މެންޗެސްޓާ (ޖޫން 21) - މެންޗެސްޓާ ސިޓީން އެ ޓީމަށް ގެންނަން އެއްބަސްވެފައިވާ އާޖެންޓީނާގެ ފޯވާޑް، ހޫލިއަން އަލްވަރޭޒް ލޯން އެއްބަސްވުމެއްގައި އެހެން ކްލަބަކަށް ދޫކޮށްލަން ބޭނުންނުވާ ކަމަށް މީޑިއާ ރިޕޯޓްތައް ބުނެފި އެެވެ.
މިދިޔަ ޖެނުއަރީ މަހު ސިޓީން އަލްވަރޭޒް ގަތުމުގެ ޑީލް ވަނީ ނިންމައިފަ އެވެ. ސިޓީން ފަސް އަހަރުގެ ކޮންޓްރެކްޓެއްގައި އަލްވަރޭޒްގެ ސޮއި ހޯދުމަށް ފަހު، ނިންމީ ސީޒަނުގެ ނިޔަލަށް ރިވަ ޕްލޭޓްގައި އޭނާ ބެހެއްޓުމަށެވެ. އަލްވަރޭޒް ގަންނަން ސިޓީން ޖުމްލަ އެކު 22 މިލިއަން ޑޮލަރު ދައްކާނެ އެވެ.
އަލްވަރޭޒް، 22، ރިވަ ޕްލޭޓްގައި ދައްކަމުން އަންނަ މޮޅު ކުޅުމުގެ ސަބަބުން އޭނާ އަށް އާޖެންޓީނާ ގައުމީ ފުޓްބޯޅަ ޓިމުން ވެސް ވަނީ ފުރުސަތު ލިބިފަ އެވެ. ރިވަ ޕްލޭޓް އެންމެ ފަހުން ކުުޅުނު މެޗުގައި ޔޫނިއަން ސަންޓާ އަތުން 5-1 އިން މޮޅުވިއިރު، އަލްވަރޭޒް ވަނީ ދެ ގޯލު ޖަހައި، ދެ ގޯލު ޖަަހަން ފުުރުސަތު ތަނަވަސްކޮށްދީފަ އެވެ.
އެކުއެޑޯއާ ދެކޮޅަށް އާޖެންޓީނާ ކުޅުނު މެޗެއްގެ ތެރެއިން އަލްވަރޭޒް ބޯޅަ ހިފައިގެން.-- ފޮޓޯ: އޭއެފްޕީ
ޔޫރަޕްގެ ކްލަބަކަށް އަލްވަރޭޒް ކުޅެފައިނުވާތީ، ސިޓީން އަންނަ ސީޒަނުގައި އޭނާ ލޯން އުސޫލުން ޔޫރަޕްގެ އެހެން ލީގެއްގެ ކްލަބަކަށް ދޫކޮށްލާނެ ކަމަށް ކުރިން އޮތީ ބެލެވިފަ އެވެ. ސްޕެއިނާއި ފްރާންސް އަދި އިޓަލީގެ ޓީމުތައް ހިމެނޭ ގޮތަށް ޖުމްލަ ހަތް ކްލަަބަކުން އެއް ސީޒަނުގެ ލޯން ޑީލެއްގައި އަލްވަރޭޒް ގެންދަން ޝައުގުވެރިވެ އެވެ.
އެކަމަކު، ސިޓީގެ ބޯޑުން ނިންމާފައިވަނީ އަލްވަރޭޒް ލޯން އުސޫލުން ދޫކޮށްނުލައި، އަންނަ ސީޒަނުގައި އާލިން ބްރައުޓް ހާލަންޑާ އެކު ސިޓީގެ ފޯވާޑް ލައިން ބަލަހައްޓަން މަޑުކުރުވުމަށެވެ.
ސިޓީން އަލްވަރޭޒް ބަހައްޓާނެ ކަމަށް އެންމެ ބޮޑަށް ބާރު ލިބޭ ސަބަބަކީ އެ ޓީމަށް ކުޅޭ ބްރެޒިލްގެ ފޯވާޑް ގަބްރިއެލް ޖީސޫސްގެ މުސްތަގުބަލާ މެދު ސުވާލު އުފެދިފައިވާތީ އެވެ. ޖީސޫސް ހޯދަން އިނގިރޭސި ޕްރިމިއާ ލީގުގެ އާސެނަލާއި ޓޮޓެންހަމް ހޮޓްސްޕާސް އިން އަންނަނީ މަސައްކަތް ކުރަމުންނެވެ.
އާޖެންޓީނާ ސީނިއާ ޓީމަށް ނުވަ މެޗު ކުޅެ އެއް ގޯލު ޖަހާފައިވާ އަލްވަރޭޒް ވަނީ މި ސީޒަނުގައި ރިވަ ޕްލޭޓަށް އޭނާ ކުޅެދިން 20 މެޗުން 16 ގޯލު ޖަހައި ހަ ގޯލު ޖަހަން ފުރުސަތު ތަަނަވަސްކޮށްދީފަ އެވެ.
