ލަންޑަން (ޖޫން 19) - މެންޗެސްޓާ ސިޓީ އަށް ކުޅެމުން އަންނަ އިނގިރޭސި ވިންގް، ރަހީމް ސްޓާލިން ގަންނަން ޗެލްސީން މަސައްކަތް ކުރަމުން އަންނަ ކަމަށް އިނގިރޭސި މީޑިއާތަކުން ރިޕޯޓްކޮށްފި އެވެ.
ސްޓާލިން، 27، މި ވަގުތުު ސިޓީގެ ކޮންޓްރެކްޓްގައި ހުރީ އަންނަ އަހަރުގެ ޖޫން މަހުގެ ނިޔަލަށެވެ. ސްޓާލިން އަށް ސިޓީގެ ފުރަތަމަ އެގާރައިން ގަވާއިދުން ފުރުސަތު ނުލިބޭތީ، އޭނާ އަންނަނީ ސިޓީ ދޫކޮށްލަން އެ ޓީމާ އެކު މަޝްވަރާ ކުރަމުންނެވެ. އެ ގޮތުން ސްޓާލިންގެ އޭޖެންޓް، އެއިޑީ ވާޑް ވަނީ މި ފަހަރުގެ ޓްރާންސްފާ މާކެޓް ފެށި ފަހުން ޓޮޓެންހަމާއި ލިވަޕޫލަށް ވެސް ސްޓާލިން ގަންނަން ހުށަހަޅައިފަ އެވެ. އެކަމަކު، އެ ދެ ކްލަބުން ނިންމީ އެ ޑީލަށް މަޝްވަރާ ނުކުރުމަށެވެ.
ރިޕޯޓްތައް ބުނާގޮތުން ޗެލްސީން ވަނީ ސްޓާލިން ގަންނަން ޝައުގުވެރިކަން ފާޅުކޮށްފަ އެވެ. އެ ގޮތުން ޗެލްސީން އޮތީ ސްޓާލިން ގަންނަން 43 މިލިއަން ޑޮލަރު ހަރަދުކުރަން ތައްޔާރަށެވެ. އެކަމަކު، މިއީ ސްޓާލިން ވިއްކާލަން ސިޓީން އެއްބަސްވާނެ އަގެއް ނޫން ކަމަށް އިނގިރޭސި މީޑިއާތަކުން ބުނެ އެވެ. އެ ގޮތުން ސިޓީން އެންމެ ކުޑަ އަގެއްގައި ވެސް ސްޓާލިން ދޫކޮށްލާނީ 65 މިިލިއަން ޑޮލަރަށް ކަމަށް ރިޕޯޓްތައް ބުނެ އެވެ.
ޔޫރަޕްގެ އެހެން ގައުމުތަކުގެ ހުށަހެޅުންތަކެއް ސްޓާލިން އަށް ލިބިފައިވީ ނަަމަވެސް އޭނާގެ ވިސްނުމަކީ ޕްރިމިއާ ލީގުގެ ކްލަބަކާ ގުޅުން ކަމަށް އިޓަލީގެ ނޫސްތަކުން ރިޕޯޓްކޮށްފައިވެ އެވެ. އެއީ ހޯސޭ މޮރީނިއޯގެ ކޯޗުކަމުގައި ކުޅޭ ރޯމާ އާއި ޖަރުމަނުގެ އާރްބީ ލައިޕްޒިގުން ވަނީ ސްޓާލިން ހޯދަން ޝައުގުވެރިކަން ފާޅުކޮށްފަ އެވެ.
ލިވަޕޫލް ދޫކޮށް، 2015 ވަނަ އަހަރު ސިޓީ އަށް ސްޓާލިން ބަދަލުވީ 60 މިލިއަން ޑޮލަރަށެވެ. ސިޓީގައި ސްޓާލިން ހޭދަކުރި ހަތް ވަރަކަށް އަހަރު ތެރޭ ނުވަ ތަށި ހޯދި އެވެ. އޭގެ ތެރޭގައި ހިމެނެނީ އިނގިރޭސި ޕްރިމިއާ ލީގު ހަތަރު ފަހަރާއި ލީގު ކަޕް ހަތަރު ފަހަރު ހޯދުމުގެ އިތުރުން، އެފްއޭ ކަޕް އެވެ.
ޓްރާންސްފާ ބާޒާރުގައި ޗެލްސީން މަޝްވަރާ ކުރަމުން އަންނަ ޑީލުތަކަށް ބަލާއިރު، ލޯން އެއްބަސްވުމެއްގެ ދަށުން ރޮމެލޫ ލުކާކޫ އަލުން އިންޓަ މިލާނަށް ދިނުމަށް އަންނަނީ ވާހަކަ ދެކެވެމުންނެވެ. މީގެ އިތުރުން ސެވިއްޔާގެ ޑިފެންޑަރު ޖޫލްސް ކޫންޑޭ އާއި ބާސެލޯނާގެ ވިންގް އޮސްމާން ޑެމްބެލޭ ގެންނަން ވެސް ޗެލްސީ އަންނަނީ މަޝްވަރާތަކެއް ބާއްވަމުންނެވެ.
