ވޮޝިންޓަން، އެމެރިކާ (ޖޫން 21) - ޔޫކްރެއިންގައި ހަނގުރާމަ ކުރަމުން ދަނިކޮށް އެމެރިކާގެ ދެ ވަނަ ރައްޔިތަކު މަރުވެފައިވާ ކަމަށް އެމެރިކާ ސަރުކާރުން ބުނެފި އެވެ.
ހަނގުރާމައިގައި އެމެރިކާގެ ދެ ރައްޔިތުން މަރުވެފައިވާ އިރު، ރަޝިއާގެ ސިފައިން ވަނީ އެމެރިކާގެ އިތުރު ދެ މީހުން ޔޫކްރެއިނުން ހައްޔަރުކޮށްފަ އެވެ.
ސްޓޭޓް ޑިޕާޓްމަންޓުން ބުނީ ހަނގުރާމައިގައި މަރުވި އުމުރުން 52 އަހަރުގެ ސްޓިފަން ޒަބިއެލްސްކީގެ އާއިލާއަށް ކޮންޒިއުލާ އެހީތެރިކަން ފޯރުކޮށްދެމުންދާ ކަމަށެވެ.
"ޔޫކްރެއިންގައި ކުރިއަށްދާ ހަނގުރާމަ އާއި ޔޫކްރެއިންގައި އެމެރިކާ ރައްޔިތުންނަށް އަމާޒުކޮށް ރަޝިއާއިން ކަންކަން ހިންގާނެތީ ޔޫކްރެއިނަށް ދަތުރު ނުކުރުމަށް އަޅުގަނޑުމެން ތަކުރާރުކޮށް އިލްތިމާސް ކުރަން،" ސްޓޭޓް ޑިޕާޓްމަންޓްގެ ތަރުޖަމާނަކު ވިދާޅުވި އެވެ.
މި ވަގުތު ޔޫކްރެއިންގައި ތިބި އެމެރިކާ ރައްޔިތުން "ވަގުތުން އެ ގައުމު ދޫކޮށް ދިޔުމަށް" ވެސް ތަރުޖަމާނު ގޮވާލެއްވި އެވެ.
ޒަބިއެލްސްކީއަކީ ޔޫކްރެއިން ހަނގުރާމައިގައި އަމަލީ ގޮތުން ބައިވެރިވަމުން ދަނިކޮށް މަރުވި އެމެރިކާގެ ދެ ވަނަ މީހާ އެވެ. އެންމެ ފުރަތަމަ މަރުވީ އުމުރުން 22 އަހަރުގެ ވިލީ ޖޯސެފް ކެންސަލް އެވެ.
ޔޫކްރެއިނަށް އެހީވުމަށް ވޮލަންޓިއަރުންގެ ގޮތުގައި އުޅެމުން ދިޔަ އެމެރިކާގެ ދެ މީހަކު މި މަހުގެ ކުރީކޮޅު ރަޝިއާއިން ހައްޔަރު ކުރުމުން އެމެރިކާއިން ވަނީ ކަންބޮޑުވުން ފާޅުކޮށްފަ އެވެ.
އެލެގްޒެންޑާ ޑްރުއެކޭ އަދި އެންޑީ ހިޔުން ފެންނަ ވީޑިއޯތައް ރަޝިއާގެ ދައުލަތުގެ މީޑިއާއިން އާއްމު ކުރި ނަމަވެސް އެ މީހުން ބަންދުކޮށްފައި ތިބި ތަނެއް ހާމަކޮށްފައެއް ނުވެ އެވެ.
ރަޝިއާ ސަރުކާރުގެ ތަރުޖަމާނު ޑިމިޓްރީ ޕެސްކޯވް އެންބީސީ ނިއުސްއަށް ވިދާޅުވީ "އެ ދެ މީހުންގެ ކުށްތަކަށް އަދަބު ދޭން ޖެހޭނެ" ކަމަށެވެ.
