ފީނުމުގެ ތެރޭގައި ދިމާވާ ހިތާމަވެރި ހާދިސާތައް މަދުކޮށް، މަސްވެރިކަމުގެ ބޭނުންތަކަށް ފީނާ މީހުން ތަމްރީންކުރުމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އާއި ދިވެހި މަސްވެރިންގެ ޖަމިއްޔާއާ އެކު ތަމްރީން ޕްރޮގްރާމް ތަކެއް ފަށަން ނިންމައިފި އެވެ.
"މިފްކޯ މަސްވެރި ޑައިވަރުން ޕްރޮގްރާމް' ގެ ނަމުގައި ފަށާ އެ ޕްރޮގްރާމަކީ، ދިވެހި މަސްވެރިންގެ ތެރެއިން އެންދަމަން ޑައިވްކުރާ ފަޅުވެރިންނަށް ހާއްސަކޮށް ހިންގަން ނިންމާ ތަމްރީން ހަރަކާތްތަކެކެވެ.
"މަގުސަދަކީ މި ހަރަކާތުގެ ސަބަބުން ޑައިވިންއާއި ގުޅޭ ގިނަ މައުލޫމާތުތަކެއް މަސްވެރިންނަށް ލިބި އަދި އަމިއްލަ ރަށުގައި ހުރެގެން ހަރަދުކުޑަކޮށް މަސްވެރިންނަށް ޑައިވް ކޯސްތައް ލިބިގެން ދިއުން،" މިފްކޯ އިން ބުންޏެވެ.
މި ހަރަކާތުގެ ފުރަތަމަ ފިޔަވަހީގައި ހުވަދޫ އަތޮޅުގެ ރަށްތަކުގައި ޑައިވިން ކޯސްތައް ކުރިއަށް ގެންދިއުމަށް ހަމަޖެހިފައިވާ ކަމަށް މިފްކޯއިން ބުންޏެވެ. އެގޮތުން އޯޕަން ވޯޓާ ޑައިވިން، އެޑްވާންސް އޯޕަން ވޯޓާ ޑައިވިން، ރެސްކިއު އަދި އެމަޖެންސީ ފަސްޓް ރެސްޕޮންޑާ ކޯސް ހިންގުމަށް ވެސް ވަނީ ހަމަޖެހިފަ އެވެ.
ޑައިވީނަށް ގޮސްގެން އުޅެނިކޮށް މަރުގެ ގިނަ ހާދިސާތަކެއް މި ފަހުން ވެސް ހިނގާފައިވެ އެވެ. މޭ މަހުގެ ތެރޭގައި ފުވައްމުލަކުގައި ވެސް މިފަދަ ހާދިސާއެއް ވަނީ ހިނގައިފަ އެވެ.
