އެމެރިކާގެ ޓެކްސަސްގެ ސޭން އެންޓޯނިއޯގެ ދުރު ހިސާބެއްގައި ޕާކުކޮށްފައި އޮތް ލޮރީއެއްގެ ތެރެއިން 46 މީހުން މަރުވެފައި ތިއްބާ ފެނިއްޖެ އެވެ.
އޮފިޝަލަކު ވިދާޅުވީ ހަތަރު ކުޑަކުދިންނާ އެކު 16 މީހުން ފަރުވާއަށް ހޮސްޕިޓަލަށް ގެންގޮސްފައިވާ ކަމަށެވެ. ބެލެވޭ ގޮތުގައި ލޮރީގައި ތިބީ އެމެރިކާއަށް ހިޖުރަ ކުރި ބަޔެކެވެ.
ހޮސްޕިޓަލަަށް ގެންދިޔަ މީހުންގެ "ހަށިގަނޑު ހޫނުވެފައިވާ" ކަމަށާއި މާ ބޮޑަށް ހޫނުވުމުން ހީޓް ސްޓްރޯކާއި ހީޓް އެގްޒޯޝަންގެ މައްސަލަ އެ މީހުންނަށް ދިމާވެފައިވާ ކަމަށް އޮފިޝަލުން ބުނެ އެވެ.
ސޭން އެންޓޯނިއޯއަކީ އެމެރިކާ އާއި މެކްސިކޯ ގުޅޭ ބޯޑަރާ 250 ކިލޯމީޓަރު ދުރުގައި އޮންނަ ސިޓީ އެކެވެ. އެއީ އިންސާނުން ޓްރެފިކް ކުރުމުގައި ޓްރާންސިޓް ރޫޓެއްގެ ގޮތުގައި ފާހަގަވެފައިވެ އެވެ.
އިންސާނުން ޓްރެފިކް ކުރާ މީހުން އާންމު ގޮތެއްގައި އެއްވެސް ލިޔެކިޔުމެއް ނެތް އެހެން ގައުމުތަކުގެ މީހުން އެމެރިކާއަށް ވަގަށް އެތެރެ ކުރަނީ ބޮޑެތި ލޮރީތަކުގައި ފޮރުވައިގެނެވެ.
މެކްސިކޯގެ ފޮރިން މިނިސްޓަރު މާސެލޯ އެބްރާޑް ވިދާޅުވީ ހޮސްޕިޓަލަށް ގެންދިޔަ މީހުންގެ ތެރޭގައި ގުއާޓެމާލާގެ ދެ މީހުން ހިމެނޭ ކަމަށެވެ. ދެން ތިބި މީހުންނަކީ ކޮން ގައުމެއްގެ ބަޔެއް ކަމެއް އަދި ނޭނގެ އެވެ.
އެ މައްސަލައާ ގުޅިގެން ތިން މީހުން ހައްޔަރުކޮށްފައިވާ އިރު، ތަހުގީގު ފަށާފައިވާ ކަމަށް ފުލުހުން ބުނެ އެވެ.
