މި މަހު ދެވަނަ ފަަހަރަށް މުދާ އުފުލުމުގެ ތެރޭގައި ބިއްލޫރި ޝީޓުތަކެއްގައި ދަށުވެ ބިދޭސީއަކު މަރުވެއްޖެ އެވެ.
ފުލުހުން ބުނި ގޮތުގައި ނ. މާކުރެއްދޫއަށް ސަޕްލައި ދޯންޏެއްގައި ގެންދިޔަ ކޮންޓެއިނަރަކުން މުދާ ހުސްކުރަން އުޅެނިކޮށް ތިން މީހަކަށް އަނިޔާވެގެން އުނގޫފާރު ހޮސްޕިޓަލަށް ގެންދިޔަ އެވެ.
އެ ހާދިސާގައި 28 އަހަރުގެ މީހަކަށާއި، 37 އަހަރުގެ މީހަކަށާއި، 38 އަހަރުގެ މީހަކަށް އަނިޔާވިއިރު، އުނގޫފާރު ހޮސްޕިޓަލުގައި ފަރުވާ ދެމުން ދަނިކޮށް މަރުވީ 28 އަހަރުގެ ބިދޭސީ މީހާ އެވެ.
މި މަހުގެ 12 ވަނަ ދުވަހު ހުޅުމާލެ ދެވަނަ ފިޔަވަހީގެ ޑިންގީ ޖެޓީ ސަރަހައްދުގައި ކޮންޓެއިނަރަކުން މާބަލް ޝީޓުތަކެއް ހުސްކުރަން އުޅުމުގެ ތެރޭގައި ދެ މީހަކު ތާށިވެ އަނިޔާ ލިބިގެން އެ ދުވަހު އެކަކު މަރުވި އެވެ. އެ ފަހުން ފަރުވާ ދެމުން ދަނިކޮށް އަނިޔާވި ދެވަނަ މީހާ ވެސް ވަނީ މަރުވެފަ އެވެ.
