ސިޔާސީ މީހުން ނުތިބޭ ގޮތަށް ޖުޑިޝަލް ސާވިސް ކޮމިޝަން (ޖޭއެސްސީ)ގެ އެކުލެވުން ބަދަލުކުރުމަށްޓަކައި ގާނޫނުއަސާސީއަށް ބަދަލު ގެންނަން ރައްޔިތުންގެ މަޖިލީހުގެ މަހިބަދޫ ދާއިރާގެ ޕީޕީއެމް މެމްބަރު އަހުމަދު ތޯރިގު ތިން ވަނަ ފަހަރަށް މަޖިލީހަށް ބިލެއް ހުށަހަޅުއްވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ މި ބިލުގެ ފުރަތަމަ ކިޔުން އިއްވާފަ އެވެ.
"ޖުޑީޝަލް ސާވިސް ކޮމިޝަން އެކުލަވާލުމުގައި ގާނޫނު ހެދުމުގެ ބާރާއި ވެރިކަން ހިންގުމުގެ ބާރުގެ ފަރާތުން ތަމްސީލު ކުރާ ފަރާތްތަކަކީ ސިޔާސީ ފަރާތްތަކަކަށް ވުމުގެ ސަބަބުން، އެ ފަރާތްތައް ބައިވެރިވެގެން ޖުޑީޝަލް ސާވިސް ކޮމިޝަނުން ބަލާ މައްސަލަތަކުއްގައްޔާއި، ނިންމާ ނިންމުންތަކުގައި ސިޔާސީ ނުރަނގަޅު ނުފޫޒާއި ބާރު އެކުލެވިގެން ދިއުން ހިމެނޭތީ،" ބިލު ހުށަހެޅި ސަބަބެއްގެ ގޮތުގައި ފާހަގަކޮށްފައިވެ އެވެ.
މީގެ ކުރިން ދެ ފަހަރު ވެސް ތޯރިގް މި ބިލު ހުށަހެޅުއްވިއިރު، ސަރުކާރު ހިންގާ ކޯލިޝަނުގެ މައި ޕާޓީ އެމްޑީޕީގެ ސާފު އަގުލަބިއްޔަތު އޮންނަ މަޖިލީހުން ވަނީ އެ އިސްލާހުތައް ބޭރުކޮށްލާފަ އެވެ.
ޖޭއެސްސީގައި މަޖިލީހުގެ ރައީސްއާއި، މަޖިލީހުގެ މެންބަރަކާއި، އާންމުންގެ ތެރެއިން މަޖިލީހުން ކަނޑައަޅާ މެންބަރަކާއި، ރައީސް ކަނޑައަޅާ މެންބަރަކާއި، ބަންޑާރަ ނައިބު އިންނަވަން ޖެހެ އެވެ. އަދި ސުޕްރީމް ކޯޓުގެ ފަނޑިޔާރަކާއި، ހައި ކޯޓުގެ ފަނޑިޔާރަކާއި، ދަށު ކޯޓުގެ ފަނޑިޔާރަކާއި، ސިވިލް ސާވިސް ކޮމިޝަންގެ ރައީސްއާއި، ވަކީލުންގެ ތެރެއިން އިންތިހާބު ކުރެވޭ ވަކީލަކު އިންނަވަން ޖެހެ އެވެ.
ތޯރިގު އިސްލާހު ހުށަހެޅުއްވީ ޖޭއެސްސީގައި މަޖިލީހުގެ ރައީސާއި، މަޖިލީހުގެ މެންބަރަކާއި، އާންމުންގެ ތެރެއިން މަޖިލީހުން ކަނޑައަޅާ މެންބަރަކާއި، ބަންޑާރަ ނައިބުގެ އިތުރުން ސިވިލް ސާވިސް ކޮމިޝަންގެ ރައީސް ނުހިމެނޭގޮތަށެވެ.
ކުރިން ހުށަހެޅުއްވި ދެ އިސްލާހުގައި ވެސް ވާގޮތަށް، މި ފަހަރު ހުށަހެޅި އިސްލާހުގައި ވެސް ވަނީ ރިޓަޔާ ކޮށްފައިވާ ފަނޑިޔާރަކާއި އިންތިހާބުކުރާ ދެ ވަކީލުންނާއި ޔުނިވާސިޓީތަކުގައި ޝަރީއަތް ކިޔަވައިދޭ ބޭފުޅަކާއި ގާނޫނު ކިޔަވައިދޭ ބޭފުޅަކާއި ތައުލީމީ ދާއިރާއިން މަތީ ތައުލީމް ހާސިލްކުރައްވާފައިވާ ސިޔާސީ ގޮތުން ހަރަކާތްތެރި ނުވާ ތަޖުރިބާކާރެއް އެ ކޮމިޝަނުގެ ތިބޭ ގޮތަށެވެ.
އަދި ވިޔަފާރީގެ ދާއިރާއިން މަތީ ތައުލީމް ހާސިލްކުރައްވާފައިވާ ބޭފުޅަކާއި ގާނޫނީ ފަންނު ފިޔަވައި އެހެން ދާއިރާއަކުން މަތީ ތައުލީމް ހޯދާފައިވާ ބޭފުޅެއް ހިމަނަން ވެސް ވެއެވެ.
ޖޭއެސްސީ އިސްލާހު ކުރުމަކީ މި ސަރުކާރުގެ ރިޔާސީ ވައުދެކެވެ. އަދި ދައުރު ނިމުމުގެ ކުރިން އެ މަސައްކަތް ކުރާނެ ކަމަށް މީގެ ކުރިން ސަރުކާރުން ވަނީ ބުނެފަ އެވެ.
