އެމްޓީސީސީ ނޯތު ލީގުގެ ޑިވިޝަން ދޭއްގައި އިއްޔެ ކުޅުނު މެޗުތަކުން، ކުޅުދުއްފުށީ ޒިގްޒެގް ފޯ ޔޫތު ލިންކްއޭޖުން 3-1 އިން ޓީމު ހަނިމާދޫއާ ވާދަކޮށް މޮޅުވިއިރު، އަނެއް މެޗުގައި އިހަވަންދޫ ކްލަބް ޕޯލްސްޓާ އާއި ދިއްދޫ ބްލެކްޒީނޯއާ 1-1 އިން އެއްވަރުވެއްޖެ އެވެ.
ނޯތު ލީގުގެ ގްރޫޕް އޭގެ މެޗުތައް ހޯސްޓްކުރަނީ ދިއްދޫ އާއި ހަނިމާދޫގަ އެވެ. ވާދަކުރާ ރަށްތަކަކީ ނެއްލައިދޫ، އިހަވަންދޫ، ދިއްދޫ، ހަނިމާދޫ އަދި ކުޅުދުއްފުށްޓެވެ.
ހަނިމާދޫ ދަނޑުގައި އިއްޔެ ޒިގްޒެގް ފޯ ޔޫތު ލިންކްއޭޖު މޮޅުވިއިރު، އެ ޓީމުގެ ގޯލުތައް ޖެހީ އުސައިދު އަލީ، ޒައިދު މުހައްމަދު އަދި މުހައްމަދު ނަޝީދު އެވެ. ހަނިމާދޫގެ ހަމައެކަނި ގޯލު ޖެހީ އާސިފް ސަލީމް އެވެ. ދިއްދޫ ދަނޑުގައި ކުޅުނު މެޗުން އިހަވަންދޫ ޕޯލްސްޓާގެ މުހައްމަދު ސާޖިދު ލީޑުނަގައިދީފައިވަނިކޮށް މެޗު ނިމެން ދެ މިނިޓަށް ވެފައި އޮއްވައި، ބްލެކްޒީނޯ އަށް އެއްވަރުކޮށްދިނީ އާދަމް ނަސީމް އެވެ.
ނޯތު ލީގުގެ ޑިވިޝަން ދޭއްގެ ގްރޫޕް އޭގެ މެޗުތައް އަންނަ މަހު ހަތަރަކާ ހަަމަށް ދިއްދޫ އާއި ހަނިމާދޫގައި ކުރިއަށްދާނެ އެވެ.
އެފްއޭއެމުން 2023/2024 ވަނަ އަހަރު ދިވެހި ޕްރިމިއާ ލީގު ފުޅާކުރާއިރު، ރާއްޖެ ބެހިގެންދާނީ ހަަތަރު ޒޯން ލީގަކަށެވެ. ޒޯން އެކެއް ނުވަތަ ނޯތު ޒޯން ލީގުގައި ހިމެނެނީ ހއ، ހދ، ށ، ނ، ރ އެވެ. ނޯތު ޒޯންގެ ގްރޫޕް ބީ އަކީ ށ އަތޮޅުގެ ބުރެވެ. އެ މެޗުތައް ފަށާ ގޮތަށް ޝެޑިއުލްކޮށްފައި އޮތީ އަންނަ މަހު 17 ގަ އެވެ. އެ އަށް ފަހު ގްރޫޕް ސީ ނ. އަތޮޅުގެ މެޗުތައް، އޮގަސްޓް އެކެެއްގައި ފަށާއިރު، ގްރޫޕް ޑީ، ރ އަތޮޅު ފަށަން ނިންމާފައި އޮތީ އޮގަސްޓް 24 ގަ އެވެ.
ކޮންމެ ގްރޫޕަކުން ދެ ޓީމެއް، ޑިވިޝަން އެކަކަށް ޕްރޮމޯޓްވާނެ އެވެ. ޑިވިޝަން އެކެެއްގެ ޗެމްޕިއަން، 2023/2024 ވަނަ އަހަރުގެ ދިވެހި ޕްރިމިއާ ލީގަށް ޕްރޮމޯޓްވާނެ އެވެ.
ދިވެހި ޕްރިމިއާ ލީގު 2023/2024 ވަނަ އަހަރު ފަށާއިރު އޮންނާނީ މި ވަގުތު ވެސް ޕްރިމިއާ ލީގުގައި އޮތް އަށް ޓީމުގެ އިތުރުން ހަތަރު ޒޯން ލީގުގެ ޗެމްޕިއަނުންނެވެ. މީގެ ތެރެއިން މާލެ ހިމެނޭ ޒޯން ހަތަރެއްގެ ލީގުގެ ޗެމްޕިއަން ގޮތުގައި 2023/2024 ވަނަ އަހަރުގެ ލީގަށް ކަނޑައަޅާނީ 2022 ވަނަ އަހަރުގެ ދެ ވަނަ ޑިވިޝަނުގެ ޗެމްޕިއަނުން ކަމަށް ވަނީ ނިންމައިފަ އެވެ. ދެން އޮތް ތިން ޖާގަ ލިބޭނީ ޒޯން ލީގު ޗެމްޕިއަނުންނަށެވެ.
