ސިވިލް ކޯޓުގެ ކުރީގެ ފަނޑިޔާރު މުހައްމަދު ހަލީމް ނަންގަވާފައި އޮތް ދެެ ލައްކަ ރުފިޔާގެ ލޯނަކުން ނުދައްކާ ބާކީ އޮތް 63،000ރ. ދެއްކުމަށް އެ ކޯޓުން ބުރާސްފަތި ދުވަހު ހުކުމްކޮށްފި އެވެ.
ހަވީރު ނޫހުގެ މިލްކުވެރިކަމުގެ މައްސަލައިގައި ކުރީގެ ސުޕްރީމް ކޯޓުގެ ފަނޑިޔާރު އަލީ ހަމީދު އެންގެވި ގޮތަށް ހުކުމް ކުރެއްވި ކަމަށް ފުލުހުންގެ ތަހުގީގެއްގައި އެއްބަސްވެވަޑައިގެންފައިވާ ހަލީމުގެ މައްޗަށް ދައުވާ އުފުލީ މޯލްޑިވްސް އިސްލާމިކް ބޭންކުން ނަގާފައި އޮތް 271،622ރ. ގެ ކްރެޑިޓް ފެސިލިޓީއެއްގެ މައްސަލައިގައި އެ ބޭންކުންނެވެ.
"ބުނެވިދިޔަ 63،003ރ. އާއި މި މުއާމަލާތާއެކު ޗެރިޓީގެ ގޮތުގައި އަރަމުންދާ ފައިސާއާއެކު މި އެންމެހައި ފައިސާ ޖޫން 30، 2022 އިން ފެށިގެން މީލާދީ ދެ މަސް ދުވަހުގެ ތެރޭގައި ކޮންމެ މަހަކު ވެސް އެ މަހަކަށް ޖެހޭ އަދަދަށްވުރެ މަދު ނޫން އަދަދެއްގެ ފައިސާ މޯލްޑިވްސް އިސްލާމިކް ބޭންކް ޕްރައިވޓް ލިމިޓެޑް ކޮމްޕެނީއަށް ދައްކައި ހަލާސް ކުރުމަށް މުހައްމަދު ހަލީމަށް އަންގައި، މުހައްމަދު ހަލީމުގެ ގައިރު ހާޒިރުގައި ހުކުމްކޮށްފިން،" ފަނޑިޔާރު ހާފިޒާ އަބްދުއްސައްތާރު އިއްޔެ ކުރެއްވި ހުކުމުގައިވެ އެވެ.
ހަލީމް ފަނޑިޔާރުކަމުގެ މަގާމުން އިސްތިއުފާ ދެއްވީ ރައީސް އިބްރާހިމް މުހައްމަދު ސޯލިހު ވެރިކަމަށް ވަޑައިގެންނެވި ފަހުން ޖެނުއަރީ 22، 2019 ގަ އެވެ. އެ ދުވަހު ވިދާޅުވީ އިސްތިއުފާ ދެއްވީ ރައީސްގެ ޖުޑީޝަލް ރިޕޯމަށް އެއްބާރުލުން ދެއްވުމުގެ ގޮތުން ކަމަށެވެ.
"ޖުޑިޝަލް ރިފޯމްގެ ކަންކަމަށް އެއްބާރުލުން ދިނުމުގެ ނަމޫނާ ދައްކަން އަޅުގަނޑު ބޭނުންވީ. އެހެންވެ އިސްތިއުފާ ދިނީ،" އިސްތިއުފާ ދެއްވުމަށްފަހު ނޫހަކަށް ދެއްވި އިންޓަވިއުއެއްގައި ހަލީމް ވިދާޅުވެފައިވެ އެވެ.
ހަވީރު ނޫހުގެ ވެރިންނަކީ ކޮން ބައެއް ކަމަށް ކަނޑައަޅަން ސިވިލް ކޯޓަށް ވެއްދި މައްސަލައިގައި ހަލީމް ހުކުމް ކުރެއްވީ އެ ނޫހުގެ ޗެއާމަން އަދި ކުރީގެ މިނިސްޓަރު ޑރ. މުހައްމަދު ޒާހިރު ހުސެއިންއާ ދެކޮޅަށެވެ. އެ ހިސާބުން މެދުނުކެނޑި 30 ވަރަކަށް އަހަރު ހިންގި އެ ނޫސް ބަންދު ކުރަންޖެހުނެވެ.
އޭގެ ފަހުން، ހަވީރުގައި އެ ވަގުތު މަސައްކަތް ކުރި މުވައްޒަފުން އެހެން އެއްވެސް ތަނެއްގައި މަސައްކަތް ކުރުން ވެސް ހަލީމް ނެރުއްވި ކޯޓު އަމުރެއްގެ ދަށުން މަނާ ކުރި އެވެ. ނަމަވެސް އެ މުވައްޒަފުންނާއި މެނޭޖްމަންޓު ގުޅިގެން ވަނީ އެ އަމުރަށް ބެލުމެއް ނެތި "މިހާރު" ގެ ނަމުގައި ނޫހެއް ފަށައިފަ އެވެ.
