މާލޭ ރައްޔިތުންނަށް ބަންޑާރަ ގޯތީގެ ގޮތުގައި ދޫކުރާ ގޯއްޗާއި ފްލެޓަށް އެދުމުގެ ފުރުސަތު މިއަދު ހުޅުވާލައިފި އެވެ.
"ބިންވެރިޔާ-ގެދޮރުވެރިޔާ" ގެ ނަމުގައި ރައީސް އޮފީހުގައި މިއަދު ބޭއްވި ރަސްމިއްޔާތެއްގައި ފްލެޓާއި ގޯތި ދޫކުރަން ނިންމާފައިވާކަން އިއުލާނުކުރެއްވީ ހައުސިން މިނިސްޓަރު މުހައްމަދު އަސްލަމް އެވެ. ގޯތި ދޫކުރާނީ ހުޅުމާލެ އާއި ގުޅީފަޅުން ކަމަށް ސަރުކާރުން ބުންޏެވެ.
"މާލޭގެ ރަށްވެހިންނަށް މިއަދު އަޅުގަނޑުމެން މި ހުޅުވާލަނީ 3000 ގޯއްޗަށް ކުރިމަތިލުމުގެ ފުރުސަތު،" އަސްލަމް ވިދާޅުވި އެވެ.
އަސްލަމް ވިދާޅުވި ގޮތުގައި ދޫކުރުމަށް ނިންމާފައިވާ ގޯތީގެ އެންމެ ކުޑަ ސައިޒަކީ 1200 އަކަފޫޓެވެ. އަދި، ވަކި ފަރުދެއްގެ ގޮތުގައްޔާއި އާއިލާގެ މެންބަރުންތަކެއް އެއްވެގެން ނުވަތަ މުޅި އާއިލާ އެކުގައި ވެސް ބައިވެރިވެވޭނެ ކަމަށް އަސްލަމް ވިދާޅުވި އެވެ.
ހަ ކެޓަގަރީއަކަށް ބަހާލައިގެން ކުރިއަށްގެންދާ މި ސްކީމްގައި ގޯއްޗަށް އެދޭ ފަރާތްތަކަށް ބަލައި އެ ޖާގަ އިތުރުކޮށްދެމުން ކަމަށް އަސްލަމް ވިދާޅުވި އެވެ.
އެގޮތުން، ޖޮއިންޓް އެޕްލިކޭޝަންތަކުގައި އެކަކަށް ވުރެ ގިނަވާ ކޮންމެ މީހަކަށް 400 އަކަފޫޓުގެ ޖާގައެއް އިތުރުކޮށްދޭނެ ކަމަށާއި އެންމެ ބޮޑު ޖާގައަކަށް ދޫކުރާނީ 4000 އަކަފޫޓުގެ ގޯތި ކަމަށް ވެސް އޭނާ ވިދާޅުވި އެވެ. މި ޖާގައިގެ ގޯތި ދޫކުރުމަށް ނިންމާފައިވަނީ ހަތް މީހުންނަށް ގިނަ މީހުންގެ ހުށަހެޅުންތަކަކަށެވެ.
ގޯއްޗަށް އެދެވޭނެ ފަރާތްތައް
- އެއްވެސް ބިމެއް ނެތް, ވާރުތަވާނެ ބިމެއް ވެސް ނެތް މާލޭގެ ރައްޔިތުން
- އެއްވެސް ބިމެއް ނެތް, ވާރުތައިން 600 އަކަފޫޓަށް ވުރެ ކުޑަ ބިމެއް ލިބޭ މީހުން
- އެއްވެސް ބިމެއް ނެތް, ވާރުތައިން 600 - 1000 އަކަފޫޓާ ދެމެދުގެ ބިމެއް ލިބޭ މީހުން
- މާލޭގައި 600 އަކަފޫޓަށް ވުރެ ކުޑަ ބިމެއް އޮންނަ، ވާރުތަ ވާނެ ބިމެއް ނެތް މީހުން
- މާލޭގައި 600 އަކަފޫޓަށް ވުރެ ކުޑަ ބިމެއް އޮންނަ، ވާރުތައިން އެ ސައިޒުގެ ބިމެއް ލިބޭ މީހުން
- މާލޭގައި 600 - 1000 އަކަފޫޓާ ދެމެދުގެ ބިމެއް އޮންނަ، ވާރުތައިން އެ ސައިޒުގެ ބިމެއް ލިބޭ މީހުން
ގޯތި ދޫކުރުމުގެ ތަފްސީލީ އުސޫލު މިއަދު އާންމުކުރާނެ ކަމަށް ވެސް އޭނާ ވިދާޅުވި އެވެ.
