މީޑިއާނެޓުން ބޭއްވި "އެމްއެސް ޝޯޓް މޫވީ ޗެލެންޖް"ގެ ފަހުރުވެރި އެއްވަނަ "އިހްތިޔާރު" ކުރު ފިލްމަށް ލިބިއްޖެ އެވެ.
ދެވަނަ ލިބިފައި ވަނީ ފިލްމު "ހިމިތި" އަށެވެ. ތިންވަނަ ލިބުނީ "ދެ ލެޓާ" އަށެވެ.
"އެމްއެސް ޝޯޓް މޫވީ ޗެލެންޖް"ގެ ނަތީ ޖާފާޅުކޮށް ވަނަތައް ހާސިލްކުރި ފަރާތްތަކަށް ފައިސާގެ އިނާމު ހަވާލުކުރުމަށް ޗަމްޕާ ސެންޓްރަލްގައި މި އިވެންޓް ބޭއްވީ މި މަހު 11 ވަނަ ދުވަހު އެވެ. މި ހަފުލާގައި ފިލްމުތައް ބައިވެރިކުރި ފަރާތްތަކާއި ބައެއް މީޑިއާތަކުން ބައިވެރިވި އެވެ.
ފިލްމު އުފެއްދުމުގެ މަސައްކަތްކުރުމަށް ބޭނުންވާ ޒުވާން އާ ފަންނާނުން މި ދާއިރާއަށް ނެރެ ބާރުވެެރިކުރުވުމަށް މީޑިއާނެޓުން ބޭއްވި މި މުބާރާތުން އެއްވަނައަށް ދިޔަ ފިލްމަށް އެއްލައްކަ ރުފިޔާ، ދެވަނައަށް ދިޔަ "ހިމިތި" އަށް 50،000 ރުފިޔާ އަދި ތިންވަނައަށް ދިޔަ "ދަ ލެޓާ"އަށް 30،000 ރުފިޔާ މީޑިއާނެޓުން ދީފައިވެ އެވެ.
ވަނަތައް ހާސިލްކުރި ފަރާތްތަކަށް ފައިސާގެ ޗެކް ހަވާލުކޮށްދެއްވީ މީޑިއާނެޓްގެ ހެޑް އޮފް މާކެޓިން ޒިހުނީ ރަޝީދު އެވެ.
"އެމްއެސް ޝޯޓް މޫވީ ޗެލެންޖް"ގައި ނުވަ ފިލްމު ބައިވެރިކޮށްފައިވެ އެވެ. އެ ފިލްމުތަކަކީ:-
"އިހްތިޔާރު" - ލޯރ
"ހިމިތި" - އިސްމާއީލް އާސިފް
"ދަ ލެޓާ" - އަލީ ޝާމިން
"ހަށި" - މުހައްމަދު ޝަނޫން
"ނަޒަރު" - ލައިޓްސް އައުޓް
"މޫވީ ނައިޓް" - މިފްޒާ ހަސަން
"ހައްގު ނިޔާ" - ރީޝާ ޝަރީފް
"ބްލޫސް" - ޝިއްމަ
"ގާޑަން ތެރޭ އުދުހިލާ" - ސްލޯ ޓޭޕް
ސާޅީސް މިނެޓަށް ވުރެ ދިގުނުވާ ގޮތަށް، ސިޔާސީ ނުވަތަ ދީނާ ދެކޮޅު މަންޒަރާއި އަޑު ނުހުންނަ ގޮތަށް، ތައްޔާރު ކޮށްފައިވާ މި ފިލްމުތަކަށް އިންސާފުކޮށްފައިވަނީ ފަނޑިޔާރުން އަދި ބެލުންތެރިންގެ އެންމެ މަގުބޫލުކަން ލިބުނު އުފެއްދުންތަކަށް ބަލައިގެންނެވެ.
