަ އެވެ. އަދި ބްރެޒިލް ގައުމީ ޓީމުގައި ތިއާގޯ ސިލްވާއާ އެންމެ ގާތް ގުޅުމެއް އޮންނަ ކުޅުންތެރިންގެ ތެރޭގައި ނޭމާ ހިމެނެ އެެވެ.
މީޑިއާގައި ޗެލްސީ އާއި ޔުވެންޓަސް އަށް ނޭމާ ދާން އުޅޭ ކަމަށް ވާހަކަ ދެކެވުނު ނަމަވެސް ނޭމާގެ ވިސްނުން ހުރީ މި ފަހަރުގެ ޓްރާންސްފާގައި ކްލަބް ބަދަލުނުކޮށް މަޑުކުރުމަށެވެ. ބްރެޒިލްގެ މީޑިއާތަކުން ރިޕޯޓްކުރާގޮތުގައި ނޭމާ އެންމެ އަވަހަށް ވެސް ކްލަބް ބަދަލުކުރާނީ މި އަހަރު ފަހުކޮޅު ގަތަރުގައި ބާއްވާ ވޯލްޑް ކަޕަށް ފަހު އެވެ.
ފްރާންސްގެ މީޑިއާ ރިޕޯޓްތައް ބުނާގޮތުން ޕީއެސްޖީއާ އެކު އެންމެ ފަހުން ނޭމާ ސޮއިކުރި ކޮންޓްރެކްޓްގައިވާ ވަކި މާއްދާ އަކަށް ބެލުމަށް ފަހު އޭނާ ކޮންޓްރެކްޓް އާ ކުރުމުގެ ފުރުސަތު ވެސް އެބައޮތެވެ. ލޯޔަލްޓީ ބޯނަހެއް ލިބޭގޮތަށް ނޭމާ މިހާރު ހުރި ކޮންޓްރެކްޓް 2027 ވަނަ އަހަރުގެ ޖޫންގެ ނިޔަލަށް އާ ކުރެވޭނެ އެވެ.
ނޭމާ، 30، މި ވަގުތު ހުރީ އަހަރަކު، 30 މިލިއަން ޑޮލަރުގެ މުސާރަ އަކަށެވެ. އެހެން ކްލަބަކުން އޭނާ ގެންދަން ބަލާއިރު، ދިމާވާ ގޮންޖެހުމަކީ އެ ވަރުގެ މުސާރައެއް ދެވެން ނެތުމެވެ.
ޕީއެސްޖީ އަށް ކުޅެދިން 144 މެޗުން ނޭމާ ވަނީ އެ ޓީމަށް 100 ގޯލު ޖަހައި، 60 ގޯލު ޖަހަން ފުރުސަތު ތަނަވަސްކޮށްދީފަ އެވެ. މީގެ ތެރެއިން މިދިޔަ ސީޒަނު ލީގުގައި ޖެހުނީ 13 ގޯލެވެ. ކުޑަހުޅަށް ލިބުނު އަނިޔާއެއްގެ ސަބަބުން މިދިޔަ އަހަރުގެ ޑިސެމްބަރު މަހުން ފެށިގެން މި އަހަރު މާޗް މަހާ ހަމައަށް ނޭމާ ހުރީ ކުޅުމާ ދުރުގަ އެވެ.
