ރައްޔިތުންގެ މަޖިލީހުގައި އިދިކޮޅުން ހުށަހަޅާ މައްސަލަތައް ބަހުސް ނުކުރުމަކީ މި ފަހަކުން އައިސް މެންބަރުން އަބަދުވެސް ފާޅުކުރަމުން އަންނަ ކަންބޮޑުވުމެކެވެ. އިއްޔެގެ ޖަލްސާއަކީ ވެސް އެފަދަ ދުވަހެކެވެ.
އެމްޑީޕީގެ ކުރީގެ ޕީޖީ ލީޑަރު، މެދު ހެންވޭރު ދާއިރާގެ މެމްބަރު އަލީ އާޒިމް ކަންބޮޑުވުން ފާޅުކުރެއްވީ ތަކެތީގެ އަގުބޮޑުވުމާ ގުޅިގެން، އަގުތައް ތިރިކުރުމަށް ސަރުކާރަށް ގޮވާލުމަށް، މަޑުއްވަރީ ދާއިރާގެ މެންބަރު އާދަމް ޝަރީފް ހުށަހެޅުއްވި މައްސަލަ ބޭރުކޮށްލުމާ ގުޅިގެންނެވެ.
އެ މައްސަލަ މަޖިލީހަށް ބަލައިގަތުމަށް ފެނޭތޯ ނެގި ވޯޓުގައި މައްސަލަ ބަލައިގަތުމަށް ފެންނަ ކަމަށް ނުވަ މެންބަރުން ވޯޓު ދެއްވިއިރު، ބަލައިގަތުމަށް ނުފެންނަ ކަމަށް 29 މެންބަރުން ވޯޓު ދެއްވި އެވެ. އެހެންވެ، ބަހުސް ކުރުމެއް ނެތި މައްސަލަ ބޭރުވި އެވެ.
އެކަމާ ގުޅިގެން އާޒިމް ވިދާޅުވީ ރައްޔިތުންނާ ސީދާ ގުޅުން ހުރި ކަންކަމަށް ބަހުސް ނުކޮށް، އެހެން ކަންކަމަށް ބަހުސް ކުރަން ޖެހުމަކީ ވަރަށް އުނދަގޫ ކަމެއް ކަމަށާއި ފުރަތަމަ އިސްވާނީ ރައްޔިތުން ކަމަށެވެ.
"އަޅުގަނޑުމެން ހޮވާފައި ތިބީ ރައްޔިތުން، ދެން ޕާޓީ، ޕާޓީގެ ވާހަކައަކީ ރައްޔިތުންގެ ވާހަކަ، ދެން ރައްޔިތުންގެ ވާހަކަ ނުދައްކާ ސަރުކާރުގެ ވާހަކަ ދައްކަން ނުޖެހޭނެ، ޝައްކެއް ވެސް ނެތް،" އާޒިމް ވިދާޅުވި އެވެ.
އާދަމް ޝަރީފް ހުށަހެޅުއްވި މައްސަލަ ބޭރުކޮށްލުމުން، މިހާރު ހިނގަމުންދާ 19 ވަނަ މަޖިލީހާއި ކުރީގެ ރައީސް އަބްދުﷲ ޔާމީންގެ ވެރިކަމުގައި އޮތް 18 ވަނަ މަޖިލީހާ އޮތް ތަފާތަކީ ކޮބައިތޯ ސުވާލު އުފެދޭ ކަމަށް އާޒިމް ވިދާޅުވި އެވެ.
"ރައީސް ޔާމީން ކޮންޓްރޯލް ކުރި 18 ވަނަ މަޖިލީހެކޭ، ވަކި 19 ވަނަ މަޖިލީހެކޭ، އަޅުގަނޑުމެން ކިޔަން 19 ވަނަ މަޖިލިސް ތަފާތޭ، ކުޑަކޮށް ތަފާތު އެނގޭތޯ، އެއީ އަޅުގަނޑުމެންނަށް މި ވާހަކަ މިތަނުގައި ދައްކަން ކެރުނީމާ،" އާޒިމް ވިދާޅުވި އެވެ.
އާޒިމް ވަނީ ރައްޔިތުން ބަނޑުފުރާ މުއްތި ކުރުމުގެ ވާހަކަ މަޖީލިހުގައި ނުދެކެވޭނަމަ، ޖުޑީޝަރީ އަށް އިސްލާހު ގެނައުމުގެ ވާހަކަ ދެއްކުމުގެ ބޭނުމެއް ނެތް ކަމަށް ވިދާޅުވެ ބަހުސް ނިންމަވާލައްވާފަ އެވެ.
ޖަލްސާގެ ހާޒިރީ
ހާޒިރުވެވަޑައިގެންނެވީ: 34 މެމްބަރުން
ސަލާމުގައި: 04
މީގެ އިތުރުން، މަޖިލީހުގެ މިއަދުގެ ޖަލްސާގައި އެޑިއުކޭޝަން މިނިސްޓަރު އައިޝަތު އަލީ ހާޒިރުކޮށް ސުވާލު ކޮށްފައި ވެސް ވެ އެވެ.
އަދި، އެމެރިކާގައި މިހާރު ހުންނަވާ ތިލްމީޒާ ހުސައިންގެ ބަދަލުގައި އިތުރު ބޭފުޅަކު އެ މަގާމަށް އައްޔަން ކުރުމަށް ވެސް މަޖިލީހަށް ހުށަހަޅާފައިވެ އެވެ. އެ މައްސަލަ ވަނީ ހާރިޖީ ކޮމިޓީއަށް ފޮނުވާފަ އެވެ.
މިއަދުގެ ފޮޓޯ
މަޖިލީހުގެ މިއަދުގެ ޖަލްސާގެ ތެރެއިން--
މިއަދުގެ ކޯޓޭޝަން
"އަޅުގަނޑުމެން އަނެއްކާވެސް ގާނޫނު އަސާސީއަށް އަމަލުކުރަން ފެށިތާ މިތައް އަހަރެއް ވުމަށް ފަހުގައި ދެން ކުރާންވީ ކަންކަމަކީ ކޮބައިތޯ ޖުމްލަކޮށް ބަލައިލުމުގެ ބޭނުންތެރިކަން އެބައޮތް، އެއީ ޖޭއެސްސީއަށް ގެންނަން ޖެހޭ ބަދަލު އެކަންޏެއް ނޫން؛ އަޅުގަނޑު ހިތުން މޯލްޑިވިއަން ޑިމޮކްރެޓިކް ޕާޓީން ފުރުސަތު ބޭނުން ކުރާނީ ގާނޫނު އަސާސީއަށް ޖުމްލަކޮށް ގެންނަންހުރި ކަންކަމާ ގުޅޭ ގޮތުން ހިނގާ މަޝްވަރާއެއްގައި،" ރައީސް ނަޝީދު
