ޕާކިސްތާނުގެ އިގްތިސާދު ހުއްޓުމެއް ނެތި ކުރިއަށް ގެންދިޔުމަށް އެ ގައުމުގެ ރައްޔިތުން ސައި ބޯ މިންވަރު މަދު ކުރަން ސަރުކާރުގެ މިނިސްޓަރަކު އެދިވަޑައިގެންފި އެވެ.
އިސް މިނިސްޓަރު އަހްސަން އިގްބާލް ވިދާޅުވި ގޮތުގައި ސައި ބުއިން މަދު ކުރުމުން، އެ ގައުމުގެ އިމްޕޯޓަށް ހޭދަވާ މިންވަރު ކުޑަ ކުރެވޭނެ އެވެ.
ޕާކިސްތާނުގެ ބޭރު ފައިސާގެ ރިޒާވް ވަރަށް ބޮޑަށް ދަށްވެފައިވާ އިރު، މި ވަގުތު ހުރީ ކުރިއަށް އޮތް ދެ މަހުގެ އިމްޕޯޓަށް ފައިސާ ދެއްކޭ ވަރުގެ ޑޮލަރެވެ.
ދުނިޔޭގައި އެންމެ ގިނައިން ސައިފަތް އިމްޕޯޓް ކުރާ ގައުމަކީ ޕާކިސްތާނެވެ. މިދިޔަ އަހަރު އެކަނިވެސް 600 މިލިއަން ޑޮލަރުގެ ސައިފަތް އެ ގައުމަށް އެތެރެ ކުރި އެވެ.
"އަޅުގަނޑު ރައްޔިތުންގެ ކިބައިން މި އެދެނީ ކޮންމެ ދުވަހަކު ވެސް ސައި ބޯ މިންވަރު އެއް ތަށި ނުވަތަ ދެ ތަށި މަދުކޮށްލަން. އަޅުގަނޑުމެން ސައިފަތް އެތެރެ ކުރަނީ ލޯނު ނަގައިގެން،" އިގްބާލް ވިދާޅުވި ކަމަށް ޕާކިސްތާނުގެ ނޫސްތަކުން ރިޕޯޓު ކުރި އެވެ.
އޭގެ އިތުރުން ކަރަންޓު ހަރަދު ކުޑަ ކުރުމުގެ ގޮތުން ވިޔަފާރު ކުރާ ފަރާތްތަކުން ވެސް ފިހާރަތަކާއި ގޮޅިތައް ރޭގަނޑު 08:30 ގައި ބަންދު ކުރެވޭނެ ކަމަށް އޭނާ ވިދާޅުވި އެވެ.
މިދިޔަ ފެބްރުއަރީ މަހު ޕާކިސްތާނުގެ ބޭރު ފައިސާގެ ރިޒާވްގައި ހުރީ 16 ބިލިއަން ޑޮލަރެވެ. ޖޫން މަހުގެ ފުރަތަމަ ހަފްތާއާ ހަމައަށް އައި އިރު، އެ އަދަދު ވަނީ 10 ބިލިއަން ޑޮލަރަށް ވުރެ މަދުވެފަ އެވެ.
މިދިޔަ މަހު އޮފިޝަލުން ވަނީ ލަގްޒަރީ ތަކެތީގެ ގޮތުގައި ބެލެވޭ ބައެއް ތަކެތި އިމްޕޯޓް ކުރުން މަނާކޮށްފަ އެވެ.
އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ ބެއިލްއައުޓް ޕްރޮގްރާމެއްގެ ދަށުން ހަ ބިލިއަން ޑޮލަރު ހޯދަން މީގެ ކުރިން ޕާކިސްތާން ސަރުކާރުން މަސައްކަތް ކުރި އެވެ.
ދެހާސް ނަވާރަ ވަނަ އަހަރު ކުރި މަޝްވަރާގެ ދަށުން ފައިސާ ލިބެން ހަމަޖެހިފައި ވަނިކޮށް، ޕާކިސްތާނުގެ މާލީ ހާލަތާ ގުޅޭ ގޮތުން ފައިސާ ދޭ ފަރާތްތަކުން ކަންބޮޑުވުން ފާޅު ކުރުމުން އައިއެމްއެފްގެ ޕްރޮގްރާމް މަޑުޖައްސާލަން ނިންމި އެވެ.
މިދިޔަ ހަފްތާގައި ކެބިނެޓުން އާއްމު 47 ބިލިއަން ޑޮލަރުގެ އާ ބަޖެޓާ އެކު ބޮޑު ވަޒީރު ޝެހްބާޒް ޝަރީފްގެ ސަރުކާރުގެ އުއްމީދަކީ އައިއެމްއެފްގެ މަޝްވަރާ ފެށުމެވެ. -- ބީބީސީ --
