ބިލިއަނަރު އެލޮން މަސްކްގެ ޓެސްލާ ކުންފުނިން ޑޮމިނޭޓްކޮށްފައިވާ އިލެކްޓްރިކް ކާރު އުފެއްދުމުގެ އިންޑަސްޓްރީގައި ދެކުނު ކޮރެއާގެ ހަޔުންޑާއީ އަދި ކިއާ ކުންފުނިން ކުރި ހޯދަން ފަށައިފި އެވެ.
މި އަހަރުގެ ކުރީކޮޅު ހަޔުންޑާއީ އަދި ކިއާ މޮޓޯޒްއިން ވަނީ ބެޓެރީގެ ބާރު ދުއްވާ މުޅިން އާ ދެ ކާރު ތައާރަފްކޮށްފަ އެވެ. އެއީ ހަޔުންޑާއީ އަޔޮނިކް 5 އަދި ކިއާ އީވީ6 އެވެ.
މިހާރު މާކެޓުގެ ކުރީގައި އުޅެނީ އެ ދެ ކާރެވެ. ޓެސްލާ ނޫން އެހެން ކުންފުނިތަކުން ނެރުނު ހުރިހާ ބެޓެރި ކާރެއް ފަހަތަށް ޖެއްސުމަަށް ފަހު، އެ ދެ ކާރު ޗާޓުގެ ކުރިއަށް އެރީ މަދު މަސްތަކެއްގެ ތެރޭގަ އެވެ.
އަޔޮނިކް5.
މި އަހަރުގެ މޭ މަހުގެ ނިޔަލަށް ހަަޔުންޑާއީ އާއި ކިއާއިން ވަނީ އޭގެ 21،467 ކާރު އެމެރިކާގައި އެކަނިވެސް ވިއްކާފަ އެވެ. ތަޖުރިބާކާރުން ބުނާ ގޮތުގައި އިލެކްޓްރިކް ކާރު އިންޑަސްޓްރީގައި އެ ދެ ކުންފުނިން ކުރި ހޯދަމުން ދަނީ ހީވެސް ނުކުރާހާ ބާރު ސްޕީޑެއްގަ އެވެ.
"އެއްވެސް ޑީލަރެއްގެ އަތުގައި އެ ދެ ކާރުގެ ސްޓޮކް ހުރި ކަމެއް ވެސް ނޭނގޭ. އެހާ ވެސް ޑިމާންޑް ބޮޑު،" އެޑްމަންޑްސް ކުންފުނީގެ އެނެލިސްޓް ޖޯސެފް ޔޫން ބިޒްނަސް ސްޓޭންޑަޑް ނޫހަށް ވިދާާޅުވި އެވެ.
އަދިވެސް މާކެޓުގައި އެންމެ ގިނަ ކާރު ވިއްކަނީ ޓެސްލާ އެވެ. ނަމަވެސް ހަޔުންޑާއީ އާއި ކިއާއިން ކުރު މުއްދަތެއްގެ ތެރޭގައި ސަޕްލައި ކުރި އަދަދަށް ޓެސްލާއިން ކާރު ސަޕްލައި ކުރަން ގިނަ އަހަރުތަކެއް ނެގި އެވެ.
އެ ދެ ކުންފުނިން ކާރު ނެރުނު އިރު، ގޭހާއި ތެލުގެ އަގު އަދި މޫސުމީ ބަދަލުގެ ކަންބޮޑުވުމާ ހެދި އިލެކްޓްރިކް ކާރަށް އޮތް ޑިމާންޑް ބޮޑެތި ގައުމުތަކުގައި އޮތީ އުފުލެން ފަށާފަ އެވެ.
ނަމަވެސް އެ ގައުމުތަކުގައި ބެޓެރި ކާރުގެ އޮޕްޝަންތައް މަދެވެ. އެގޮތުން އެމެރިކާގެ މާކެޓުގައި ހުރީ އެންމެ 30 ވައްތަރުގެ ކާރެވެ. އޭގެ ތެރެއިން ވެސް ރަނގަޅު ސައިޒުގެ ކާރެއް 45،000 ޑޮލަރަށް ވުރެ ދަށުން ހޯދުމަކީ އުނދަގޫ ކަމެކެވެ.
އީވީ6.
އަޔޮނިކް 5 އަދި އީވީ6 އަކީ އެމެރިކާގެ ގަރާޖުތަކަށް އެންމެ އެކަށޭނަ ސައިޒުގައި ތައްޔާރު ކުރި ދެ ކާރު ކަމަށް ތަޖުރިބާކާރުން ބުނެ އެވެ. ދެ ކާރުގެ އަގު ފެށެނީ 40،000 ޑޮލަރުންނެވެ.
"މި ދެ ކާރު މި އައީ ރަނގަޅު އަގުގައި އަަދި ރަނގަޅު ސައިޒުގައި. ބޮޑު ދެ ކުންފުންޏަކުން ކާރު ނެރުމުން ވެސް ކަސްޓަމަރުންނަށް ބޮޑަށް އިތުބާރު ކުރެވޭ،" ޔޫން ވިދާޅުވި އެވެ.
ހަޔުންޑާއީއިން ރާވާފައި ވަނީ 2030 ވަނަ އަހަރުގެ ނިޔަލަށް ކޮންމެ އަހަރަކު ވެސް މުޅިން އާ ބެޓެރި ކާރެއް މާކެޓަށް ނެރުމަށެވެ. އަދި އިލެކްޓްރިކް ކާރުގެ ޕްރޮޑަކްޝަން ވަރުގަދަ ކުރަން އެ ކުންފުނިން ވަނީ 16.5 ބިލިއަން ޑޮލަރު ކަނޑައަޅާފަ އެވެ.
އެ ކުންފުނީގެ އަމާޒަކީ 2030 ގެ ކުރިން ދުނިޔޭގެ އިލެކްޓްރިކް ކާރު އިންޑަސްޓްރީގެ 12 ޕަސެންޓު ކޮންޓްރޯލް ކުރުމެވެ.
