ކ. ކުޑަގިރީގައި ތަރައްގީ ކުރަމުން އަންނަ ޕިކްނިކް އައިލެންޑުގެ މަސައްކަތް ނިމި، އަންނަ މަހުގެ 26 ހިސާބުގައި އެ ރަށަށް ދަތުރު ދެވޭނެ ކަމަށް އެ ރަށް ތަރައްގީ ކުރަމުން އަންނަ ސަރުކާރުގެ ކުންފުނިތަކުން ބުނެފި އެވެ.
ކުޑަގިރި ޕިކްނިކް އައިލެންޑުގެ މަސައްކަތް ކުރަމުން އަންނަ ސަރުކާރުގެ ކުންފުނިތަކުގެ އިސްވެރިންނާއެކު، ރައީސް އިބްރާހިމް މުހައްމަދު ސޯލިހާއި ނައިބު ރައީސް ފައިސަލް ނަސީމް މިއަދު ވަނީ އެ ރަށަށް ޒިޔާރަތް ކުރައްވައިފަ އެވެ.
މި ދަތުރުގައި ކުޑަގިރި ފެހިކުރުމަށް ކުރިއަށްގެންދާ ގަސް އިންދުމުގެ ޕްރޮގްރާމްގައި ރައީސާއި ނައިބު ރައީސް ވަނީ ބައިވެރިވެވަޑައިގެން ގަސް އިންދަވާފަ އެވެ.
އަދި، ރައީސް ވަނީ ވަކި ވަކި ކުންފުނިތަކުން އެ ރަށުގައި ކުރިއަށް ގެންދާ މަސައްކަތްތަކުގެ އަޕްޑޭޓް ވެސް ބައްލަވާލައްވައިފަ އެވެ.
ހަައުސިން ޑިވޮލޮޕްމެންޓު ކޯޕަރޭޝަން (އެޗްޑީސީ) އިން މާސްޓާ ޕްލޭން ތައްޔާރުކޮށް، ކުޑަގިރީގެ މަސައްކަތް ސަރުކާރުން ހަވާލުކޮށްފައިވާ ގޮތަށް ޖުލައި 26 އަށް ނިންމާ ދަތުރު ދެވެން ފަށާނެ ކަމަށް އެ ކޯޕަރޭޝަންގެ މެނޭޖިން ޑިރެކްޓަރު ސުހައިލް އަހުމަދު މިއަދު ވަނީ ވިދާޅުވެފަ އެވެ.
މާލެ ސަރަހައްދުގައި ދިރިއުޅޭ ރައްޔިތުން ޕިކްނިކް ދާނެ ރަށެއް ނެތް މައްސަލައަށް ހައްލެއް ހޯދައި ދިނުމަށް ކ. ކުޑަގިރި ފަޅު ހިއްކައިގެން ޕިކްނިކް އައިލެންޑެއް ހަދަން އެމްޓީސީސީއާ ހަވާލުކުރީ މިދިޔަ ސެޕްޓެމްބަރު މަހުގަ އެވެ.
ޕިކްނިކް އައިލެންޑް ތަރައްގީކުރުމުގެ މަޝްރޫއުގެ ދަށުން ދެ ރަށެއް ހިއްކިއިރު، މި ދެ ރަށުގައި ވެސް، ދަތުރުދާ މީހުންނަށް ހާއްސަކޮށްގެން ތަފާތު އެކި ވަސީލަތްތައް ގާއިމުކުރެވޭނެ އެވެ. އޭގެ ތެރޭގައި ކޮޓަރިތަކާއި، ޕޫލް ސަރަހައްދަކާއި، ފުޓްސަލް ދަނޑު ފަދަ ތަންތަން ހިމެނެ އެވެ.
