ރަޝިއާއިން ޔޫކްރެއިންގައި ކުރާ ހަނގުރާމައަށް ރައްދު ދިނުމުގެ ގޮތުން ޔޫރަޕްގައި އެމެރިކާގެ އަސްކަރީ ނުފޫޒު އިތުރު ކުރާނެ ކަމަށް ރައީސް ޖޯ ބައިޑެން އިއުލާނު ކުރައްވައިފި އެވެ.
އެގޮތުން ޕޮލޭންޑުގައި އެމެރިކާ ދާއިމީ ސިފައިންގެ މަރުކަޒެއް ހުޅުވާނެ އެވެ. އެމެރިކާގެ އާ އަސްކަރީ މަނަވަރުތައް ސްޕެއިނަށް ފޮނުވައި، އިނގިރޭސިވިލާތަށް ހަނގުރާމަ މަތީ ޖެޓުތައް ފޮނުވާނެ އެވެ. އޭގެ އިތުރުން ރޮމޭނިއާގައި ތިބޭ އެމެރިކާ ސިފައިންގެ އަަދަދު އިތުރު ކުރާނެ އެވެ.
ބައިޑެން ވިދާޅުވީ މިއީ އެމެރިކާއިން "ކުރިއަށް އަޅާ ފިޔަވަޅެއް" ކަމަށާއި މީގެ ކުރިން ނޭޓޯގެ ބޭނުން ނުޖެހޭ ބޮޑަށް މިހާރު ޖެހިފައިވާ ކަމަށެވެ.
އެމެރިކާ އިސްވެ އޮވެ ހިންގާ އަަސްކަރީ ކޯލިޝަނުގެ ވެރިން ވަނީ ސްޕެއިންގެ މެޑްރިޑްގައި ބައްދަލުކުރައްވާފަ އެވެ. އެ ބައްދަލުވުމުގައި ބައިޑެން ވިދާޅުވީ ނޭޓޯ ހުރިހާ ގޮތަކުން ވެސް ވަރުގަދަ ކުރާނެ ކަމަށެވެ.
ބައިޑެން ވިދާޅުވީ ނޭޓޯގެ ބިމުގެ ކޮންމެ އިންޗިއެއް ވެސް ދިފާއު ކުރާނެ ކަމަށް ބުނާ ވާހަކައަކީ ވަރަށް ސީރިއަސް ވާހަކައެއް ކަމަށާއި "އެކަކަށް ދޭ ހަމަލާއަކީ އެންމެންނަށް ދޭ ހަމަލާއެއް" ކަމަށެވެ.
ބުދަ ދުވަހު އޮތް ނޭޓޯ ސަމިޓުގައި ވެރިން އެއްބަސްވެވަޑައިގެންނެވީ ސްވިޑަން އާއި ފިންލޭންޑަށް އެ ކޯލިޝަނުގެ މެމްބަރުކަން ދިނުމަށެވެ.
ނޭޓޯގެ ސެކެޓްރީ ޖެނެރަލް ޖެންސް ސްޓޮލްޓެންބާގް ވިދާޅުވީ ކޯލިޝަނާ ގުޅުމަށް އެ ދެ ގައުމަށް ރަސްމީކޮށް ދައުވަތު ފޮނުވާފައިވާ ކަމަށެވެ.
