ސަރުކާރަށް ގަނެފައިވާ ތ. ފުނައްޑޫގައި ގާއިމްކޮށްފައިވާ މަސް ފެކްޓްރީ އޮޕަރޭޝަނަށް ގެނެވޭނީ އަންނަ އަހަރުގެ މެއި މަހުގެ ތެރޭގައި ކަމަށް ފިޝަރީޒް މިނިސްޓަރު ޑރ. ހުސައިން ރަޝީދު ހަސަން މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ތިމަރަފުށި ދާއިރާގެ މެމްބަރު އަބްދުﷲ ރިޔާޒް، ލިޔުމުން ޖަވާބު ހޯއްދަވާ ގޮތަށް ފިޝަރީޒް މިނިސްޓަރު ޑރ. ހުސައިން ރަޝީދު ހަސަންއާ ކުރެއްވި ސުވާލަކަށް އޭނާ މިއަދު ދެއްވި ޖަވާބުގައި އޭނާ ވިދާޅުވީ އެ ރަށު މަސް ފެކްޓަރީގެ ހާލަތު ބެލުމަށް ހެދި އެސެސްމެންޓުން އެ ރަށުގެ ބަނދަރުގެ ބޮޑު މަރާމާތެއް ކުރުމަށް ބޭނުންވާ ކަން ހާމަވެފައިވާ ކަމަށެވެ.
"ބަނދަރު ހެދުމާއެކު މުޅި ފެސިލިޓީ އެއްކޮށް މަރާމާތުކޮށް، މަސް ގަނެވޭ ހާލަތަށް ގެނައުމަށް ކުރަން ޖެހޭ މަސައްކަތްތަކަށް 10.2 މިލިއަން އެމެރިކާ ޑޮލަރު (157.3 މިލިއަން ރުފިޔާ) ހަރަދު ކުރަން ޖެހޭނެ ކަމަށް ވަނީ އަންދާޒާ ކޮށްފަ،" މިނިސްޓަރު ވިދާޅުވި އެވެ.
ފިޝަރީޒް މިނިސްޓަރު ދެއްވި ޖަވާބުގައި އިތުރަށް ވިދާޅުވީ މި ފައިސާއަކީ ބަޖެޓުގައި ހިމެނިފައިވާ ފައިސާއަށް ނުވާތީ އާއި ދައުލަތުގެ ކޭޝްފްލޯ ހުރި ގޮތުން ބޭނުންވާ ވަރަށް ފައިސާ ދޫކުރުމުގައި ދަތިތަކެއް ހުރުމުން، އެ ފައިސާ ލޯނުގެ ގޮތުގައި ހޯދުމަށް މިހާރު އަންގާފައިވާ ކަމަށެވެ.
އެހެންނަމަވެސް، މިފްކޯގެ މާލީ ހާލަތު ހުރި ގޮތުން ލޯނެއް ނެގުމަށް ދެ މަސް ދުވަސް ހޭދަވާނެ ކަމަށް ބެލެވޭ ކަމަށް ވިދާޅުވި އެވެ.
ބޭނުންވާ ލޯނު ހަމަޖެހި، ފުނައްޑޫއަށް މަސް ގަންނަން ފެށޭނީ އަންނަ އަހަރުގެ މެއި މަހަށް ކަމަށް ލަފާކޮށްފައިވާ ކަމަށް އޭނާ ވިދާޅުވި އެވެ.
ތ. ތިމަރަފުށްޓާ ދާދި ކައިރީގައި އޮންނަ ފުނައްޑޫގައި މަސް ބަންދުކުރާ ކާރުހާނާއެއް އަޅަން، ކުރީގެ ހޯމް މިނިސްޓަރު އަދި ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެމްބަރު އަހުމަދު ތަސްމީން އަލީ ހިއްސާވާ ކުންފުންޏަކަށް އެ ރަށް ދޫކުރީ ކުރީގެ ރައީސް މައުމޫނު އަބްދުލް ގައްޔޫމުގެ ވެރިކަމުގަ އެވެ.
އެ ރަށުގައި މަސްފެކްޓްރީއެއް ހަދައިގެން ހިންގާތާ އަަހަރުތަކެއް ފަހުން ބޭންކް އޮފް މޯލްޑިވްސްއަށް އެ ރަށް ނަގައި ވިއްކައިލަން އިއުލާނު ކުރީ ފުނައްޑޫ ޓޫނާ ޕްރޮޑަކްޓްސް ޕްރައިވެޓް ލިމިޓެޑުން ނަގާފައިވާ ލޯނެއް ނުދެއްކުމުންނެވެ. އެރަށާއި އެހެން ބައެއް ތަންތަން ރަހުނުކޮށްގެން ނަގާފައިވާ ލޯނާއި އެލޯނަށް އިތުރުވި އިންޓަރެސްޓާއި އެކު ބޭންކަށް ދައްކަން އޭރު 200 މިލިޔަން ރުފިޔާއަށް ވުރެ ގިނަ ފައިސާ އޮތެވެ.
ފުނައްޑޫ ވިއްކައިލަން ބީއެމްއެލް އިން ފުރަތަމަ އިއުލާނު ކުރީ 2013 ވަނަ އަހަރު އެވެ. އެފަހަރު ގަންނާނެ ބަޔަކު ނުވެގެން 2014 ވަނަ އަހަރު ދެވަނަ ފަހަރަށް ވެސް އިއުލާނު ކުރި އެވެ. އެންމެފަހުން އެ ރަށް ގަނެފައިވަނީ ސަރުކާރުންނެވެ.
