މާލޭގައި ފެންވަރު ރަނގަޅު ޕަބްލިކް ޓްރާންސްޕޯޓް ނިޒާމެއް ގާއިމުކުރަން, މިނީ ބަހުގެ ހިދުމަތް އަންނަ މަހު ދޭން ފަށާނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ)އިން މިއަދު ބުނެފި އެވެ.
މާލޭގައި މިނީ ބަހުގެ ހިދުމަތް ތައާރަފު ކުރުމަކީ ރައީސް އިބްރާހިމް މުހައްމަދު ސޯލިހްގެ 100 ދުވަހުގެ ރިޔާސީ ވައުދެކެވެ. ނަމަވެސް މި ސަރުކާރަށް ހަތަރު އަހަރުވީ އިރުވެސް އެ ވައުދު ނުފުއްދި އޮތް އިރު އެ ހިދުމަތް ފަށަން ތަފާތު ތާރީހުތައް ދީފައިވެ އެވެ. ނަމަވެސް ފަށާފަ އެއް ނުވެ އެވެ.
އެމްޓީސީގެ އިތުރުން ޝީޝާ އާއި އެލައިޑުން ގުޅިގެން "ރައްކާ ރޯޑް ސޭފްޓީ ޕާޓްނާޝިޕް"ގެ ނަމުގައި ފުލުހުންނާ އެކު މިއަދު ބޭއްވި ބައްދަލުވުމުގައި ވާހަކަ ދައްކަވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ މާދަމާ މާލެ ތެރެއަށް ގިނަ އަދަދެއްގެ ބަސް ނުކުންނާނެ ކަމަށެވެ.
އަދި އަންނަ މަހުން ފެށިގެން މާލޭގައި މިނީ ބަސް ދުއްވަން ފަށާނެ ކަމަށް އާޒިމް ވިދާޅުވި އެވެ.
"މާދަމާއިން ފެށިގެން އަޅުގަނޑުމެން 50 އަށްވުރެ ގިނަ ބަސް މާލޭ ސަރަހައްދުގައި ދުއްވަން ފަށާނެ. މިއީ ވަރަށް ބައިވަރު ބަސް. އަދި ޖުލައި މަހުން ފެށިގެން މިނީ ބަހުގެ ހިދުމަތް ފެށިގެން ދާނެ މާލެ ސަރަހައްދުގައި،" އާޒިމް ވިދާޅުވި އެވެ.
މިނީ ބަހުގެ ހިދުމަތް ނުފެށި ލަސްވެފައި ވަނީ އެކަމަށް ބޭނުންވާ ވަރަށް ފައިސާ ނެތުމުން ކަމަށާއި ހިލޭ އެހީގެ ދަށުން ފައިސާ ހޯދަން މަސައްކަތް ކުރަމުންދާ ކަމަށް ޓްރާންސްޕޯޓް މިނިސްޓަރު އައިޝަތު ނަހުލާ މީގެ ކުރިން ވަނީ ވިދާޅުވެފަ އެވެ.
2020ވަނަ އަހަރު އެ މަސައްކަތް ފެށުމަށް ނިންމާ އެކަން ކުރުމަށްޓަކައި 2019ވަނަ އަހަރު އެމްޓީސީސީއާއެކު އެއްބަސްވުމެއްގައިވެސް ވަނީ ސޮއިކޮށްފަ އެވެ.
އަދި ތިމާވެއްޓާ ރައްޓެހި ގޮތަކަށް ކަސްޓަމައިޒްކޮށްފައިވާ ބަސްތަކެއް ފޯރުކޮށްދޭނެ ފަރާތެއް ހޯދި ކަމަށާއި ނަމަވެސް އެ ބަސްތައް ނުގެނެވުނީ ފައިސާގެ ދަތިކަން ހުރުމުން ކަމަށް ކުރިން ޓްރާންސްޕޯޓް މިނިސްޓްރީން އޭރު ވަނީ ބުނެފަ އެވެ.
