ކަތިވަޅިތަކަކުން ހަމަލާދީ 2015 ވަނަ އަހަރު މާލޭގައި މަރައިލި ޖައިލަމް އަހުމަދު ޝާކިރުގެ މައްސަލައިގައި ދައުލަތުން ދައުވާ ކުރި މީހުންގެ ތެރެއިން ތިން މީހަކަށް ކްރިމިނަލް ކޯޓުގައި ކުށް ސާބިތު ނުވި މައްސަލަ ހައިކޯޓުގައި އިސްތިއުނާފްކޮށްފި އެވެ.
މި މައްސަލައިގައި ދައުލަތުން ދައުވާ ކުރީ އިސްމާއިލް އަނީގާއި މުހައްމަދު ހުމައިދާއި އަލީ އިރުފާން އަދި ނަސީބު ސައީދުގެ މައްޗަށެވެ. އޭގެ ތެރެއިން އަނީގް އަދި ހުމައިދުގެ މައްޗަށް ކުރީ މީހަކު މެރުމުގެ ދައުވާ އެވެ. އިރުފާން އަދި ނަސީބު ސައީދުގެ މައްޗަށް އުފުލީ މީހަކު މެރުމުގައި ބައިވެރިވިކަމުގެ ދައުވާ އެވެ.
މި ހަތަރު މީހުންގެ މައްޗަށް ވެސް ދަށު ކޯޓުގައި ކުށް ސާބިތުވެފައިނުވާއިރު، ހައިކޯޓުގެ ރަޖިސްޓްރީން ދައްކާ ގޮތުން ނަސީބު ސައީދުއާއި، އިރުފާންއާއި، އަނީގްގެ މައްސަލަ ވަނީ ހައިކޯޓުގައި ރަޖިސްޓްރީކޮށްފަ އެވެ. ހުމައިދުގެ މައްސަލައެއް ހައިކޯޓުގެ ރަޖިސްޓްރީގައެއް ނެތެވެ.
"ހުމައިދުގެ މައްސަލަ އިސްތިއުނާފް ނުކުރީ އޭނާގެ މައްސަލަ އިސްތިއުނާފް ކުރެވޭ ވަރަށް ހެކިބަސް ނުލިބުމުން، ދެން ތިބި މީހުންގެ މައްޗަށް އެ ވަރަށް ހެކިބަސް ލިބުމުން އިސްތިއުނާފްކޮށްފައި ވާނެ،" ޕަބްލިކް ޕްރޮސެކިއުޓަރު އަހްމަދު ޝަފީއު މި ނޫހަށް ކިޔައިދެއްވި އެވެ.
މި މައްސަލާގައި ކްރިމިނަލް ކޯޓުގެ ހުކުމް އިއްވަމުން މައްސަލަ ބެއްލެވި ގާޒީ ވިދާޅުވީ ހާދިސާ ހިނގި ތަނުން ނެގި ފޮރެސިން ސާމްޕަލްތަކާއި ފިންގާ ޕްރިންޓްތައް ދައުވާ ލިބޭ ފަރާތްތަކާއި ގުޅުވާލެވިފައި ނުވާ ކަމަށެވެ.
އެ މައްސަލައިގައި ހިމެނޭ ހެކިން ލައްވައި، ފުލުހުން ގަދަކަމުން ބަޔާން ނަގާފައިވާކަން ފާހަގަ ކުރެވިފައިވާ ކަމަށް ވެސް ގާޒީ ވިދާޅުވެފައިވެ އެވެ.
އެ މައްސަލައިގެ ވީޑިއޯ ފޫޓޭޖް އެނަލިސިސް ރިޕޯޓު ހާދިސާއާ ގުޅުވާލެވިފައިނުވާ ކަމަށް ވެސް ގާޒީ ވިދާޅުވެފައިވެ އެވެ. އެއީ އެ ފޫޓޭޖްތަކުގެ ޗެއިން އޮފް ކަސްޓަޑީ ހުށަހަޅާފައި ނުވުމުން ކަމަށް ގާޒީ ވިދާޅުވި އެވެ.
ޖައިލަމްގެ ހަށިގަނޑުގެ ވަރަށް ގިނަ ތަންތަނަށް ކަތިވަޅިން ހަމަލާދީފައި ހުއްޓެވެ. އޭޑީކޭ ހޮސްޕިޓަލަށް ގެންދިޔައިރު ވެސް އޭނާ އޮތީ މަރުވެފަ އެވެ. ފުލުހުން ބުނީ ޖައިލަމަށް ހަމަލާދިނީ މާލޭގައި ހަރަކާތްތެރިވާ ގޭންގަކުން ކަމަށެވެ.
