ސްރީލަންކާގެ އިގްތިސާދީ ކާރިސާއިން އަރައިގަންނަން ޖަޕާނުން އެހީ ވާން ދެކޮޅު ހަދާފައިވާ ކަމަށް ފެތުރުނު ހަބަރުތައް ލަންކާގެ ބޮޑު ވަޒީރުގެ މީޑިއާ ޑިވިޝަނުން ދޮގުކޮށްފި އެވެ.
ޖަޕާން އެމްބަސީގެ ޑެޕިއުޓީ ހެޑް އޮފް މިޝަން ކޮތަރޯ ކަތްސުކީ ވިދާޅުވީ ޖަޕާނުގެ ސަފީރާ ހަވާލަދީ ފަތުރަމުން ދަނީ މުޅިން ދޮގު ހަބަރެއް ކަމަށެވެ.
ލަންކާ ބޮޑު ވަޒީރުގެ މީޑިއާ ޑިވިޝަނުން ވެސް އެ ހަބަރުތައް ދޮގު ކުރުމަށް ފަހު ބުނީ، ޖަޕާނުގެ އެމްބަސީއިން ވެސް އެ ވާހަކ ދޮގުކުރާ ކަމަށެވެ.
ޑެއިލީ މިރާ ނޫހުން ހުކުރު ދުވަހު ރިޕޯޓު ކުރި ގޮތުގައި ޖަޕާނުގެ ސަފީރު މިޒުކޮޝީ ހިދިއަކީ ވަނީ ޓެމިލް ނޭޝަނަލް އެލަޔަންސް (ޓީއެންއޭ) ގެ ވެރިންނާ ބުރާސްފަަތި ދުވަހު ބައްދަލުކުރައްވާފަ އެވެ.
މި ވަގުތު މާލީ ގޮތުން ލަންކާއަށް އެހީވުމުން ފައިސާ ރަނގަޅަށް މެނޭޖް ނުކުރުމުގެ ނުރައްކާ ބޮޑުވުމުން، ލަންކާއަށް އެހީވެވެން ނެތް ކަމަށް ސަފީރު ވިދާޅުވި ކަމަށް އެ ނޫހުން ބުންޏެވެ.
ލަންކާ ސަަރުކާރާއި ޖަޕާނު އެމްބަސީއިން އެ ވާހަކަ ދޮގުކޮށްފައިވާ އިރު، ސަފީރު ވަނީ ހުކުރު ދުވަހު ރައީސް ގޮތަބަޔާ ރާޖަޕަކްސައާ ބައްދަލުކުރައްވާފަ އެވެ.
އެ ދެ ބޭފުޅުން ބައްދަލުކުރެއްވީ ޑެއިލީ މިރާ ނޫހުން ފެތުރި ހަބަރާ ގުޅިގެން ކަމެއް ސާފެއް ނޫނެވެ.
ރައީސްގެ މީޑިއާ ޑިވިޝަނުން ބުނީ ޖަޕާނުން މެދުކެނޑުމެއް ނެތި ލަންކާއަށް އެހީ ވާން ތައްޔާރަށް އޮތް ކަމަށް އެ ބައްދަލުވުމުގަައި ސަފީރު ވިދާޅުވި ކަމަށެވެ.
