ލަންޑަން (ޖޫން 26) - މެންޗެސްޓާ ޔުނައިޓެޑްގެ ތަރި ކްރިސްޓިއާނޯ ރޮނާލްޑޯ އަށް ޗެލްސީން ހުށަހެޅުމެއް ލިބިފައިވާ ކަމަށް މީޑިއާ ރިޕޯޓްތައް ބުނެފި އެވެ.
ރޮނާލްޑޯ، 37، މި ފަހަރުގެ ޓްރާންސްފާ މާކެޓްގައި ކްލަބް ބަދަލުނުކުރާނެ ކަމަށް މީޑިއާތަކުން ރިޕޯޓްކޮށްފައިވެ އެވެ. އެހެން ނަމަވެސް ރޮނާލްޑޯ، މި ފަހަރުގެ ޓްރާންސް ބާޒާރު ނިމުމުގެ ކުރިން އެހެން ޓީމަކާ ގުޅުމުގެ ފުރުސަތު އެބައޮތް ކަމަށް ވެސް ގިނަ މީޑިއާތަކުން އަންނަނީ ރިޕޯޓް ކުރަމުންނެވެ.
އެ ގޮތުން ރޮނާލްޑޯގެ މަންމަ، ޑޮލޯރެސް އަވެއިރޯގެ އެދުމަށް ރޮނާލްޑޯ، އޭނާ އެންމެ ފުރަތަމަ ކުޅުނު ޕޯޗުގަލްގެ ސްޕޯޓިން ލިޒްބަންއާ ގުޅޭނެ ކަމުގެ ވާހަކަތަކެއް ދެެކެވުނުއިރު، ޖަރުމަނުގެ ޗެމްޕިއަން، ބަޔާން މިއުނިކުން ރޮބަޓް ލެވަންޑޯސްކީ ނެތްތަނަށް ރޮނާލްޑޯ ގެންދަން ޝައުގުވެރިވާ ކަމުގެ ރިޕޯޓްތަކެއް ވެސް މީޑިއާ އިން ފެނިފައިވެ އެވެ.
ޗެލްސީގެ އާ ވެރިޔާ، އެމެރިކާގެ މަހުޖަނު، ޓޮޑް ބޯލީ ވަނީ ދާދި ފަހުން ރޮނާލްޑޯގެ އޭޖެންޓް، ޖޯޖް މެންޑޭޒްއާ އެކު ބައްދަލުވުމެއް ބާއްވައިފަ އެވެ. މިދިޔަ ހަފްތާގައި ޕޯޗުގަލްގައި ބޭއްވި އެ ބައްދަލުވުމުގައި ބޯލީ ވަނީ ރޮނާލްޑޯ ބޭނުންނަމަ ޗެލްސީއާ ގުޅުމުގެ ފުރުސަތު އެބައޮތް ކަމަށް ބުނެފަ އެވެ.
އެކަމަކު، ރަސްމީ ސިފައެއްގައި އަދި ޗެލްސީން ރޮނާލްޑޯ ގެންދަން މަސައްކަތް ފަށާފައިނުވެ އެވެ.
ޖަރުމަނުގެ މީޑިއާތަކުން ދާދި ފަހުން ރޮނާލްޑޯ އާއި ބަޔާނާ ގުޅުވައިގެން ވާހަކަތަކެއް ރިޕޯޓްކުރިއިރު، ބަޔާންގެ ސްޕޯޓިން ޑިރެކްޓަރު ހަސަން ސަލިހަމްދިޒިޗް ވަނީ އެއީ ހަގީގަތެއް ނެތް ދޮގު ވާހަކަތަކެއް ބުނެފަ އެވެ. އޭނާ ބުނީ ރޮނާލްޑޯ އަށް ބަޔާނުން ޝައުގުވެރިނުވާ ކަމަށެވެ.
މީގެ ދެ އަހަރު ކުރިން ރޮނާލްޑޯ، ޔުވެންޓަސް އަށް ކުޅެމުން ދަނިކޮށް ވެސް އޭނާ ބަޔާނަށް އަންނަން އުޅޭ ވާހަކަ މީޑިއާގައި ދެކެވުނެވެ. ބަޔާންގެ ރައީސް، ހާބާޓް ހައިނާ، އޭރު އިންޓަވިއުއެއްގެ ތެރެެއިން ވިދާޅުވީ ރޮނާލްޑޯ ހުރި ބަޔާނަށް ކުޅޭ އުމުރަށް ވުރެ ދުވަސްވެފައި ކަމަށް ބުނެފަ އެވެ.
ރޮނާލްޑޯގެ ސޮއި ހޯދަން ހޯސޭ މޮރީނިއޯގެ ކޯޗުކަމުގައި ކުޅޭ ރޯމާ އިން މަސައްކަތް ކުރި ނަމަވެސް އެ ޓީމުގެ ހުށަހެޅުން ރޮނާލްޑޯ ގަބޫލުނުކުރާނެ ކަމަށް އިޓަލީގެ ނޫސްތަކުން ވަނީ ރިޕޯޓްކޮށްފަ އެވެ. އެއީ ރޮނާލްޑޯ މިހާރު ކުޅެމުން އަންނަ ޔުނައިޓެޑެކޭ އެއްގޮތަށް އަންނަ ސީޒަނުގައި ރޯމާ ވެސް ޗެމްޕިއަންސް ލީގަށް ކޮލިފައިވެފައި ނުވާތީ އެވެ.
ތޭރަ އަހަރަށް ފަހު، ރޮނާލްޑޯ، މިދިޔަ ސީޒަނުގައި ޔުނައިޓެޑާ ގުޅުނީ ދެ އަހަރުގެ ކޮންޓްރެކްޓެއްގަ އެވެ. ޔުނައިޓެޑުން ރޮނާލްޑޯ ގަންނަން، ޔުވެންޓަސް އަށް ފުރަތަމަ ދެއްކީ 17 މިލިއަން ޑޮލަރެވެ. އަދި ފަހުން ޔުވެންޓަސް އަށް އިތުރު ނުވަ މިލިއަން ޑޮލަރު ދޭން ވަނީ ކޮންޓްރެކްޓްގައި އެއްބަސްވެފަ އެވެ. މިދިޔަ ސީޒަނުގައި ރޮނާލްޑޯ ވަނީ ކުޅުނު 39 މެޗުން 24 ގޯލު ޖަަހައި، ތިން ގޯލު ޖަހަން ފުރުސަތު ތަނަވަސްކޮށްދީފަ އެވެ.
