ރާއްޖެއިން އެމެރިކާއަށް އައްޔަންކޮށްފައި ހުންނަވާ ސަފީރު ތިލްމީޒާ ހުސައިންގެ ބަދަލުގައި އެ މަގާމަށް އަބްދުލްގަފޫރު މުހައްމަދު އައްޔަން ކުރުމަށް ރައީސް އިބްރާހިމް މުހައްމަދު ސޯލިހު ނިންމަވައިފި އެވެ.
އެކި ގައުމުތަކަށް ރާއްޖޭން ކަނޑައަޅާ ސަފީރުންނާ މަގާމު ހަވާލުކުރުމުގެ ކުރިން ރައްޔިތުންގެ މަޖިލީހުގެ ރުހުން ހޯދަން ޖެހޭތީ ރައީސް މަޖިލީހަށް މި ބަދަލު ހުށަހަޅުއްވާފައިވާ ކަން މަޖިލީހުގެ ރިޔާސަތުން އިއުލާނުކުރީ މިއަދު އެވެ.
އެ މަގާމަށް އައްޔަން ކުރަން ފޮނުއްވެވި އަބްދުލްގަފޫރު މުހައްމަދު މިހާރު ހުންނަވަނީ މިނިސްޓްރީ އޮފް ފޮރިން އެފެއާޒްގެ އެމްބެސެޑާ އެޓް ލާޖްގެ މަގާމުގަ އެވެ.
ފޮރިން ސެކްރެޓެރީގެ މަގާމުގައި ހުންނަވަނިކޮށް އޭނާ އެ މަގާމަށް ބަދަލުކުރައްވާފައިވަނީ މިދިޔަ މެއި މަހުގެ އެއް ވަނަ ދުވަހު އެވެ.
ނިއުޖާޒީގެ ރަމަޕޯ ކޮލެޖުގެ އެޑްޖަންކްޓް ޕްރޮފެސަރު އޮފް ސަސްޓެއިނެބިލިޓީގެ މަގާމާއި އެމެރިކާގެ ކްލައިމެޓް އެކްޝަން ނެޓްވޯކުގެ ސޯޝަލީ އެންޑް އިކޮނޮމިކަލީ ޖަސްޓް އެޑެޕްޓޭޝަން އެންޑް މިޓިގޭޝަން ޓީމްގެ ކޯޗެއާގެ މަގާމު ވެސް އަދާކުރެއްވި ތިލްމީޒާ އެމެރިކާ ސަފީރުކަމަށް އައްޔަންކޮށްފައިވަނީ 2019 ވަނަ އަހަރުގެ އޭޕްރިލް މަހު އެވެ.
އެމެރިކާއިން އަނބުރާ ގެނައުމަށް ފަހު ތިލްމީޒާ ދެން ހަމަޖައްސާނީ ކޮން މަގާމަކަށް ކަން ވެސް ސަރުކާރުން އަދި ހާމައެއް ނުކުރެ އެވެ.
އެމެރިކާގައި ހުންނަވާ ރާއްޖޭގެ ސަފީރުކަމުގެ ފަތްކޮޅު 2019 ވަނަ އަހަރު ރައީސް އިބްރާހީމް މުހައްމަދު ސޯލިހު ތިލްމީޒާއަށް ދެއްވަނީ
ތިލްމީޒާއަކީ ޖުޑީޝަލް ސާވިސް ކޮމިޝަންގެ ރައީސް އަދި ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު ހިސާން ހުސައިންގެ ދައްތަ އެވެ.
މީގެ އިތުރުން، ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ ތިން ގައުމަކަށް ނޮން-ރެސިޑެންޓް ސަފީރުން އައްޔަން ކުރަން ވެސް ހުށަހަޅާފަ އެވެ.
މިގޮތުން، ޖަޕާނަށް ކަނޑައަޅުއްވާފައި ހުންނަވާ ސަފީރު ހަސަން ސާބިރު ކޮރެއާ ސަފީރުކަމަށް، އަދި ކިންގްޑަމް އޮފް ބެލްޖިއަމަށާއި ޔޫރަޕިއަން ޔޫނިއަނަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރު އުމަރު އަބްދުއްރައްޒާގް، ނެދަލޭންޑްސްއާއި ލަގްޒަންބާގް އަށް ކަނޑައަޅާ ސަފީރުކަމަށް ވެސް އައްޔަން ކުރުމަށް ވަނީ ހުށަހަޅާފަ އެވެ.
މި ސަފީރުންނަށް ރުހުން ދިނުމުގެ މައްސަލަތައް ދިރާސާކުރުމަށް މިއަދު ވަނީ މަޖިލީހުގެ ހާރިޖީ ކޮމިޓީއަށް ފޮނުވާފަ އެވެ.
