ގދ. މަޑަވެއްޔާއި ގދ. ހޯޑެއްދޫ ގުޅާލުމަށް ހަދާފައިވާ ކޯޒްވޭ އަނެއްކާވެސް ކަނޑާލައިފި އެވެ.
މީގެ ކުރިންވެސް ދެ ފަހަރެއްގެމަތިން ވަނީ މި ކޯޒްވޭ ކަނޑާލާފަ އެވެ. ފުރަތަމަ ކަނޑާލީ 2018 ވަނަ އަހަރު އެވެ. ދެވަނަ ފަހަރަށް ކޯޒްވޭ ކަނޑާލީ މިދިޔަ އަހަރު އޮގަސްޓް މަހު އެވެ.
އެ ދެފަހަރު ވެސް އެ ކޯޒްވޭ ކަނޑާލާފައި ވަނީ ރަށު ރައްޔިތުންގެ ތެރެއިން ބަޔަކުނިކުމެ އެ ކޯޒްވޭގެ ސަބަބުން ހޯޑެއްދޫއަށް ރާޅު އަރައި ގެއްލުންވަމުންދާތީ ކަމަށް ބުނެ އެވެ. އަދި ތިމާވެއްޓަށް ބޮޑެތި ގެއްލުން ލިބޭ ކަމަށް ބުނެ އެވެ.
މަޑަވެލި ކައުންސިލްގެ ރައީސް ފިޔާޒް ހަސަން "އަދަދު" އަށް ވިދާޅުވީ ދެ ރަށް ގުޅާލުމަށް އަޅާފައިވާ ކޯޒްވޭގެ މަޑަވެއްޔާ ދިމާލުން ކަނޑާލާފައިވާ ކަމަށް މައުލޫމާތު ލިބިފައިވާ ކަމަށެވެ.
ފިޔާޒް ވިދާޅުވީ އެކަން ކުރީ ކޮން ބަޔަކުކަން އަދި އެނގިފައި ނުވާ ކަމަށާއި ނަމަވެސް އެގޮތަށް އެތަން ކަނޑާލީ، އުދަ އަރާ ލިބޭ ގެއްލުން ބޮޑު ކަމުން ކަމަށް ވެދާނެ ކަމަށެވެ.
"ކޯޒްވޭ އަޅާފަ އިންނަނީ ރަށް ހިމާޔަތް ކުރުމުގެ ބޭނުމުގައި. ކޯޒްވޭއިނަސް ފެން ދައުރުވާލެއް ކުޑަކަމުން ދެ ރަށަށްވެސް ރާޅު އެރުން ކުޑަ ކުރުމަށް ކަމަށް އެ ކަނޑާލަނީ. އަޅުގަނޑަށް ލަފާކުރެވެނީ. އޭގެ ސަބަބުން ރަށަށް ރާޅުއެޅުންފަދަ ގެއްލުންތައް ލިބިދާނެ ކަމަށް ކަންނޭނގެ އެއީ،" ފިޔާޒް ވިދާޅުވި އެވެ.
ކޯޒްވޭގެ މައްސަލަ ބޮޑުވެ, އެއް ފަޅެއްގައި އޮންނަ ގދ. މަޑަވެލި, ހާދޫ އަދި ހޯޑެއްދޫ ބްރިޖަކުން ގުޅާލަން އެމްޓީސީސީއާ ވަނީ ހަވާލުކޮށްފަ އެވެ.
މި މަޝްރޫއު އެމްޓީސީސީއާ ހަވާލުކޮށްފައި ވަނީ 300 ދުވަހުގެ ތެރޭގައި ނިންމާ ގޮތަށް 84.2 މިލިއަން ރުފިޔާއަށެވެ. އެ މަޝްރޫއުގެ ދަށުން 223 މީޓަރުގެ ބްރިޖަކުން މަޑަވެއްޔާއި ގދ. ހާދޫ އަދި 160 މީޓަރުގެ ބްރިޖަކުން ހާދޫ އާއި ހޯޑެއްދޫ ގުޅާލާނެ އެވެ. އަދި 263 މީޓަރުގެ އެ ބްރިޖުގެ މަގު ހެދުމާއި 65 މީޓަރުގެ ހަތަރު ރިވެޓްމަންޓް ހަދާނެ ކަމަށް ޕްލޭނިން މިނިސްޓްރީން ބުންޏެވެ.
މިނިސްޓްރީން ބުނީ މިފަހަރު ހަދާ ބްރިޖު ޑިޒައިން ކޮށްފައި ވަނީ ކޮލަމްތަކަށް ސަޕޯޓްކޮށް ބްރިޖުގެ ދަށުން އޮއި ދެމޭ ގޮތަށް ކަމަށެވެ.
