ޕެރިސް (ޖޫން 13) - ޕީއެސްޖީގެ ކޯޗުކަމުން މައުރީސިއޯ ޕޮޗެޓީނޯ ވަކިކުރަން ނިންމާފައިވާއިރު، އޭނާގެ ކޮންޓްރެކްޓްގައިވާ ބާކީ މުއްދަތަށް 21 މިލިއަން ޑޮލަރު ޕީއެސްޖީން ދައްކަން ޖެހޭނެ ކަމަށް ރިޕޯޓްތައް ބުނެފި އެވެ.
ފާއިތުވި ހަފްތާގައި ކުރެވުނު މަޝްވަރާތަކަށް ފަހު ޕީއެސްޖީން ވަނީ ޕޮޗެޓީނޯ މަގާމުން ވަކިކުރަން ނިންމައިފަ އެވެ. ޕޮޗެޓީނޯއާ އެކު ޕީއެސްޖީން ހަދާފައިވާ ކޮންޓްރެކްޓްގައި ބާކީ އެއް އަހަރު އެބައޮތެވެ. ޕީއެސްޖީން ޕޮޗެޓީނޯ ވަކިކުރާއިރު، 21 މިލިއަން ޑޮލަރު ދައްކަން ޖެހޭނެ އެވެ. އެއީ ބާކީ އަހަރަށް ޕޮޗެޓީނޯ އާއި ކޯޗިން ސްޓާފުންނަށް ދޭން ޖެހޭ ބަދަލެކެވެ.
މީގެ ކުރިން ޕީއެސްޖީން 2018 ވަނަ އަހަރު އެ ޓީމުގެ ކޯޗަކަށް ހުރި، ތޯމަސް ޓުޗެލް މަގާމުން ވަކިކުރިއިރު، ބަދަލެއްގެ ގޮތުގައި ވަނީ 8.3 މިލިއަން ޑޮލަރު ދައްކައިފަ އެވެ. އަދި 2016 ވަނަ އަހަރު، ޕީއެސްޖީ އަށް ކޯޗެއްގެ ގޮތުގައި މަސައްކަތް ކުރި، ލޯރެންޓް ބްލޮންކް މަގާމުން ވަކިކުރިއިރު، ޕީއެސްޖީން 23 މިލިއަން ޑޮލަރު ދައްކަން ޖެހުނެވެ.
މި ސީޒަނުގައި ޕީއެސްޖީން ވަނީ ޕޮޗެޓީނޯ، 50، ގެ ކޯޗުކަމުގައި ފްރެންޗް ލީގާއި ފްރެންޗް ކަޕް ކާމިޔާބުކޮށްފަ އެވެ. އެންމެ ފަހުން ޕީއެސްޖީގައި ހުރި ގިނަ ކޯޗުންނެކޭ އެއްގޮތަށް ޕޮޗެޓީނޯ އަށް ވެސް ވަޒީފާ ގެއްލުނީ ޗެމްޕިއަންސް ލީގުގައި ނަތީޖާ ދަށްވުމުންނެވެ.
ޕީއެސްޖީން ޕޮޗެޓީނޯ ވަކިކުރުމަށް ފަހު އެ ޓީމުގެ ކޯޗުގެ މަގާމަށް ގެންނަން މަސައްކަތް ކުރަނީ ޒިނެދިން ޒިދާން ނޫނީ ކްރިސްޓޮފް ގަލްޓިއޭ އެވެ. ޒިދާން މި ވަގުތު އެއްވެސް ޓީމެއްގެ ވަޒީފާގައި ނެތް ނަމަވެސް ގަލްޓިއޭ ހުރީ ފްރެންޗް ލީގުގެ ނީސްގެ ކޯޗަކަށެވެ.
ޕީއެސްޖީން ހޯދަން މަސައްކަތް ކުރާ ކޯޗު ގަލްޓިއޭ: ޕީއެސްޖީން ދާދި ފަހުން ހަމަޖެއްސި ސްޕޯޓިން ޑިރެކްޓަރު ކެމްޕޯސް ވަނީ މީގެ ކުރިން ގަލްޓިއޭއާ އެކު ލިލްގައި މަސައްކަތްކޮށްފައި.--- ފޮޓޯ: އޭއެފްޕީ
ރިޕޯޓްތައް ބުނާގޮތުން ޒިދާންއާ އެކު ޕީއެސްޖީން އަންނަނީ މަޝްވަރާ ކުރަމުންނެވެ. އަދި ޒިދާނާ ޕީއެސްޖީ ހަވާލުކުރަން ކުރާ މަސައްކަތް ނާކާމިޔާބުވެއްޖެނަމަ، ގަލްޓިއޭ ހޯދަން ޕީއެސްޖީން ކުރާ މަސައްކަތް ވަރުގަދަ ކުރާނެ އެވެ.
ފްރާންސްގެ ނޫސްތަކުން ރިޕޯޓްކުރާގޮތުގައި ގަލްޓިއޭ ހުރީ ޕީއެސްޖީގެ ކޯޗުކަމާ ހަވާލުވާން ތައްޔާރަށެެވެ. އެކަމަކު، އޭނާ އެ ގޮތަށް ނިންމާނީ މި ވަގުތު ހަވާލުވެހުރި ނީސް އިން ވެސް އެގޮތަށް ބޭނުންވެގެންނެވެ. ނީސްއާ އެކު ކޮންޓްރެކްޓެއް އޮއްވައި ގަދަބާރުން އެ ޓީމު ދޫކޮށްލަން ގަލްޓިއޭ ބޭނުމެއްނުވެ އެވެ.
މިދިޔަ އަހަރު ލިލް އަށް ފްރެންޗް ލީގު ކާމިޔާބު ކޮށްދިނުމަށް ފަހު، ދެ ދުވަސް ފަހުން އެ ޓީމުގެ ކޯޗުކަން ދޫކޮށްލައި ގަލްޓިއޭ ނީސްއާ ހަވާލުވީ އާ ޗެލެންޖެއް ނެގުމުގެ ބޭނުމުގަ އެވެ. ގަލްޓިއޭއާ އެކު ނީސް ނިންމާލީ މި ސީޒަނުގައި ފްރެންޗް ލީގުގެ ފަސް ވަނައިގަ އެވެ. އެއީ އޭގެ ކުރީ ސީޒަނާ އަޅާކިޔާއިރު، ހަތަރު ދަރަޖައިގެ ކުރިއެރުމެކެވެ.
