ފްރާންސްގެ އިންތިހާބުގެ ފުރަތަމަ ބުރުގެ ވޯޓުލުން ނިމުނުއިރު ވޯޓުލާން ނުކުމެފައި ވަނީ އެހެން އަހަރުތަކާ އަޅާބަލާއިރު މަދު އަދަދެއްގެ ރައްޔިތުންކަން ތަފާސްހިސާބުތަކުން ދައްކައިފި އެވެ.
މިހާރުގެ ރައީސް އެމަނުއެލް މެކްރޯން ދެވަނަ ދައުރެއް ކަށަވަރުކުރައްވާފައިވާއިރު އެ މަނިކުފާނާ އެންމެ ބޮޑަށް ވާދަކުރައްވަނީ ވާތު ފިޔައިގެ ކޯލިޝަނަކުން ނުކުމެ ހުންނެވި ކެންޑިޑޭޓް، ޖީން ލޫކް އެވެ.
ފްރާންސްގެ ގަޑިން އިރުއޮއްސި ހައެއް ޖެހިއިރު ވޯޓުލާ މަރުކަޒުތައް ބަންދުކުރި ނަމަވެސް ބޮޑެތި ސިޓީތައް ކަމަށްވާ ޕެރިސް، މާސޭ، ލިޔޯން އަދި ޓުލޫސްގައި ވޯޓުލުން ދެ ގަޑިއިރަށް އިތުރުކުރި އެވެ.
ފަހެއް ޖެހުމާ ހަމައަށް ވޯޓުލާން ނުކުތީ ފްރާންސްގެ ވޯޓުލެވޭ މީހުންގެ އާބާދީގެ 39.42 ޕަސެންޓު ކަމަށް ބީބީސީން ރިޕޯޓުކުރި އެވެ. އެއީ، ފާއިތުވެދިޔަ 20 އަހަރު ވެސް އިންތިހާބުތަކުގައި ވޯޓުލާން ނުކުތް މީހުންނަށް ވުރެ ދަށް އަދަދެކެވެ.
ފްރާންސްގެ 577 ދާއިރާއަކަށް މި އިންތިހާބުގައި މެމްބަރުން އިންތިހާބު ކުރާނެ އެވެ. ސަރުކާރެއް އުފެއްދުމަށްޓަކައި އޭގެ ތެރެއިން 289 ގޮނޑި ކާމިޔާބު ކުރަން ޖެހެ އެވެ.
ޔޫރަޕުގެ ގިނަ ގައުމުތަކެކޭ ވެސް އެއްގޮތަށް ފްރާންސްގައި ވެސް އިންފްލޭޝަން ރޭޓުތައް މަތިވެ އިންތިހާބަށް އޮތް ޝައުގު ދަށްވެފައި ވާކަމަށް ދިރާސާ ކުރާ ފަރާތްތަކުން ބުނެ އެވެ.
