ވޮޝިންޓަން، އެމެރިކާ (ޖޫން 16) - ނަވާރަ ސަތޭކަ އަށްޑިހަ އެއް ވަނަ އަހަރު އެމެރިކާގެ ކުރީގެ ރައީސް ރޮނަލްޑް ރޭގަން އަވަހާރަކޮށްލަން މަސައްކަތް ކުރި ޖޯން ހިންކްލީ އެއްކޮށް މިނިވަންވެއްޖެ އެވެ.
ނަފްސާނީ ބަލިތަކަށް ފަރުވާދޭ ހޮސްޕިޓަލަކުން ހިންކްލީ ދޫކޮށްލީ މީގެ ހަ އަހަރު ކުރިންނެވެ. ނަމަވެސް ބުދަ ދުވަހާ ހަމައަށް އޭނާއަށް ފުރިހަމަ މިނިވަންކަމެއް ނުލިބެ އެވެ.
މި މަހުގެ ކުރީކޮޅު ވޮޝިންޓަންގެ ކޯޓަކުން ނިންމީ އަހަރުތަކެއް ވަންދެން ފަރުވާކޮށް، ހޯދާފައިވާ ކުރިއެރުމުގެ ސަބަބުން ހިންކްލީގެ ފަރާތުން އޭނާގެ އަމިއްލަ ނަފްސަށް އަދި އެހެން މީހަކަށް ވެސް ގެއްލުމެއް އޮތް ކަމަށް ނުބެލެވޭ ކަމަށެވެ.
ބުރާސްފަތި ދުވަހު ހިންކްލީ ކުރި ޓްވީޓެއްގައި ބުނީ 41 އަހަރާއި ދެ މަސް އަދި 15 ދުވަސް ފަހުން މިނިވަންކަން ލިބިއްޖެ ކަމަށެވެ.
މިހާރު އުމުރުން 67 އަހަރުގެ ހިންކްލީ، ކުރީގެ ރައީސް ރޭގަންގެ ހަށިކޮޅަށް އަމާޒުކޮށް ބަޑި ޖެހީ މާޗް 30، 1981 ވަނަ އަހަރު ވޮޝިންޓަންގެ ހިލްޓަން ހޮޓެލް ބޭރުގަ އެވެ.
އޭރު އޭނާ ބުނީ އެކަން ކުރީ އެކްޓްރެސް ޖޯޑީ ފޮސްޓާގެ ސަމާލުކަން ހޯދުމަށް ކަމަށެވެ. ފިލްމް "ޓެކްސީ ޑްރައިވާ" އިން ފޮސްޓާ ފެނުނު ފަހުން ހިންކްލީ ހުރީ "އޮބްސެސްވެފަ" އެވެ.
ރޭގަންގެ އިތުރުން އެހެން ތިން މީހުންގެ ގަޔަށް ވެސް އެ ދުވަހު ހިންކްލީ ބަޑި ޖެހި އެވެ. އެ އެންމެން ސަލާމަތްވި ނަމަވެސް، ރޭގަންގެ ޕްރެސް ސެކެޓްރީ ޖޭމްސް ބްރެޑީގެ ހަށިގަނޑުގެ އެއް ފަޅިން ވާގި ގޮސް، ފުރޮޅުލީ ގޮނޑި ބޭނުން ކުރަން ޖެހުނެވެ.
ހިންކްލީގެ ޝަރީއަތް 1982 ވަނަ އަހަރު ކުރިއަށް ދިޔަ އިރު، ކޯޓުން ނިންމީ ނަފްސާނީ ހާލަތަށް ބަލައިގެން ކުށް ސާބިތު ނުވާ ކަމަށެވެ. އޭރު އޭނާ ފޮނުވާލީ ނަފްސާނީ ބަލިތަކަށް ހާއްސަ ހޮސްޕިޓަލަކަށެވެ. އެ ތަނުގައި 34 އަހަރު ހޭދަކުރި އެވެ.
ސެޕްޓެމްބަރު 2016 ވަނަ އަހަރު އެ ހޮސްޕިޓަލުން ދޫކޮށްލި ނަމަވެސް، އޭނާއަށް ދިރިއުޅެން ޖެހުނީ އުމުރުން ދުވަސްވީ މަންމައާ އެކު "ގޭޓެޑް ކޮމިއުނިޓީ" އެއްގައި ގިނަ ޝަރުތުތަކާ އެކު އެވެ.
އެގޮތުން އޭނާ ދާ ތަންތަން ކަމާ ބެހޭ އިދާރާތަކުން ބެލުމާއި، އޭނާގެ އޮންލައިން އެކައުންޓްތަކާއި އިލެކްޓްރޯނިކް ޑިވައިސްތައް ބޭނުން ކުރާ ގޮތް މޮނީޓާ ކުރުން ހިމެނެ އެވެ.
އޭގެ އިތުރުން އެކްޓްރެސް ފޮސްޓާއަށް ގުޅަން މަސައްކަތް ކުރުން މަނާކޮށް، އެމެރިކާގެ އެއްވެސް ރައީސެއް، ނައިބު ރައީސެއް އަދި ކޮންގްރެސް މެމްބަރަކު ހުންނެވި ސަރަހައްދަކަށް ދަތުރު ކުރުން މަނާ ކުރި އެވެ. -- އޭއެފްޕީ --