މި 3000 ގޯތީގެ އިތުރުން، ހުޅުމާލޭގައި އިމާރާތް ކުރެވެމުންދާ ހައުސިން ޔުނިޓުތަކުގެ ތެރެއިން 4000 ހައުސިން ޔުނިޓަށް ކުރިމަތިލުމުގެ ފުރުސަތު ވެސް ވަނީ މިއަދު ހުޅުވާލާފަ އެވެ.
މި ފްލެޓުތައް ހާއްސަކޮށްފައިވަނީ މާލޭގެ ރައްޔިތުންނާއި މާލޭގައި 15 އަހަރަށް ވުރެ ގިނަ ދުވަހު އުޅެފައިވާ މީހުންނަށެވެ.
މިގޮތުން، އަމިއްލަ ނަމުގައި 600 އަކަފޫޓަށް ވުރެ ބޮޑު ބިމެއް ނެތް ނަމަ ފްލެޓަށް ކުރިމަތިލެވޭނެ ކަމަށާއި ބިން ދޫކޮށްލުމަކީ ލާޒިމް ކަމެއް ނޫން ކަމަށް ވެސް އަސްލަމް ވިދާޅުވި އެވެ.
"އަތުގައި އޮތް ބިންކޮޅު ދޫކޮށްލާފައި، ފްލެޓަށް ދައްކަން ޖެހޭ އަގުން، އެ ބިންކޮޅަށް ޖެހޭ އަގު އުނިކުރުމުގެ ފުރުސަތު ކުރިމަތިލާ ފަރާތްތަކަށް އެބައޮތް، އަލުގަނޑުމެން ދޫކޮށްލާ ބިމުގެ އަގު ކަނޑައެޅުމުގައި އަކަފޫޓަކަށް ޖެހޭ ރޭޓު ވާނީ ކަނޑައަޅާފައި،" އަސްލަމް ވިދާޅުވި އެވެ.
މިއަދުގެ ރަސްމިއްޔާތުގައި ވަނީ ގޯއްޗާއި ފްލެޓަށް އެދުމަށް "ގެދޮރުވެރިން" ނަމުގައި އޮންލައިން ޕޯޓަލެއް ވަނީ އިފްތިތާހުކޮށްފަ އެވެ. މި ޕޯޓަލް މެދުވެރިކޮށް އަންނަ ސެޕްޓެމްބަރުގެ 26 ވަނަ ދުވަހުގެ ނިޔަލަށް ގޯއްޗާއި ފްލެޓަށް އެދެވޭނެ އެވެ.
ހުޅުވާލާފައިވާ 3000 ގޯތި ދޫކުރުމަށް ނިންމާފައިވަނީ ހުޅުމާލޭ ފޭސް ދެއަކުންނާއި ގުޅީފަޅުންނެވެ.
މާލެ ސަރަހައްދަށް އަމާޒުކޮށް ސަރުކާރުން ކުރިއަށް ގެންދާ އަދި ރާވާފައިވާ މަޝްރޫއުތަކުގެ ތަފްސީލު، ރައީސް ސޯލިހު ދެއްވީ ރައްޔިތުންގެ މަޖިލިސް މިއަހަރަށް ހުޅުވަން މިދިޔަ ފެބްރުއަރީ މަހު ބޭއްވި ޖަލްސާގައި ދެއްވި ރިޔާސީ ބަޔާނުގަ އެވެ.
އެގޮތުން، ހުޅުމާލޭން 1،000 ގޯތީގެ އިތުރުން، ގުޅީފަޅުން 2،000 ގޯއްޗާއި އަދި ގިރާވަރު ފަޅު ހިއްކާ އެ ބިމުން މަދުވެގެން 2,000 ގޯތި މާލޭ ރަށްވެހިންނަށް ދޭނެ ކަމަށް ރައީސް އެ ދުވަހު އިއުލާނުކުރެއްވި އެވެ.
ގިނަ ދުވަސް ތަކަކަށްފަހު މިދިޔަ ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް ވިދާޅުވީ ކުރިން އިއުލާން ކުރެވި މާލޭގެ ރަށްވެހިންނަށް ބޯހިޔާވަހި ކަމާއި ގެދޮރުވެރިކަން ހޯދައިދިނުމަށް ހިންގާ މަޝްރޫއުގެ އަމަލީ މަސައްކަތް މި މަހު ފެށިގެން ދާނެ ކަމަށެވެ.
