ލިޒްބަން (ޖޫން 20) - ކްރިސްޓިއާނޯ ރޮނާލްޑޯ، އޭނާގެ މަންމަ، ޑޮލޯރެސް އަވެއިރޯ އެދޭތީ ކެރިއަރުގައި އެންމެ ފުރަތަމަ ކުޅުނު ކްލަބް، ޕޯޗުގަލްގެ ސްޕޯޓިން ލިޒްބަން އަށް ބަދަލުވުމުގެ ފުރުސަތު އެބައޮތް ކަމަށް ޕޯޗުގީސް މީޑިއާ ރިޕޯޓްތައް ބުނެފި އެވެ.
މިދިޔަ އަހަރު އިޓަލީގެ ޔުވެންޓަސް ދޫކޮށް ރޮނާލްޑޯ، 37، މެންޗެސްޓާ ޔުނައިޓެޑަށް އަލުން ބަދަލުވުމުގެ ކުރިން ވެސް ޕޯޗުގީސް މީޑިއާއެއްގެ ޕޮޑްކާސްޓް ޝޯއެއްގައި ވާހަކަ ދައްކަމުން އަވިއޭރޯ ބުނީ ރޮނާލްޑޯ އަލުން ޕޯޗުގަލްގައި ސްޕޯޓިން އަށް ކުޅޭނެ ކަމަށް ބުނެފަ އެވެ.
ޕޯޗުގަލްގެ އެ މީޑިއާ އިން ދާދި ފަހުން ރިޕޯޓްކުރި ގޮތުގައި ރޮނާލްޑޯ މި ފަހަރުގެ ޓްރާންސްފާ މާކެޓްގައި ޔުނައިޓެޑް ދޫކޮށްލަން ނިންމައިފިނަމަ އެންމެ ފުރުސަތު ބޮޑީ އަލުން ސްޕޯޓިންއާ ގުޅުމުގެ އެވެ.
ރޮނާލްޑޯގެ ސޮއި ހޯދަން ހޯސޭ މޮރީނިއޯގެ ކޯޗުކަމުގައި ކުޅޭ ރޯމާ އިން މަސައްކަތް ކުރި ނަމަވެސް އެ ޓީމުގެ ހުށަހެޅުން ރޮނާލްޑޯ ގަބޫލުނުކުރާނެ ކަމަށް އިޓަލީގެ ނޫސްތަކުން ވަނީ ރިޕޯޓްކޮށްފަ އެވެ. އެއީ ރޮނާލްޑޯ މިހާރު ކުޅެމުން އަންނަ ޔުނައިޓެޑެކޭ އެއްގޮތަށް އަންނަ ސީޒަނުގައި ރޯމާ ވެސް ޗެމްޕިއަންސް ލީގަށް ކޮލިފައިވެފައި ނުވާތީ އެވެ.
އިނގިރޭސި މީޑިއާ ރިޕޯޓްތައް ބުނާގޮތުން ރޮނާލްޑޯ، ޔުނައިޓެޑް ދޫކޮށްލަން ނިންމާނީ ޗެމްޕިއަންސް ލީގު ކުޅެވޭ ގޮތަކަށެވެ. ސްޕޯޓިން އަށް ބަދަލުވެއްޖެނަމަ އަންނަ ސީޒަނުގެ ޗެމްޕިއަންސް ލީގުގައި ރޮނާލްޑޯ އަށް ކުޅެވޭނެ އެވެ. އަދި ނޮވެމްބަރު މަހު، ގަތަރުގައި ފަށާ ފީފާ ވޯލްޑް ކަޕަށް އަމިއްލަ ގައުމުގައި ހުރެ، ތައްޔާރުވެލަން ފުރުސަތު ލިބޭނެ އެވެ.
ޔުނައިޓެޑްގެ އިސް އޮފިޝަލުންނާ ހަވާލާދީ ޓޯކްސްޕޯޓްސް އިން ރިޕޯޓްކުރާގޮތުގައި ރޮނާލްޑޯގެ ވިސްނުން އަދި ހުރީ ޔުނައިޓެޑްގެ އާ ކޯޗު އެރިކް ޓެން ހާގްއާ އެކީ މި ސީޒަނުގައި މަސައްކަތް ކުރުމަށެވެ. އެކަމަކު، މުސްތަގުބަލާ މެދު ސީދާ ގޮތެއް ނިންމަން ރޮނާލްޑޯ ވިސްނައިގެން ހުރީ ޗުއްޓީ އަށް ފަހު ޔުނައިޓެޑްގެ ޕްރީ ސީޒަން ޓްރެއިނިން އަށް ރިޕޯޓްކުރުމަށް ފަހު އެވެ.
ތޭރަ އަހަރަށް ފަހު ރޮނާލްޑޯ މިދިޔަ ސީޒަނުގައި ޔުނައިޓެޑާ ގުޅުނީ ދެ އަހަރުގެ ކޮންޓްރެކްޓެއްގަ އެވެ. ޔުނައިޓެޑުން ރޮނާލްޑޯ ގަންނަން، ޔުވެންޓަސް އަށް ފުރަތަމަ ދެއްކީ 17 މިލިއަން ޑޮލަރެވެ. އަދި ފަހުން ޔުވެންޓަސް އަށް އިތުރު ނުވަ މިލިއަން ޑޮލަރު ދޭން ވަނީ ކޮންޓްރެކްޓްގައި އެއްބަސްވެފަ އެވެ. މިދިޔަ ސީޒަނުގައި ރޮނާލްޑޯ ވަނީ ކުޅުނު 39 މެޗުން 24 ގޯލު ޖަަހައި، ތިން ގޯލު ޖަހަން ފުރުސަތު ތަނަވަސްކޮށްދީފަ އެވެ.
