ރާއްޖެ އަށް ޓޫރިޒަމް ތައާރަފު ކުރުމަށް އިސް ދައުރެއް އަދާކުރެއްވި ޖޯޖް ކޯބިން، މިދިޔަ ފެބްރުއަރީ މަހު ރާއްޖެ އަށް ކުރެއްވި ކުރު ޒިޔާރަތުގައި، މަސް ބާނަން ޝައުގު ވެރިވާ އެމެރިކާ މީހުންނަށް ރާއްޖެ އަކީ މުހިންމު މާކެޓަކަށް ހެދިދާކަން ފާހަގަ ކުރެއްވި އެވެ. ކޯބިންގެ ޕްލޭނެއް އެބަ އޮތެވެ.
ރާއްޖެ އަށް އެންމެ ފުރަތަމަ ޓޫރިސްޓުން ގެނައި ކޯބިން ވަނީ ލަކްޝަދީޕަށް ވެސް ޓޫރިޒަމް ތައާރަފުކޮށްދީފަ އެވެ. މިހާރު އެމެރިކާގަ ދިރިއުޅުއްވާ ކޯބިން ވަނީ ޔަމަން އަދި ސައުދީ އެރެބިޔާ ފަދަ ގައުމުތަކަށް ޓޫރިޒަމް ފުޅާ ކުރުމުގައި ވެސް ހިއްސާވެފަ އެވެ.
ކޯބިން ވިދާޅުވި ގޮތުގައި އެމެރިކާ އަށް ރާއްޖެ އިސްތިހާރުވެފައި އޮންނަނީ، ހަނީމޫނަށް ހާއްސަ އަގުބޮޑު މަންޒިލެއްގެ ގޮތުގަ އެވެ. އޭނާ ދެކެވަޑައިގަންވާ ގޮތުގައި ރާއްޖެ އަކީ އެމެރިކާގެ 40 މިލިއަނަށްވުރެ ގިނަ ޓޫރިސްޓުންގެ ތެރޭގައި ހިމެނޭ، ދޮށިން މަސް ބާނަން ޝައުގު ހުންނަ މީހުންނާއި ޑައިވަރުންނަށް ވެސް މަގުބޫލު މާކެޓަކަށް ހެދިދާނެ އެވެ.
"މަސް ބާނާ 60 މިލިއަށް މީހުން، ހަތަރު މިލިއަން ޑައިވަރުން އެމެރިކާގައި އެބަތިބި، އެމީހުން ރާއްޖެ ގެނެވޭނެ، އެކަން ކުރެވޭނީ ގުޅިގެން މަސައްކަތެއް ކޮށްގެން، އެކަމުގެ ތަޖުރިބާ އަހަރެންގެ އެބަހުރި، އަހަރެން މިހުރީ އެކަން ކޮށްދޭން ބޭނުންވެފައި،" އެމެރިކާގައި ހުންނަވާ "އަދަދު" އަށް ދެއްވި އިންޓަވިއުއެއްގައި ކޯބިން ވިދާޅުވި އެވެ.
އޭނާ ވިދާޅުވި ގޮތުގައި ފެބްރުއަރީ މަހު ރާއްޖެ އައުމުގެ އެއް ބޭނުމަކީ ވެސް އެއީ އެވެ. އިވެންޓްތައް ގިނަވުމުން އެކަމަކަށް އެފަހަރު ވަގުތު ނުލިބުނީ ކަމަށް އޭނާ ބުންޏެވެ. މި އަހަރުގެ އޮކްޓޫބަރު މަހު ރާއްޖެ އައިސް، ޓޫރިޒަމް ދާއިރާގެ އެސޯސިއޭޝަން ތަކާއި މަޝްވަރާކޮށް ޕްލޭނެއް އެކުލަވާލުމުގެ އުއްމީދު އެބަ އޮތް ކަމަށް އޭނާ ވިދާޅުވި އެވެ.
"ހުރިހާ އެސޯސިއޭޝަންތައް ގުޅިގެން މަސައްކަތް ކޮށްފިއްޔާ ވަރަށް ބޮޑު އަސަރެއް ފެންނާނެ، އެމެރިކާ މީހުން އާ މަންޒިލުކަތަކަށް އަބަދުވެސް ބަލާ،" އޭނާ ވިދާޅުވި އެވެ. "އަހަރަކު އެއް ފަހަކަ ނޫނީ ދެ ފަހަރު، އެޑިއުކޭޝަނަލް ޓުއާ އެއް ރާއްޖެ އަށް އިންތިޒާމު ކުރެވެން ވާނެ."
ކޯބިން ވިދާޅުވީ އެމެރިކާ އަކީ ރާއްޖެ އާ ދުރުގައި އޮތް ގައުމަކަށް ވިއަސް، ރާއްޖެއާ މެދު މަގުބޫލުކަން އިތުރުކޮށް، ރާއްޖެ އަށް ގިނަ މީހުން އަންނަން ފެށުމުން، ދަތުރުފަތުރު ވެސް އިންތިޒާމު ވެގެން ދާނެ ކަމަށެވެ. ކޯބިން ގަބޫލުކުރާ ގޮތުގައި އަހަރަކު ދެ މިލިއަން ޓޫރިސްޓުންނަށްވުރެ ދަށުގެ އަދަދަކީ ރާއްޖެ އަށް މާ މަދު އަދަދެކެވެ.
