ޔޯގާ އާއި ކަސްރަތު ކުރުމަކީ އިސްލާމްދީނާ ހިލާފުކަމެއް ކަމަށް ކަނޑައަޅައި، ދިވެހިންގެ އާންމު ދިރިއުޅުމަށް ބުރޫއަރާގޮތަށް ކަންކަން ކުރަން ފެށުމަކީ ގައުމު ހާލަކުގެ މިސްރާބަށް ދާނެ ކަމަށް ވިދާޅުވެ، އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު މިއަދު ނުރުހުން ފާޅުކުރައްވައިފި އެވެ.
ބައިނަލްއަގުވާމީ ޔޯގާ ދުވަސް ރާއްޖޭގައި ފާހަގަކުރުމަށް ބޭއްވި ހަރަކާތުގައި ބޮޑެތި ހަމަނުޖެހުންތައް ހިނގާފައިވަނިކޮށް، ވެރިކަން ކުރާ މައި ޕާޓީ އެމްޑީޕީގެ 17 ވަނަ އަހަރީ ދުވަހުގެ މުނާސަބަތުގައި އެ ޕާޓީގެ މައި ހަރުގޭގައި ބޭއްވި ދިދަ ނެގުމުގެ ހަފްލާގައި ވާހަކަ ދައްކަވަމުން ނަޝީދު ވިދާޅުވީ އެފަދަ ކަންކަމުގައި އެހެން ގައުމުތައް ބާކީވެ، އެކަހެރިވެގެން ހަލާކުގެ އައްސޭރިއަށް ދިޔަ މަންޒަރު ފެނިގެން ގޮސްފައިވާ ކަމަށެވެ.
"މި ރާއްޖޭގައި ޔޯގާ ހެދުމަކީ ހަރާމްކަމެކޭ, ކަސްރަތު ކުރުމަކީ އިސްލާމްދީނާ ހިލާފުކަމެކޭ, މި ބާވަތުގެ ވާހަކަ ދައްކާ, އަޅުގަނޑުމެންގެ އާންމު ދިރިއުޅުމަށް ބުރޫއަރުވަން ފަށައިފިނަމަ ދެން އަޅުގަނޑުމެން އެދަނީ ސަލާމަތުގެ އައްސޭރި އަކަށް ނޫން،" ނަޝީދު ވިދާޅުވި އެވެ.
އެމަނިކުފާނު ވިދާޅުވި ގޮތުގައި ރާއްޖެ ވެސް ހަލާކުގެ އައްސޭރިއަށް ދިއުމަށް ޖާގަ ދެވިގެން ނުވާނެ އެވެ.
އަދި ދިވެހިން އެދޭ ފަދަ ރާއްޖެއަށް ގާއިމުކޮށް ދިނުމަކީ އެމްޑީޕީގެ އަބަދުވެސް އަމާޒު ކަމަށާއި، އެކަން ރައްޔިތުންނަށް ހާސިލުކޮށް ދިނުމަށްޓަކައި އެ ޕާޓީން ފަހަތަށް ނުޖެހޭނެ ކަމުގެ ޔަގީންކަން ނަޝީދު ދެއްވި އެވެ.
ދެހާސްއަށްވަނަ އަހަރު އުފެދުނު އެމްޑީޕީގެ ފުރަތަމަ ސަރުކާރުގައި ރާއްޖެއަށް ޓެކްސް ނިޒާމު ތައާރަފް ކުރުން ފަދަ މުހިންމު ބަދަލުތަކެއް ގެނެވުނު ކަމަށާއި ނަމަވެސް 17 އަހަރު ފަހުން ގައުމު އަނެއްކާވެސް ގުސް ހުއްޓިފައިވަނީ ހަތަރު އަނގޮޅިއެއްގެ ކަންމަތީގައި ކަމަށް އެމަނިކުފާނު ވިދާޅުވި އެވެ.
"ޒަމާނުއްސުރެ ފަށައިގެން ދިވެހިން ދިރިއުޅެމުން އައި ގޮތާއި، އެމީހުން ގަބޫލުކުރަމުން ފަލްސަފާ އަދި އެމީހުންގެ ދީނީ އަގީދާއަކީ އަމިއްލަ ސިޔާސީ ބޭނުމަށް ބަދަލުކުރެވިދާނެ އަގީދާއެއް ނޫން،" ނަޝީދު ވިދާޅުވި އެވެ.
ޔޯގާ ފާހަގަކުރި ހަރަކާތުގައި ބޮޑެތި ހަމަނުޖެހުންތައް ހިނގާފައިވާއިރު، ޔޯގާ އަކީ ހަރާމް އެއްޗެއް ކަމަށާއި، އެއީ ހިންދޫ ދީނުގެ އަޅުކަމުގެ ތެރޭގައި ހިމެނޭކަމެއް ކަމަށް އިސްލާމިކް މިނިސްޓްރީން ވަނީ ބުނެފަ އެވެ.
އަދި އެކަން ހުއްޓުވައި ދިނުމަށް ފުލުހުންގެ ކިބައިން ވެސް އެ މިނިސްޓްރީން އޮތީ އެދިފަ އެވެ.
