ހިތަދޫ މެދު ދާއިރާގެ ކުރީގެ މެމްބަރު ރިޓަޔާޑް ބްރިގޭޑިއާ ޖެނެރަލް އިބްރާހިމް މުހައްމަދު ދީދީ ސްޓެލްކޯގެ ޗެއާމަނަކަށް މިއަދު އައްޔަންކޮށްފި އެވެ.
ކަރަންޓު ކުންފުނި ސްޓެލްކޯއަށް އާ ޗެއާމަނަކު ސަރުކާރު ކުންފުނިތަކުގެ ބެލެނިވެރި ޕްރައިވެޓައިޒޭޝަން އެންޑް ކޯޕަރައިޓައިޒޭޝަން ބޯޑު (ޕީސީބީ)ން މިހަމަޖެއްސީ ކުރިން އެ މަގާމުގައި ހުންނެވި މުހައްމަދު ރަޝީދު އަވަހާރަވުމާ ގުޅިގެން، އެ މަގާމު ހުސްކޮށް އޮންނަތާ ފަސް މަހަށް ވުރެ ގިނަ ދުވަސް ފަހުންނެވެ.
ރަޝީދުގެ ބަދަލުގައި އެ މަގާމަށް ހަމަޖެއްސި ޑީޑީއަކީ ވެރިކަން ކުރާ ކޯލިޝަނުގެ މައި ޕާޓީ އެމްޑީޕީގެ މެމްބަރެކެވެ.
އޭނާއަކީ ގިނަ ދުވަސްތަކެއް ވަންދެން ސިފައިންގޭގައި މަސައްކަތްކުރެއްވުމަށް ފަހު، ސިޔާސީ ދާއިރާއަށް ނިކުމެވަޑައިގަތް ބޭފުޅެކެވެ. އަދި ކުޑަ ދުވަސްކޮޅެއްގެ ތެރޭގައި ސިޔާސީ ގޮތުން މަގުބޫލުކަން ހޯއްދަވާ އެމްޑީޕީގެ ޓިކެޓުގައި ރައްޔިތުންގެ މަޖިލިހަށް އިންތިހާބުވެވަޑައިގެންނެވި އެވެ.
އެކަމަކު އެންމެ ފަހުން ބޭއްވި މަޖިލިސް އިންތިހާބުގައި އޭނާ ކުރިމަތިނުލައްވަ އެވެ. އެއީ މިހާރު އެ ދާއިރާގެ މެމްބަރަކަށް ހުންނެވި ހިޔަލީ އަހުމަދު ރަޝީދުއާ ވާދަކޮށް އެމްޑީޕީ ޕްރައިމަރީގައި ނާކާމިޔާބީއާ ކުރިމަތިލައްވަން ޖެހިވަޑައިގަތުމުންނެވެ.
މިފަހުން ޕީސީބީން ސްޓެލްކޯގެ ބޯޑަށް ވަނީ އެހެން ބަދަލެއް ވެސް ގެނެސްފަ އެވެ.
އެގޮތުން ކުރިން މެނޭޖިން ޑިރެކްޓަރު މަގާމުގައި ހުންނެވި ހަސަން މުގުނީ ވަކިކުރެއްވުމަށް ފަހު، އިލެކްޝަންސް ކޮމިޝަނުގެ ކުރީގެ ރައީސް އަހުމަދު ޝަރީފަށް ވަނީ އެމްޑީކަން ދީފަ އެވެ. މިއީ ސީދާ ރައީސް އޮފީހުން އަންގައިގެން ކުންފުނީގެ މަތީފަޑިއަށް ގެނައި ބަދަލުތަކެއް ކަމަށް ޕީސީބީން ބުނެ އެވެ. ނަމަވެސް އެ ބަދަލުތައް ގެނައި ސަބަބެއް މިއަދާ ހަމައަށް ވެސް ނުބުނެ އެވެ.
