މެންޗެސްޓާ (ޖޫން 20) - ބްރައިޓަން އަށް މޮޅު ކުޅުމެއް ދައްކަމުން އަންނަ ސްޕެއިނުގެ ފުލްބެކް، މާކް ކުކުރޭލާ އަށް ޗެލްސީ ލިބިފައި އޮތް ހުށަހެޅުން ދޫކޮށްލައި އޭނާ ބޭނުންވަނީ އިނގިރޭސި ޗެމްޕިއަން މެންޗެސްޓާ ސިޓީ އަށް ބަދަލުވާން ކަމަށް މީޑިއާ ރިޕޯޓްތައް ބުނެފި އެވެ.
ބާސެލޯނާގެ މަޝްހޫރު ލަ މާސިއާ އެކެޑަމީން ޑިވެލޮޕްވި ކުކުރޭލާ، ބާސެލޯނާ ދޫކޮށްލުމަށް ފަހު 2020-2021 ވަނަ ސީޒަނުގައި ކުޅުނީ ސްޕެއިނުގެ ގެޓަފޭ އަށެވެ. އެ ޓީމުން ފާހަގަވެގެން މިދިޔަ އަހަރުގެ އޮގަސްޓް މަހު ބްރައިޓަން އިން ވަނީ 22 މިލިއަން ޑޮލަރު ދީފައި، ފަސް އަހަރުގެ ކޮންޓްރެކްޓެއްގެ ދަށުން ކުކުރޭލާގެ ސޮއި ހޯދައިފަ އެވެ.
ބްރައިޓަންގައި މިދިޔަ ސީޒަނުގައި ކުކުރޭލާ، 23، ދެއްކި މޮޅު ކުޅުމުގެ ސްޕެއިން ގައުމީ ޓީމުން ވެސް ފުރުސަތު ލިބެން ފެށި އެވެ.
ކުކުރޭލާގެ ކުރިއެރުން ފާހަގަވެ، އޭނާ ހޯދަން ޗެލްސީ އާއި ސިޓީން އަންނަނީ މަސައްކަތް ކުރަމުންނެވެ. ދެ ޓީމުން ވެސް އޮތީ ކުކުރޭލާ ގަންނަން، 50 މިލިއަން ޑޮލަރު ހަރަދުކުރަން ތައްޔާރަށް ކަމަށް އިނގިރޭސި މީޑިއާތަކުން ރިޕޯޓްކުރެ އެވެ.
ޕްރިމިއާ ލީގުގެ މެޗެއްގެ ތެރެއިން ބްރައިޓަންގެ ކުކުރޭލާ ބޯޅަ ފޮނުވާލަނީ.
އެކަމަކު، ކުކުރޭލާގެ ވިސްނުމަކީ ޕެޕް ގާޑިއޯލާގެ ކޯޗުކަމުގެ ދަށުން ކުޅެން ލިބިފައި އޮތް ފުރުސަތުގެ ބޭނުންހިފަން ސިޓީ އަށް ބަދަލުވުން ކަމަށް މީޑިއާ ރިޕޯޓްތައް ބުނެ އެވެ.
ސިޓީން އާ ފުލްބެކެއް ހޯދަން މަސައްކަތް ފަށާފައިވަނީ އެ ޓީމަށް ކުޅެމުން އަންނަ ޔޫކްރެއިންގެ އޮލެކްސަންޑަ ޒިންޗެންކޯގެ މުސްތަގުބަލާ މެދު ސުވާލު އުފެދިފައިވާތީ އެވެ. ސިޓީން ކުކުރޭލާ އަށް ބިޑްކުރަން ފަންޑް ހޯދާނީ ޒިންޗެންކޯގެ ޑީލް ނިންމުމަށް ފަހު ކަމަށް، ރިޕޯޓްތައް ބުނެ އެވެ. ޒިންޗެންކޯ ގަންނަން ޕްރިމިއާ ލީގާއި އިޓަލީގެ ކްލަބްތަކުން އަންނަނީ ޝައުގުވެރިކަން ފާޅުކުރަމުންނެވެ.
ޗެލްސީން ކުކުރޭލާ ގެންނަން ބޭނުންވަނީ މާކޯސް އަލޮންސޯގެ މަގާމަށެވެ. ޗެލްސީ ދޫކޮށް ސްޕެއިންގެ ކްލަބަކާ ގުޅެން އަލޮންސޯ އަންނަނީ ތައްޔާރު ވަމުންނެވެ. އަލޮންސޯގެ ސޮއި ހޯދަން ބާސެލޯނާ އާއި ސެވިއްޔާ އިން މަސައްކަތް ކުރާ ކަމަށް ރިޕޯޓްތައް ބުނެ އެވެ.
ޗެލްސީން ސެވިއްޔާ އަށް ކުޅޭ ފްރާންސްގެ ޑިފެންޑަރު ޖޫލްސް ކޫންޑޭ ގަންނަން ކުރާ މަސައްކަތުގައި އަލޮންސޯ އެ ޑީލްގެ ތެރެއިން ދޫކޮށްލުމުގެ ފުރުސަތު ވެސް އެބައޮތެވެ.
